ចាន់ វឌ្ឍនាកា សង្ឃឹមអ្នកគាំទ្រមិនបង្កអំពើហិង្សាផ្សេងៗពេលមកគាំទ្របាល់ទាត់នៅថ្ងៃស្អែក

កីឡាជាតិ

ជាតិ

ចាន់ វឌ្ឍនាកា សង្ឃឹមអ្នកគាំទ្រមិនបង្កអំពើហិង្សាផ្សេងៗពេលមកគាំទ្របាល់ទាត់នៅថ្ងៃស្អែក

07, Jun 2017 , 1:52 pm

រូបភាព

ដោយ:

ខ្សែប្រយុទ្ធវ័យក្មេងដ៏មានប្រជាប្រិយភាពរបស់កម្ពុជា ចាន់ វឌ្ឍនាកា បានផ្ញើសារដល់អ្នកគាំទ្រកុំឲ្យបង្កអំពើមិនគប្បីក្នុងអំឡុងពេលមកគាំទ្រការប្រកួតមិត្តភាពអន្តរជាតិរវាងក្រុមជម្រើសជាតិកម្ពុជា និងក្រុមឥណ្ឌូនេស៊ីនាល្ងាចថ្ងៃទី៨ ខែមិថុនា នៅពហុកីឡដ្ឋានជាតិ។ វឌ្ឍនាកា រំពឹងមានការចូលរួមច្រើនពីអ្នកគាំទ្រក្នុងជំនួបដ៏ជក់ចិត្តមួយនេះ។

ខ្សែប្រយុទ្ធវ័យក្មេងរបស់ក្លិបក្របខណ្ឌលីកលំដាប់ទី៣ Fujieda MYFC របស់ជប៉ុន ចាន់ វឌ្ឍនាកា រពឹងថា នឹងមានអំពើហិង្សាផ្សេងៗកើតចេញពីអ្នកគាំទ្រដែលបង្កឲ្យមានការប៉ះដល់ការប្រកួត និងកិត្តិយសរបស់ប្រទេសកម្ពុជាក្នុងជំនួបមិត្តភាពអន្តរជាតិរវាងក្រុមជម្រើសជាតិកម្ពុជា និងឥណ្ឌូនេស៊ី នាវេលាម៉ោង៦:៣០នាទីល្ងាចថ្ងៃទី៨ ខែមិថុនា នៅពហុកីឡដ្ឋានជាតិ។

ក្នុងសនិ្នសីទសារព័ត៌មានមុនការប្រកួត ខ្សែប្រយុទ្ធរូបនេះបានផ្ញើសារដល់អ្នកគាំទ្រយ៉ាងដូច្នេះថា៖«សម្រាប់សារពួកខ្ញុំ គឺសង្ឃឹមថាពួកគាត់ចូលរួមមើលការប្រកួតឲ្យច្រើនកុះករ ហើយនឹងមិនឲ្យមានកើតឡើងនូវអ្វីដែលជាការប្រហិង្សាដូចរាល់ដង ដែលខ្ញុំបានឃើញតាមរយៈវីដេអូ។ ខ្ញុំសង្ឃឹមថា ពួកគាត់នឹងមកសប្បាយរីករាយជាមួយការគាំទ្របាល់ទាត់នៅថ្ងៃស្អែក»។

ទោះបី វឌ្ឍនាកា មិនសូវបានបង្ហាញសមត្ថភាពនៅលើទីលានជាមួយក្រុម Fujieda MYFC នៅលើទឹកដីជប៉ុន ក៏ដោយ ប៉ុន្តែខ្សែប្រយុទ្ធដ៏មានប្រជាប្រិយរបស់កម្ពុជារូបនេះរំពឹងថា កម្ពុជានឹងធ្វើបានល្អក្នុងជំនួបដ៏ជក់ចិត្តមួយនេះ ជាមួយទម្រង់លេងយ៉ាងស៊ីសង្វាក់ជាមួយក្រុមដែលមានការផ្លាស់ប្តូរសមាសភាពច្រើនមួយនេះ៕