អន្តរជាតិ
អូបាម៉ា ថា ត្រាំ «បោះបង់ចោលអនាគត»ព្រោះឈប់គាំទ្រកិច្ចព្រមព្រៀងប្រែប្រួលអាកាសធាតុ
× អតីតប្រធានាធិបតីអាមេរិកលោក បារ៉ាក់ អូបាម៉ា បានទិតៀនការសម្រេចចិត្តដកអាមេរិកពីកិច្ចព្រមព្រៀងអាកាសធាតុក្រុងប៉ារីសឆ្នាំ ២០១៥ ដែលជាផ្នែកមួយនៃសមិទ្ធផលនយោបាយដ៏សំខាន់របស់លោកនោះ។ អូបាម៉ា បានចាត់ទុកការសម្រេចចិត្តនេះជាការបោះបង់ចោលអនាគតអាមេរិកខ្លួនឯងផងនិងពិភពលោកទាំងមូលផង។
អតីតប្រធានាធិបតីអាមេរិកលោក បារ៉ាក់ អូបាម៉ា ចេញមុខរិះគន់រដ្ឋបាលអាមេរិកបច្ចុប្បន្នដែលដឹកនាំដោយលោក ដូណាល់ ត្រាំ ជាថ្មីទៀតហើយនៅថ្ងៃព្រហស្បតិ៍ទី ១មិថុនា ចាប់តាំងពីលោកចាកចេញពីសេតវិមាននៅខែមករានោះ។ លោករិះគន់រដ្ឋបាលត្រាំរឿងដកខ្លួនឈប់គាំទ្រកិច្ចព្រមព្រៀងស្តីពីប្រែប្រួលអាកាសធាតុដែលពិភពលោកសម្រេចបានឆ្នាំ ២០១៥នោះ។
អតីតប្រធានាធិបតីរូបនេះបញ្ជាក់ថា អាមេរិកគួរតែនាំមុខគេពេលនិយាយដល់ការដោះស្រាយបញ្ហាប្រែប្រួលអាកាសធាតុនេះ។ លោកក៏បានហៅការសម្រេចរបស់រដ្ឋបាល ដូណាលត្រាំ ថាជាការបោះបង់ចោលអនាគតរបស់អាមេរិកផងនិងពិភពលោកផង ដែរ។
«រដ្ឋបាលបច្ចុប្បន្ននេះកំពុងចូលរួមជាមួយក្រុមប្រទេសមួយក្តាប់តូចដែលបោះបង់ចោលអនាគត»។នេះជាការបញ្ជាក់របស់លោក បារ៉ាក់ អូបាម៉ា ក្នុងសេចក្តីថ្លែងការណ៍របស់លោក ក្រោយដូណាល់ ត្រាំប្រកាសបញ្ចប់សមាជិកភាពអាមេរិកក្នុងកិច្ចព្រមព្រៀងអាកាសធាតុក្រុងប៉ារីស។
តាមពិតទៅ រដ្ឋបាលលោក អូបាម៉ា បានចំណាយកម្លាំងនិងពេលវេលាយ៉ាងច្រើនដើម្បីជំរុញឲ្យមានការសម្រេចបាននូវកិច្ចព្រមព្រៀងអាកាសធាតុដែលរួមចំណែកដោះស្រាយបញ្ហាប្រឈមដែលកើតឡើងដោយសារការឡើងកម្តៅផែនដីនេះ។ វាក៏ជាផ្នែកមួយនៃមរតកនយោបាយសំខាន់របស់លោក បារ៉ាក់ អូបាម៉ាដែរ។
