អន្តរជាតិ
អាល្លឺម៉ង់ ត្រៀមរើទ័ពចេញពីមូលដ្ឋានទ័ពតួកគី ទៅប្រើមូលដ្ឋានទ័ពនៅហ្ស៊កដានីវិញ រដ្ឋមន្រ្តីការពារជាតិអាល្លឺម៉ង់ Ursula von der Leyen (រូបភាព Spiegel)
× រដ្ឋមន្ត្រីការពារជាតិអាល្លឺម៉ង់ លោកស្រី Ursula von der Leyen បាននិយាយថា កងទ័ពអាល្លឺម៉ង់ បានត្រៀមរួចរាល់ហើយដើម្បីប្ដូរមូលដ្ឋានទ័ពនៅតួកគី ទៅប្រើប្រាស់មូលដ្ឋានទ័ពរបស់ហ្ស៊កដានីវិញ។ គម្រោងផ្លាស់ប្ដូរមូលដ្ឋានទ័ពនេះ ធ្វើឡើងក្រោយពេលតួកគីមិនអនុញ្ញាតឲ្យសមាជិកសភាអាល្លឺម៉ង់ចូលសួរសុខក្ខទាហានរបសខ្លួននៅមូលដ្ឋានទ័ពអាកាស Incirlik ដែលជាការឆ្លើយនឹងសកម្មភាពរបស់អាល្លឺម៉ង់ដែលផ្ដល់សិទ្ធិជ្រកកោនឲ្យជនសង្ស័យជាប់ពាក់ព័ន្ធក្នុងរដ្ឋប្រហារនៅតួកគីកាលពីខែកក្កដា ឆ្នាំ២០១៦ ។
បញ្ហាក្នុងទំនាក់ទំនងរវាងអាល្លឺម៉ង់ និងតួកគី ដែលជាសមាជិកសម្ព័ន្ធយោធាណាតូដូចគ្នា កាន់តែរីកធំ ក្រោយអាល្លឺម៉ង់បដិសេធធ្វើបត្យាប័នជនសង្ស័យជាប់ទាក់ទងក្នុងរដ្ឋប្រហារនៅតួកគី ទៅឲ្យរដ្ឋាភិបាលតួកគីវិញ។ តួកគី មិនសប្បាយចិត្តនឹងទង្វើរបស់អាល្លឺម៉ង់ឡើយ ហើយក៏បានបិទផ្លូវមិនឲ្យសមាជិកសភាអាល្លឺម៉ង់ ចូលទៅកាន់មូលដ្ឋានទ័ពអាកាស Incirlik ជាទីដែលកងទ័ពអាល្លឺម៉ង់ និងយន្តហោះមួយចំនួនទៀតកំពុងចូលរួមប្រតិបត្តិការបោសសម្អាតក្រុមរដ្ឋឥស្លាមនៅស៊ីរី និងអ៊ីរ៉ាក់។
ក្រោយមានបញ្ហានេះ អាល្លឺម៉ង់ ក៏ចាប់ផ្ដើមរកមើលមូលដ្ឋានកងទ័ពថ្មីនៅក្នុងរដ្ឋនៅមជ្ឈិមបូព៌ា ដើម្បីប្រើប្រាស់ជំនួសមូលដ្ឋានទ័ពអាកាសរបស់តួកគី ហើយជាមួយគ្នានេះ អាល្លឺម៉ង់ និងតួកគី ក៏បានចរចាគ្នាដោះស្រាយការខ្វែងគំនិតដែរ។ ប៉ុន្តែក្រោយពីជំនួបមិនបានផលរវាងរដ្ឋមន្ត្រីការបរទេសតួកគី និងសមភាគីអាល្លឺម៉ង់មកនោះ អាល្លឺម៉ង់ ក៏ទំនងជាបានរកឃើញទីតាំងថ្មីធ្វើជាមូលដ្ឋានសម្រាប់កងទ័ពរបស់ខ្លួនដែរ។
រដ្ឋមន្ត្រីការពារអាល្លឺម៉ង់ លោកស្រី Ursula von der Leyen បាននិយាយនៅថ្ងៃទី៥ ខែមិថុនាថា អាល្លឺម៉ង់ នឹងសម្រេចចិត្តនៅពេលឆាប់នេះក្នុងការប្ដូរទៅប្រើប្រាស់មូលដ្ឋាន Al-Azrak របស់ហ្ស៊កដានី ជំនួសមូលដ្ឋានរបស់តួកគី។ ទន្ទឹមនេះដែរ កងទ័ពអាល្លឺម៉ង់ ត្រៀមរួចហើយក្នុងការផ្ទេរទៅកាន់មូលដ្ឋាននៅហ្ស៊កដានី។ បើតាមសារព័ត៌មាន RT លោកស្រី von der Leyen បញ្ជាក់ដែរថា គណៈរដ្ឋមន្ត្រីអាល្លឺម៉ង់ នឹងសម្រេចថាផ្ទេរ ឬមិនផ្ទេរនៅថ្ងៃស្អែក។
ទាក់ទិនរឿងមូលដ្ឋាននៅតួកគី ប្រមុខការពារជាតិអាល្លឺម៉ង់ក៏បានចាត់ទុកបន្ទាយទ័ព Incirlik ជាទីតាំងល្អក្នុងការប្រយុទ្ធប្រឆាំងក្រុមភេរវករដែរ ព្រោះនៅក្បែរស៊ីរី និងអ៊ីរ៉ាក់ស្រាប់។ ប៉ុន្តែការបិទមិនឲ្យមានដំណើរទស្សនកិច្ចរបស់សមាជិកសភាអាល្លឺម៉ង់ គឺជារឿងដែលក្រុងបែរឡាំងមិនអាចទទួលបានឡើយ ហើយអាល្លឺម៉ង់សុខចិត្តបោះបង់មូលដ្ឋាន ហើយដើររកមូលដ្ឋានថ្មីវិញ។ អាល្លឺម៉ង់មានទ័ព២៥០នាក់នៅតួកគី រួមគ្នាជាមួយយន្តហោះឈ្លបការណ៍ និងយន្តហោះចាក់សាំងមួយចំនួនទៀត។
ច្បាស់ណាស់ថា ការរើបន្ទាយទ័ពអាល្លឺម៉ង់នៅពេលនេះ ប្រាកដជាប៉ះពាល់ដល់ប្រតិបត្តិការបោសសម្អាតក្រុមជ្រុលនិយមរដ្ឋឥស្លាមមិនខាន ព្រោះកងកម្លាំងអាល្លឺម៉ង់ដើរតួនាំមុខគេក្នុងសម្ព័ន្ធយោធានេះ។ ប៉ុន្តែរដ្ឋមន្ត្រីការពារអាល្លឺម៉ង់ von der Leyen ក៏បានធានាដែរថា អាល្លឺម៉ង់នឹងព្យាយាមកាត់បន្ថយការរអាក់រអួលឲ្យបានឆាប់បំផុត៕
Tag:
អាល្លឺម៉ង់
តួកគី
ហ្ស៊កដានី
ក្រុមរដ្ឋឥស្លាម
© រក្សាសិទ្ធិដោយ thmeythmey.com