ជាតិ
គ្មានអាវុធ មានសង្គ្រាម? បណ្ឌិត និងអ្នកនយោបាយ ផ្តល់ការវិភាគ
× ភ្នំពេញ៖ បញ្ហា«សង្គ្រាម»ក្រោយការបោះឆ្នោត ត្រូវបានលើកយកពិភាក្សាគ្នា ក្នុងវេទិកាតុមូលមួយដែលរៀបចំឡើងដោយរាជបណ្ឌិត្យសភាកម្ពុជា កាលពីព្រឹកថ្ងៃទី២៩ ខែឧសភា។ តំណាងគណបក្សប្រជាជនកម្ពុជា និងវាគ្មិនភាគច្រើនដែលជាបណ្ឌិត មើលឃើញពីបញ្ហាដែលអាចកើតឡើង ប៉ុន្តែតំណាងបក្សក្រៅរដ្ឋាភិបាលមួយចំនួន គិតថា គ្មានផ្លូវនោះឡើយ ពីព្រោះ «គ្មានអាវុធ»។
សម្ដេចនាយករដ្ឋមន្ត្រី ហ៊ុន សែន បានថ្លែងប្រាប់ពលរដ្ឋថា ក្រៅពីគណបក្សប្រជាជនកម្ពុជា ដឹកនាំរដ្ឋាភិបាលនោះ គ្មានគណបក្សណាដែលអាចដឹកនាំប្រទេសឲ្យមានស្ថេរភាព សន្តិភាព និងការអភិវឌ្ឍនោះទេ ហើយសង្គ្រាមនឹងអាចកើតឡើងផងដែរ។ បើទោះជាមិនទាន់មានការបកស្រាយអត្ថន័យឲ្យច្បាស់នៃពាក្យថា «សង្គ្រាម» ដែលអាចផ្ទុះឡើងក្រោយការបោះឆ្នោតក្តី តែសម្ដេច ហ៊ុន សែន ធ្លាប់បានលើកទឡ្ហីករណ៍ខ្លះថា មូលហេតុដែលនាំឲ្យកើតមានសង្គ្រាមនោះ គឺដោយសារតែក្រុមកងកម្លាំងប្រដាប់អាវុធ អាជ្ញាធរ និងក្រុមឧកញ្ញា ឬអ្នកមានទ្រព្យសម្បត្តិស្តុកស្តម្ភមួយចំនួន បានក្លាយជាមុខសញ្ញាកម្ចាត់ចោលរបស់ក្រុមប្រឆាំង។
ថ្លែងក្នុងវេទិកាតុមូលកាលពីថ្ងៃចន្ទ តំណាងរាស្ត្រគណបក្សសង្គ្រោះជាតិ លោក សុន ឆ័យ លើកឡើងថា គណបក្សខ្លួននឹងមិនចាត់ទុកខ្មែរណាជាសត្រូវឡើយ នៅពេលឈ្នះឆ្នោតដឹកនាំប្រទេស។ គណបក្សលោកធានាឯកភាពជាតិ ជាលក្ខណៈគ្រួសារ និងរួបរួមជាមួយគណបក្សដទៃ ដើម្បីការអភិវឌ្ឍប្រទេសកម្ពុជា។ ដូច្នេះលោកជឿជាក់ថា គ្មានសង្គ្រាមកើតឡើងក្រោយការបោះឆ្នោត។
សូមស្ដាប់សំឡេងលោក សុន ឆ័យ៖
មិនខុសពីលោក សុន ឆ័យ នោះទេ លោក ផាន់ សិទ្ធិ តំណាងគណបក្សហ្វ៊ុនស៊ិនប៉ិច បន្ថែមថា មូលហេតុដែលសង្គ្រាមមិនអាចផ្ទុះឡើងនោះ ដោយសារតែគណបក្សដទៃគ្មានអាវុធ និងកងកម្លាំងនៅក្នុងដៃ ដូចគណបក្សកាន់អំណាចនោះទេ។
សូមស្ដាប់សំឡេងលោក ផាន់ សិទ្ធិ៖
សម្រាប់លោក សាម ស៊ុនឌឿន អនុប្រធានគណបក្សប្រជាធិបតេយ្យមូលដ្ឋានវិញ ជឿជាក់ថា គ្រប់គណបក្សនយោបាយទាំងអស់ប្រាកដជាមិនចង់ឲ្យមានសង្គ្រាមផ្ទុះឡើយ ដូច្នេះមានតែការគោរពលើលទ្ធផលបោះឆ្នោតទេ ដែលអាចឲ្យប្រទេសមានស្ថេរភាព និងរក្សាសន្តិភាព។
