អន្តរជាតិ
ឌូទើតេ ថា ចិនគំរាមធ្វើសង្គ្រាម បើហ្វីលីពីនបូមប្រេងនៅសមុទ្រចិនខាងត្បូង
× ប្រធានាធិបតីហ្វីលីពីន រ៉ូឌ្រីហ្គោ ឌូទើតេ បានរងការព្រមានចំៗពីសំណាក់ប្រធានាធិបតីចិន ស៊ី ជីនភីង ជុំវិញបញ្ហាសមុទ្រចិនខាងត្បូង។ លោក ឌូទើតេ បានរំឭកឡើងវិញពីជំនួបរវាងលោក និងប្រធានាធិបតីចិននៅទីក្រុងប៉េកាំង ហើយលោកក៏បានប្រាប់មេដឹកនាំចិនពីបំណងរបស់ហ្វីលីពីនក្នុងការបូមយកប្រេងក្នុងតំបន់សមុទ្រចិនខាងត្បូងដែលជារបស់ហ្វីលីពីន។ ប៉ុន្តែលោក ស៊ី ជីនភីង ក៏បានប្រាប់វិញថា កុំប៉ះពាល់ប្រេងឲ្យសោះ បើមិនអ៊ីចឹងទេ សង្គ្រាមនឹងផ្ទុះមិនខាន។
ទំនាក់ទំនងរវាងហ្វីលីពីន និងចិន ស្អិតល្មួតខ្លាំងនារយៈពេលចុងក្រោយ ដោយមេដឹកនាំហ្វីលីពីន រ៉ូឌ្រីហ្គោ ឌូទើតេ មានជំហរទន់ភ្លន់ច្រើនដាក់ចិន។ ប៉ុន្តែទំនាក់ទំនងល្អនេះ នៅតែមិនអាចចៀសផុតពីការប្រទាំងប្រទើសលើបញ្ហាអធិបតេយ្យនៅសមុទ្រចិនខាងត្បូងដដែល។ នៅថ្ងៃទី១៩ ខែឧសភា ម្សិលមិញ លោក ឌូទើតេ បានទម្លាយព័ត៌មានសំខាន់ក្នុងកិច្ចសន្ទនារបស់លោក និងប្រធានាធិបតីចិន ស៊ី ជីនភីង ដែលរួមទាំងការគំរាមធ្វើសង្គ្រាមផង។
អំឡុងពេលសន្ទានានោះ ប្រធានាធិបតី ឌូទើតេ បានសមភាគីចិន ស៊ី ជីនភីង ពីបំណងរបស់ហ្វីលីពីនក្នុងការខួងយកប្រេងក្នុងតំបន់ជម្លោះសមុទ្រចិនខាងត្បូង ដែលហ្វីលីពីនហៅថាសមុទ្រហ្វីលីពីនខាងលិច ព្រោះទីតាំងនោះស្ថិតក្នុងតំបន់សេដ្ឋកិច្ចផ្ដាច់មុខ (EEZ) របស់ហ្វីលីពីន។ លោក ឌូទើតេ ប្រាប់លោក ស៊ី ជីនភីង ត្រង់ៗថា ទីនោះជាកម្មសិទ្ធិរបស់ហ្វីលីពីនដែរ ហើយហ្វីលីពីននឹងទៅខួងយកប្រេងពីទីនោះ។
«យើងគឺជាមិត្ត។ ចិន មិនចង់ឈ្លោះប្រកែកជាមួយហ្វីលីពីនឡើយ ហើយចិនគ្រាន់ចង់រក្សាទំនាក់ទំនងល្អប្រសើរពេលបច្ចុប្បន្ននេះ។ ប៉ុន្តែបើហ្វីលីពីនបង្ខំ ចិននឹងធ្វើសង្គ្រាមមិនខាន»។ នេះជាសម្ដីឆ្លើយតបរបស់ប្រធានាធិបតីចិន ស៊ី ជីនភីង អំឡុងពេលជំនួបជាមួយមេដឹកនាំហ្វីលីពីន ដែលត្រូវបានរំឭកឡើងវិញដោយលោក ឌូទើតេ ផ្ទាល់ និងផ្សាយដោយសារព័ត៌មាន Rappler ។ បើតាមសម្ដីលោក ឌូទើតេ មេដឹកនាំទាំង២ ក៏និយាយការពារជំហរទាមទារអធិបតេយ្យក្នុងតំបន់ជម្លោះដែរ។
ប្រធានាធិបតីហ្វីលីពីន បានលើកយកអំណះអំណាងនៃសាលក្រមតុលាការអន្តរជាតិដែលកាត់ក្ដីឲ្យហ្វីលីពីនឈ្នះចិនក្នុងសំណុំរឿងនេះ។ ប៉ុន្តែប្រធានាធិបតីចិន បានលើកយកបញ្ហាប្រវត្តិសាស្ត្រមកការពារជំហររបស់ខ្លួន ហើយថែមទាំងហៅការទាមទាររបស់ហ្វីលីពីថា ជាសាលក្រមដែលពឹងផ្អែកលើព្រឹត្តការណ៍បច្ចុប្បន្នប៉ុណ្ណោះ។ លោក ស៊ី ក៏ប្រាប់លោក ឌូទើតេ វិញថា រឿងសាលក្រមនេះចាំនិយាយពេលក្រោយ។
ចិន មិនចង់លើករឿងសាលក្រមមកនិយាយ ព្រោះចិនបារម្ភថា វៀតណាម ឬប្រទេសទាមទារកម្មសិទ្ធិផ្សេងទៀត អាចដើរតាមហ្វីលីពីន រួចដាក់ពាក្យបណ្ដឹងទៅតុលាការអន្តរជាតិដែរ។ អ្វីដែលគួរឲ្យចាប់អារម្មណ៍នោះ ការគាស់កកាយកិច្ចសន្ទនានេះ ធ្វើក្រោយចិន និងហ្វីលីពីនបើកកិច្ចប្រជុំពិភាក្សាទ្វេភាគីស្ដីពីបញ្ហាសមុទ្រចិនខាងត្បូង។ ចិន ទំនងមិនសប្បាយចិត្តឡើយ ពេលប្រធានធិបតីហ្វីលីពីនទម្លាយព័ត៌មានបែបនេះនោះ៕
Tag:
ហ្វីលីពីន
ចិន
រ៉ូឌ្រីហ្គោ ឌូទើតេ
ស៊ី ជីនភីង
© រក្សាសិទ្ធិដោយ thmeythmey.com