មេដឹកនាំរបបសឹកថៃ ប្រាយុទ្ធ ថា ការបោះឆ្នោតឆ្នាំក្រោយអាចពន្យារពេល

អន្តរជាតិ

មេដឹកនាំរបបសឹកថៃ ប្រាយុទ្ធ ថា ការបោះឆ្នោតឆ្នាំក្រោយអាចពន្យារពេល

24, May 2017 , 8:19 pm

រូបភាព

ដោយ: តន ចាន់រិទ្ធារ៉ា

បន្ទាប់ពីការផ្ទុះគ្រាប់បែកក្នុងមន្ទីរពទ្យេនៅទីក្រុងបាងកក មេដឹកនាំរបបយោធាថៃ ឧត្តមសេនីយ៍ ប្រាយុទ្ធ ចន្ទអូចា បានបង្ហាញការព្រួយបារម្ភថា ការបោះឆ្នោតទូទៅនៅឆ្នាំក្រោយ អាចនឹងត្រូវបានពន្យារពេលមិនខាន បើស្ថានការណ៍ក្នុងប្រទេសមិនល្អបែបនេះ។ បើតាមលោក ប្រាយុទ្ធ ការបោះឆ្នោតអាចធ្វើបាន លុះត្រាតែមានសន្តិភាព និងសណ្ដាប់ធ្នាប់ជាមុនសិន តែបើការគំរាមកំហែង និងការផ្ទុះគ្រាប់បែកចេះតែបន្តកើតមាន គ្មានហេតុផលអ្វីត្រូវរៀបចំការបោះឆ្នោតឡើយ។

កាលបរិច្ឆេទបោះឆ្នោតដែលគ្រោងធ្វើនៅឆ្នាំ២០១៨ កំពុងស្ថិតក្នុងភាពស្រពិចស្រពិល បន្ទាប់ពីការផ្ទុះគ្រាប់បែកជាបន្តបន្ទាប់ រហូតមកដល់ការផ្ទុះក្នុងមន្ទីរពេទ្យក្នុងទីក្រុងបាងកក ក្នុងមន្ទីរពេទ្យ Phramongkutklao បង្កឲ្យមានមនុស្ស ២៤នាក់រងរបួសនាថ្ងៃទី ២២ ខែ ឧសភា ។ Phramongkutklao ជាមន្ទីរពេទ្យយោធាដែលសម្បូរដោយមន្ត្រីយោធាចូលនិវត្តន៍ចូលព្យាបាលផង។ មេដឹកនាំរបបសឹកថៃជឿថា ការវាយប្រហារនេះ មិនអំណោយផលដល់ការបោះឆ្នោតឡើយ។

បើតាមកាសែតបាងកកប៉ុស្តិ៍ មេដឹកនាំរដ្ឋប្រហារ និងជានាយករដ្ឋមន្ត្រី លោក ប្រាយុទ្ធ ចន្ទអូចា បានព្រលយពាក្យថា ពេលវេលាបោះឆ្នោតអាចផ្លាស់ប្ដូរ បើសិនជាគ្មានសន្តិភាពក្នុងប្រទេសទេ។ លោកបន្តថា ការបោះឆ្នោតអាចរៀបចំបានឬយ៉ាងណានោះបើស្ថានការណ៍បែបនេះចេះតែបន្តទៅមុខ គ្រាប់បែកនៅតែផ្ទុះ ការបែកបាក់ក្នុងចំណោមប្រជាជននៅតែមាន រួមនឹងបញ្ហាផ្សេងទៀតកើតឡើងមិនឈប់មិនឈរនោះ។ ការបោះឆ្នោតបាន ឬមិនបាន អាស្រ័យលើការចូលរួមរបស់ប្រជាជនទាំងអស់។

ជាមួយគ្នានោះ លោកនាយករដ្ឋមន្ត្រី ក៏បានទាត់ចោលពាក្យចចាមអារាមមួយចំនួនលើបណ្ដាញសង្គមដែលចោទរដ្ឋាភិបាលថានៅពីក្រោយការផ្ទុះនេះ។ ពាក្យចចាមអារាមដែលផ្សព្វផ្សាយនោះនិយាយទៀតថា របបយោធាធ្វើដូចនេះ ដើម្បីបានលេសបន្តគ្រប់គ្រងអំណាច។ ប៉ុន្តែនៅថ្ងៃទី២៣ ខែឧសភា លោក ប្រាយុទ្ធ ចេញមកបញ្ជាក់ថា គ្មានហេតុផលអ្វីដែលរដ្ឋាភិបាលត្រូវធ្វើអំពើឆ្កួតឡប់បែបនេះឡើយ លើកលែងតែក្រុមចង់បានអំណាចពីលោកប៉ុណ្ណោះ។

ទាក់ទងនឹងការផ្ទុះគ្រាប់នៅមន្ទីរពេទ្យនេះដែរ សន្តិសុខត្រូវបានពង្រឹងយ៉ាងខ្លាំងនៅមន្ទីរពេទ្យដដែលនេះ និងនៅតាមកន្លែងមានមនុស្សកកកុញ។ មន្ត្រីយោធាថៃនិយាយថា ក្រុមឧទ្ទាមនៅភាគខាងត្បូងអាចនៅពីក្រោយហេតុការណ៍នេះ ដើម្បីទម្លាក់តម្លៃរដ្ឋាភិបាល។ សាលារៀន និងទីសក្ការសាសនាជាច្រើន ក៏ត្រូវបានពង្រឹងសុវត្ថិភាពដែរ ព្រោះក្រុមភេរវជនបានប្ដូរគោលដៅរបស់ខ្លួន និងបង្វែរគោលដៅដាក់ប្រជាជនស្លូតត្រង់វិញ។

ការបោះឆ្នោតគ្រោងនឹងរៀបចំនៅឆ្នាំ២០១៨ បន្ទាប់ពីការចូលធរមានរដ្ឋធម្មនុញ្ញថ្មី។ គណៈកម្មាធិការព្រាងរដ្ឋធម្មនុញ្ញ កំពុងញាប់ដៃជើងក្នុងការសរសេរច្បាប់សំខាន់ៗមួយចំនួនទៀតដែលចាំបាច់សម្រាប់ការបោះឆ្នោតដូចជាច្បាប់បក្សនយោបាយ និងច្បាប់តំណាងរាស្ត្រជាដើម។ ដោយសារច្បាប់ច្រើន ពេលវេលាក៏ត្រូវអូសបន្លាយយូរតាមនឹងដែរ។ ទន្ទឹមនឹងបញ្ហាច្បាប់ ក៏ស្រាប់តែលេចចេញបញ្ហាអសន្តិសុខដែលគំរាមដល់ដំណើរការប្រជាធិបតេយ្យទៅទៀត៕