សូមស្ដាប់សំឡេងលោក សាម ស៊ុនឌឿន៖
បើទោះជាគណបក្សទាំង៣ខាងលើ បានលើកទឡ្ហីករណ៍ថា មិនមានសង្គ្រាមកើតឡើងក្តី ប៉ុន្តែសម្រាប់អ្នកនាំពាក្យគណបក្សប្រជាជន លោក សុខ ឥសាន នៅតែអះអាងថា សង្គ្រាមនៅតែកើតមាន។ មូលហេតុដែលលោក ឥសាន ថាមានសង្គ្រាមនោះ ដោយសារតែគណបក្សប្រឆាំង អាចនៅបន្តប្រើសម្ដីអហិង្សា តែបង្កប់អត្ថន័យញុះញង់ លាភពណ៌ និងបញ្ឆេះកំហឹង។
សូមស្ដាប់សំឡេងលោក សុខ ឥសាន៖
បើនិយាយពីការធ្វើសង្គ្រាមវិញ ទោះបីជាគ្មានអាវុធក្នុងដៃក្តី ក៏អាចបង្កសង្គ្រាមបានដែរ។ នេះបើតាមនិយមន័យសេដ្ឋកិច្ច ដែលត្រូវបានលោក គី សេរីវឌ្ឍន៍ អ្នកជំនាញសេដ្ឋកិច្ច ពន្យល់ន័យថា បើអ្នកនយោបាយមានទំនាស់ផលប្រយោជន៍ផ្នែកសេដ្ឋកិច្ចនោះ ពួកគេនឹងអាចដើរញុះញង់ឲ្យពលរដ្ឋ ឬកម្មកររោងចក្រតវ៉ាពីបញ្ហានេះ ឬបញ្ហានោះ ដូច្នេះវាក៏ជាដើមចមនៃសង្គ្រាមផងដែរ។
សូមស្ដាប់សំឡេងលោក គី សេរីវឌ្ឍន៍៖
តែយ៉ាងណាតំណាងគណៈកម្មាធិការដើម្បីការបោះឆ្នោតដោយសេរី និង យុត្តិធម៌នៅកម្ពុជា ហៅកាត់ថា (ខុមហ្វ្រែល) លោក យឿង សុធារ៉ា ដែលបានចូលរួមកិច្ចពិភាក្សាតុមូលរបស់រាជបណ្ឌិត្យសភានេះ យល់ឃើញថា បើការបោះឆ្នោតប្រកបដោយសេរី ត្រឹមត្រូវ និងយុត្តិធម៌ ហើយព្រមទទួលយកលទ្ធផលបោះឆ្នោត និងព្រមផ្ទេរអំណាចដោយសន្តិវិធីនោះ ការផ្ទុះសង្គ្រាមនឹងមិនអាចកើតមាននោះទេ។
សូមស្ដាប់សំឡេងលោក យឿង សុធារ៉ា ៖
សម្រាប់អ្នកវិភាគវិញ ធ្លាប់លើកឡើងថា សារនយោបាយនិយាយពី«សង្គ្រាម»កើតឡើងក្រោយការបោះឆ្នោតរបស់សម្ដេច ហ៊ុន សែន នេះគឺគ្រាន់តែជាសម្តីបំភិតបំភ័យស្មារតីរបស់ពលរដ្ឋប៉ុណ្ណោះ ។ អ្នកវិភាគ លើកឡើងថា សម្ដេច ហ៊ុន សែន តែងតែនិយាយពីសន្តិភាព ស្ថេរភាព និងការអភិវឌ្ឍប្រទេស ដូច្នេះសម្ដេច នឹងមិនបង្កឲ្យមានសង្គ្រាមកើតឡើង ហើយបំផ្លាញសម្មិទ្ធផលខ្លួនដែលខំកសាងអស់រយៈពេលជិត៤ទសវត្សនេះឡើយ ។
ទាំងអ្នកនយោបាយ ក្រុមបណ្ឌិត និងសង្គមស៊ីវិល អំពាវនាវឲ្យពលរដ្ឋកុំឲ្យមានការភ័យខ្លាច ហើយចូលរួមបោះឆ្នោតជ្រើសរើសថ្នាក់ដឹកនាំ ដែលខ្លួនពេញចិត្តសម្រាប់ការអភិវឌ្ឍឃុំ-សង្កាត់ និងប្រទេសជាតិផងដែរ៕
Tag:
ហ្វ៊ុនស៊ិនប៉ិច
CNRP
GDP
CPP
រាជបណ្ឌិតសភា
បោះឆ្នោតឃុំសង្កាត់
© រក្សាសិទ្ធិដោយ thmeythmey.com