ដោយឡែក លោក អូបាម៉ា ជឿជាក់ ប្រទេសដែលអាចរក្សាការគាំទ្រខ្ជាប់ខ្ជួនចំពោះកិច្ចព្រមព្រៀងនេះនឹងទទួលបានផលប្រយោជន៍ច្រើនទាំងការងារផង និងប្រយោជន៍ផ្នែកឧស្សាហកម្មផងដែរ។ លោកលើកឡើងដូច្នេះ៖ «សម្រាប់បណ្តាប្រទេសទាំងឡាយណាដែលបន្តការប្តេជ្ញាចិត្តទទួលយកអនាគត និងគាំទ្រកិច្ចព្រមព្រៀងអាកាសធាតុនេះ វានឹងក្លាយជាទ្វារមួយសម្រាប់ឲ្យអ្នកជំនួញ, អ្នកវិទ្យាសាស្ត្រ និងបណ្តាក្រុមវិស្វករ ចូលរួមស្រាវជ្រាវលើបច្ចេកវិទ្យាទំនើបៗ, ការវិនិយោគដែលបញ្ចេញកាបូនឌីអុកស៊ីលទាប និង ការច្នៃប្រឌិតខ្ពស់ផងដែរ»។
ដូណាល់ ត្រាំ អះអាងថា ការប្រែប្រួលអាកាសធាតុជារឿងបោកប្រាស់ប៉ុណ្ណោះ ដែលវាបង្កើតឡើងដោយចិនដើម្បីទាញប្រយោជន៍ និងធ្វើឲ្យប៉ះពាល់ដល់ឧស្សាហកម្មអាមេរិកផង។ លោកថែមទាំងចោទថា កិច្ចព្រមព្រៀងនេះកម្រិតសិទ្ធិអាមេរិកក្នុងការសាងសង់ឧស្សាហកម្មធ្យូងថ្ម ខណៈដែលអនុញ្ញាតឲ្យចិននិងឥណ្ឌាទាញយកប្រយោជន៍ទៅវិញ។
តាមពិតទៅ ខែធ្នូឆ្នាំ ២០១៥ ប្រទេស ១៩៥ លើពិភពលោកបានឯកភាពគ្នាបង្កើតកិច្ចព្រមព្រៀងអាកាសធាតុក្រុងប៉ារីសឡើង ហើយវាចូលជាធរមានកាលពីខែវិច្ឆិកាឆ្នាំមុន។ កិច្ចព្រមព្រៀងនេះតម្រូវឲ្យប្រទេសទាំងអស់តូចឬធំ មានឬក្រ ចូលរួមទាំងគ្នាកម្រិតការបញ្ចេញឧស្ម័នកាបូនឌីអុកស៊ីតដែលបង្កើនកម្តៅផែនដី។ ក្រោមអំណាចនៃកិច្ចព្រមព្រៀងនេះ សហរដ្ឋអាមេរិកត្រូវកាត់បន្ថយការបញ្ចេញឧស្ម័នកាបូនឌីអុកស៊ីតចន្លោះពី ២៦ ទៅ ២៨ ភាគរយនៃកម្រិតឧស្ម័នដែលបញ្ចេញចោលឆ្នាំ ២០០៥ នោះនៅឆ្នាំ ២០២៥។
ជារួមសហរដ្ឋអាមេរិកមានប្រជាជនប្រហែល ៤ភាគរយប៉ុណ្ណោះនៃប្រជាជនពិភពលោកបច្ចុប្បន្នប៉ុន្តែបើនិយាយពីការបំពុលបរិស្ថានវិញអាមេរិកឈរនៅលំដាប់ប្រទេសដែលបំពុលបរិស្ថានខ្លាំងជាងគេ។ អាមេរិកទទួលខុសត្រូវចំពោះការបញ្ចេញឧស្ម័នកាបូនឌីអុកស៊ីតប្រហែលមួយភាគបីនៃឧស្ម័នកាបូនឌីអុកស៊ីតសរុបលើពិភពលោកទាំងមូលឯណោះ។
Tag:
បារ៉ាក់ អូបាម៉ា
ដូណាល់ ត្រាំ
កិច្ចព្រមព្រៀងប្រែប្រួលអាកាសធាតុក្រុងប៉ារីស
© រក្សាសិទ្ធិដោយ thmeythmey.com