១នាទី ៣០០ដុល្លារ សម្រាប់ទូរទស្សន៍ដែលផ្សាយផ្ទាល់យុទ្ធនាការចុងក្រោយរបស់ CPP

ជាតិ

នយោបាយជាតិ

១នាទី ៣០០ដុល្លារ សម្រាប់ទូរទស្សន៍ដែលផ្សាយផ្ទាល់យុទ្ធនាការចុងក្រោយរបស់ CPP

02, Jun 2017 , 12:54 pm

រូបភាព

ដោយ: ធឿន បញ្ញាឬទិ្ធ

ភ្នំពេញ៖ សម្ដេច ហ៊ុន សែន ប្រធានគណបក្សប្រជាជនកម្ពុជា បានចេញមុខជាលើកដំបូង នៃការដឹកនាំដង្ហែក្បួនឃោសនាបោះឆ្នោតក្រុមប្រឹក្សាឃុំ-សង្កាត់ នាថ្ងៃចុងក្រោយនេះ។ តាមរយៈសកម្មភាពឃោសនានយោបាយជាលើកដំបូងនេះ នៅតាមបណ្ដាទូរទស្សន៍នានា បានផ្ដិតយករូបភាព និងចុះផ្សាយព្រោងព្រាតពីសកម្មភាពរបស់សម្ដេច ហ៊ុន សែន។

ថ្លែងនៅលើរថយន្តដង្ហែក្បួនឃោសនា នារង្វង់មូលកាំភ្លើងកួចកាណុង ប្រធានគណបក្សប្រជាជនកម្ពុជារូបនេះ បានឲ្យដឹងថា មូលហេតុដែលគ្រប់បណ្ដាទូរទស្សន៍ផ្សាយផ្ទាល់ពីសកម្មភាពសម្ដេចនេះ ដោយសារគណបក្សប្រជាជន បានទិញម៉ោងទូរទស្សន៍ទាំងនោះ ក្នុងមួយនាទី តម្លៃ៣០០ដុល្លារ សម្រាប់ការផ្សព្វផ្សាយ។ បើតាមសម្ដេច ហ៊ុន សែន គណបក្សប្រជាជនបានកុងត្រាជួលម៉ោងជាមួយទូរទស្សន៍ចំនួន៨ប៉ុស្តិ៍។

សម្ដេច ហ៊ុន សែន បានបញ្ជាក់ដូច្នេះថា៖«សូមជម្រាបទៅគណៈកម្មាធិការជាតិរៀបចំការបោះឆ្នោតថា យើងបានជួលម៉ោងក្នុងមួយនាទី ៣០០ដុល្លារសហរដ្ឋអាមេរិក ព្រោះថាគណៈកម្មាធិការជាតិរៀបចំការបោះឆ្នោត តម្រូវឲ្យទូរទស្សន៍ឯកជនទាំងអស់ បើជួលម៉ោងឲ្យបក្សមួយបាន ត្រូវជួលឲ្យបក្សមួយផ្សេងទៀត។ ដូច្នេះគណបក្សប្រជាជនបានធ្វើកុងត្រាជួលជាមួយទូរទស្សន៍បាយ័ន (ពីរប៉ុស្តិ៍) CTN (៤ប៉ុស្តិ៍) ហង្សមាសមួយ អប្សរាមួយ PNNមួយ អាស៊ីអាគ្នេយ៍មួយដែរ។ យើងនៅព្រឹកនេះប្រហែលអស់លុយបន្តិច…។ហើយយើងក៏ជួលឧទ្ធម្ភាគចក្រដែរ»។

ជាមួយគ្នានេះ សម្ដេច ហ៊ុន សែន ក៏ប្រាប់ទៅគណបក្សដទៃទៀត ដែលមានបំណងចង់ជួលម៉ោងទូរទស្សន៍ផ្សាយពីសកម្មភាពឃោសនាខ្លួននោះ ពួកគេអាចទៅចុះកុងត្រាជាមួយបណ្ដាទូរទស្សន៍ទាំងនោះ ដោយទិញម៉ោងក្នុងតម្លៃដូចគ្នានឹងគណបក្សប្រជាជនបានដែរ។

ក្រៅពីការផ្សាយតាមបណ្តាញសង្គមហ្វេសប៊ុក និងទូរទស្សន៍ឯកជនដែលសម្ដេច ហ៊ុន សែន បានរៀបរាប់ខាងលើនេះ គេសង្កេតឃើញថា មានទូរទស្សន៍ប៉ុស្តិ៍លេខ៣, ប៉ុស្តិ៍លេខ៩ និងទូរទស្សន៍ខ្សែកាបជាច្រើនទៀត បានផ្សាយពីសកម្មភាពសម្ដេចផងដែរ៕