អន្តរជាតិ
ក្រោយការវាយប្រហារនៅក្រុងឡុងដ៍ ប្រមុខការពារជាតិអាមេរិកថា «យើងអត់ខ្លាចទេ» រដ្ឋមន្ត្រីការពារជាតិអាមេរិក James Mattis អមដំណើរដោយសមភាគីអូស្ត្រាលី Marise Payne (រូបភាព Reuters)
× ប្រមុខការពារជាតិអាមេរិក លោក ជេមស៍ ម៉ាធីស បានប្រកាសថា អាមេរិក និងសម្ព័ន្ធមិត្តរបស់ខ្លួន មិនញញើតញញើមនឹងការវាយប្រហារដោយក្រុមជ្រុលនិយមរដ្ឋឥស្លាមឡើយ។ ទាំងអាមេរិក ទាំងសម្ព័ន្ធមិត្ត នឹងបន្តយុទ្ធនាការបោសសម្អាតក្រុមជ្រុលនិយមមួយនេះទាល់តែអស់។ ប្រមុខការពារជាតិអាមេរិក ប្រកាសដូចនេះ បន្ទាប់ពីការវាយប្រហារនៅកណ្ដាលក្រុងឡុងដ៍ ដែលបណ្ដាលឲ្យមនុស្ស៧នាក់ហើយបានស្លាប់ ខណៈក្រុមរដ្ឋឥស្លាមបានប្រកាសនៅពីក្រោយការវាយប្រហារនេះ។
ចក្រភពអង់គ្លេស បានរងការវាយប្រហារភេរវកម្មចំនួនបីលើកហើយក្នុងរយៈពេលបីខែមកនេះ។ ការវាយប្រហារចុងក្រោយ កើតឡើងនៅរាត្រីថ្ងៃទី៣ ខែមិថុនា។ ហេតុការណ៍បើកឡានបំបុកមនុស្សលើស្ពាន និងការប្រើកាំបិតចាក់សម្លាប់នៅទីផ្សារ បានឆក់យកជីវិតមនុស្សមនុស្ស៧នាក់បាត់បង់ក្នុងនោះក៏មានជនជាតិបារាំងម្នាក់ និងជនជាតិកាណាដាម្នាក់ ខណៈមនុស្សជិត៥០នាក់ផ្សេងទៀត បានរងរបួស។
នាយករដ្ឋមន្ត្រីអង់គ្លេស ថេរ៉េសា ម៉េយ៍ បានប្រកាសថា វាគ្រប់គ្រាន់ហើយសម្រាប់ក្រុមភេរវជន ហើយអង់គ្លេសនឹងចាត់វិធានការម៉ឺងម៉ាត់ ដើម្បីឆ្លើយតបនឹងទង្វើជ្រុលនិយមនេះ។ ដោយឡែក អាមេរិក ដែលជាសម្ព័ន្ធមិត្តរបស់អង់គ្លេស និងកំពុងតែដឹកនាំសម្ព័ន្ធមិត្តអន្តរជាតិបោសសម្អាតក្រុមជ្រុលនិយមរដ្ឋឥស្លាម បានលើកឡើងដែរថា អាមេរិក នឹងបន្តការងាររបស់ខ្លួន ដើម្បីកម្ទេចក្រុមភេរវករមួយនេះឲ្យបានស្អាត។
បើតាមទីភ្នាក់ងារព័ត៌មាន Reuters រដ្ឋមន្ត្រីការពារជាតិអាមេរិក ជេមស៍ ម៉ាធីស បាននិយាយក្នុងទីក្រុងស៊ីដនី នៅថ្ងៃទី៥ ខែមិថុនា ថា៖ «អាមេរិក និងសម្ព័ន្ធមិត្ត នឹងនៅតែរួបរួមគ្នាដដែលក្នុងការប្រយុទ្ធប្រឆាំងសត្រូវ ដែលគិតថាអាចបន្លាចយើងបានក៏ដោយ។ យើងមិនខ្លាចអ្វីឡើយ»។ លោក ម៉ាធីស កំពុងស្ថិតនៅអូស្ត្រាលីជាមួយរដ្ឋមន្ត្រីការបរទេស រិច ធីល័រសិន ដើម្បីជួបជាមួយសមភាគីអូស្ត្រាលីរៀងៗខ្លួន។
ដោយឡែកនាយករដ្ឋមន្ត្រីអូស្ត្រាលី ម៉ាល់ខម ធើនប៊ូល (Malcolm Turnbull) វិញ ក៏បានថ្កោលទោសការវាយប្រហារនៅក្រុងឡុងដ៍ដែរ ដោយលោកចាត់ទុកសកម្មភាពនេះជារឿងកំសាក ហើយក៏មិនមែនជារឿងគួរឲ្យសរសើរអ្វីដែរ។ លោកក៏ព្រមានដែរថា ពិភភពលោក អាចនឹងមើលឃើញការវាយប្រហាររបៀបនេះជាច្រើនទៀត ដែលវាតម្រូវឲ្យពិភពលោកទាំងត្រូវតែប្រុងប្រយ័ត្ន និងត្រូវជម្នះបញ្ហានេះឲ្យបានដាច់ខាត។
ក្រុមជ្រុលនិយមរដ្ឋឥស្លាម កំពុងប្រឈមមុខការបាត់បង់ទឹកដីកំពុងត្រួតត្រាទាំងនៅអ៊ីរ៉ាក់ និងនៅស៊ីរី។ នៅឯអ៊ីរ៉ាក់ កងទ័ពអ៊ីរ៉ាក់ ដែលជួយគាំទ្រដោយកម្លាំងទ័ពអាកាសសម្ព័ន្ធមិត្តលោកខាងលិចមានអាមេរិកជាអ្នកដឹកនាំ កំពុងសម្រុកវាយសង្គ្រោះទីក្រុង Mosul ដែលជាមូលដ្ឋារឹងមាំចុងក្រោយរបស់ក្រុមរដ្ឋឥស្លាម។ ចំណែកនៅស៊ីរី ក្រុមជ្រុលនិយមនេះ ក៏បាត់បង់តំបន់ត្រួតត្រាច្រើនដែរ ដ្បិតកងទ័ពឃើដស៊ីរីកំពុងវាយប្រហារខ្លាំងផងដែរ៕
Tag:
អាមេរិក
ជេមស៍ ម៉ាធីស
អង់គ្លេស
ភេរវកម្ម
© រក្សាសិទ្ធិដោយ thmeythmey.com