ជាតិ
សេដ្ឋកិច្ច
ILO ស្នើរដ្ឋាភិបាលតាមដាន«រោងចក្រម៉ៅការបន្ត» ដែលអាចមានការគេចវេសពីច្បាប់
× ភ្នំពេញ៖ ខណៈមានភាពមិនស៊ីគ្នារវាងកំណើននាំចេញក្នុងវិស័យកាត់ដេរ និងការថយចុះចំនួនការងារនិងរោងចក្រកាត់ដេរចុះបញ្ជីនៅកម្ពុជានៅក្នុងឆ្នាំ២០១៦ អង្គការអន្តរជាតិខាងការងារ (ILO) បានស្នើឲ្យស្ថាប័នពាក់ព័ន្ធតាមដានដោយប្រុងប្រយ័ត្នលើរោងចក្រកាត់ដេរម៉ៅការបន្ត ដែលរោងចក្រប្រភេទនេះអាចត្រូវបានប្រើប្រាស់ដើម្បីគេចវេសពីការគោរពច្បាប់។ នេះបើតាមព្រឹត្តបត្រព័ត៌មានរបស់ ILO ដែលចេញផ្សាយនៅថ្ងៃទី២៩ខែឧសភា។
ILO បានឲ្យដឹងថា ការនាំចេញបន្តកើនឡើងក្នុងល្បឿនដ៏រឹងមាំក្នុងឆ្នាំ២០១៦ ដោយកើនឡើង ៧,២ ភាគរយ ដល់ទឹកប្រាក់ ៧,៣ ពាន់លានដុល្លារអាមេរិក ខណៈចំនួនរោងចក្រនាំចេញដែលចុះបញ្ជីផ្លូវការក្នុងវិស័យនេះបានធ្លាក់ចុះ ១០,៤ភាគរយ ហើយចំនួនកម្មករបានធ្លាក់ចុះចំនួន ២,៩ ភាគរយនៅក្នុងឆ្នាំ២០១៦ បើធៀបនឹងឆ្នាំ២០១៥ ។
ចំពោះភាពមិនស៊ីសង្វាក់គ្នានៃតួលេខខាងលើ ILO បានកំណត់កត្តាចម្បងចំនួន ៣ ដែលនាំឲ្យកើតមានបញ្ហានេះ។ កត្តាទាំងនោះរួមមាន ការកើនឡើងនូវផលិតភាពរបស់ឧស្សាហកម្មនេះ និងបញ្ហាផ្នែកស្ថិតិទាក់ទងនឹងការវាស់វែងចំនួនការងារ និងរោងចក្រ ព្រមទាំងកំណើនផលិតកម្មនៅក្នុងរោងចក្រម៉ៅការបន្ត ដែលជាចំណុចត្រូវបានសង្កត់ធ្ងន់ដោយ ILO ។
លោក Maurizio Bussi នាយកការិយាល័យអង្គការអន្តរជាតិខាងការងារប្រចាំប្រទេសថៃ កម្ពុជា និងឡាវ បានមានប្រសាសន៍ថា៖«កំណើនការងារ និងផលិតកម្មនៅក្នុងរោងចក្រម៉ៅការបន្ត (Subcontracting Factories) អាចជាការព្រួយបារម្ភមួយ ប្រសិនបើការម៉ៅការបន្តកំពុងត្រូវបានប្រើប្រាស់ជាវិធីមួយដើម្បីចៀសវាងការគោរពច្បាប់ និងបទដ្ឋានគតិយុត្តិនានា រួមទាំងច្បាប់ការងារ និងប្រាក់ឈ្នួលអប្បបរមានោះ»។
លោក Maurizio Bussi បានស្នើឲ្យអ្នកពាក់ព័ន្ធបញ្ចេញសកម្មភាពចំពោះអាជីវកម្មរោងចក្រម៉ៅការបន្ត ដោយលោកថ្លែងយ៉ាងដូច្នេះថា៖«ស្ថានភាពនេះគួរត្រូវបានតាមដានដោយប្រុងប្រយ័ត្នពីសំណាក់ភាគីពាក់ព័ន្ធ និងស្ថាប័ននៃរាជរដ្ឋាភិបាលកម្ពុជា»។
ព្រឹត្តបត្រដដែលបានបញ្ជាក់ថា៖«មិនដូចជារោងចក្រនាំចេញដែលបានចុះបញ្ជីទេ អ្នកម៉ៅការបន្តមិនត្រូវបានត្រួតពិនិត្យតាមដានដោយកម្មវិធីរោងចក្រកាន់តែប្រសើរនៅកម្ពុជានោះទេ ហើយក៏អាចមានការយកចិត្តទុកដាក់ពីសំណាក់ស្ថាប័នអនុវត្តច្បាប់ជាតិ តិចជាងរោងចក្រធម្មតាដែរ»។
ការនាំចេញសំលៀកបំពាក់ និងស្បែកជើង នៅតែជាផលិតផលនាំចេញដ៏សំខាន់របស់កម្ពុចា ដែលតំណាងឲ្យ ៧៨ ភាគរយនៃទំនិញនាំចេញសរុបរបស់ប្រទេសក្នុងឆ្នាំ២០១៦ ។ នេះបើតាមរបាយការណ៍របស់ ILO ដែលបញ្ជាក់ថា ទីផ្សារសហភាពអឺរ៉ុប និងសហរដ្ឋអាមេរិកបានកាន់កាប់ចំណែកទីផ្សារ ៦៥ ភាគរយ នៅឆ្នាំ២០១៦ ដែលធ្លាក់ចុះពី ៧២ភាគរយនៅឆ្នាំ២០១៥ ប៉ុន្តែមានកំណើនចំណែកទីផ្សារផ្សេងទៀត ដូចជា ជប៉ុន និងកាណាដា។
របាការណ៍បន្ថែមថា ចំណូលប្រចាំខែជាមធ្យម ដោយគិតទាំងប្រាក់ម៉ោងបន្ថែម របស់កម្មករកាត់ដេរសំលៀកបំពាក់និងស្បែកជើងកម្ពុជា បានកើនឡើងពី ១៤៥ ដុល្លារអាមេរិកក្នុងឆ្នាំ២០១៤ ដល់ ១៧៥ ដុល្លារក្នុងឆ្នាំ២០១៥ និងដល់ ១៩៥ ដុល្លារក្នុងឆ្នាំ២០១៦ ៕
© រក្សាសិទ្ធិដោយ thmeythmey.com