ពូទីន៖ អាមេរិកជាអ្នកចិញ្ចឹមអាល់កៃដានៅអាហ្វហ្គានីស្ថាន និងគាំទ្រភេរវករនៅឆេឆិន

អន្តរជាតិ

ពូទីន៖ អាមេរិកជាអ្នកចិញ្ចឹមអាល់កៃដានៅអាហ្វហ្គានីស្ថាន និងគាំទ្រភេរវករនៅឆេឆិន

13, Jun 2017 , 8:39 pm

រូបភាព

ប្រធានាធិបតីរុស្ស៊ី វ្ល៉ាឌីមៀ ពូទីន ក្នុងកិច្ចសម្ភាសជាមួយផលិតករភាពយន្តអាមេរិក Oliver Stone (រូបភាព RT)

ដោយ: តន ចាន់រិទ្ធារ៉ា

ប្រធានាធិបតីរុស្ស៊ី វ្ល៉ាឌីមៀ ពូទីន បានចោទអាមេរិកថាបានបង្កើត និងប្រើប្រាស់ក្រុមជ្រុលនិយមអាល់កៃដា ដើម្បីធ្វើជាឧបករណ៍ប្រឆាំងវត្តមានកងទ័ពសូវៀតនៅអាហ្វហ្គានីស្ថាន។ លោក ពូទីន បញ្ជាក់ថា CIA របស់អាមេរិកបានចិញ្ចឹមក្រុមជ្រុលនិយមមួយនេះ និងមេដឹកនាំរបស់ពួកគេ អូសាម៉ា ប៊ិនឡាដិន ដោយមិនបានគិតឲ្យម៉ត់ចត់ថាពួកគេនឹងបែរក្បាលដាក់អាមេរិកវិញឡើយ។ ក្រៅពីក្រុមអាល់កៃដា លោក ពូទីន ក៏ចោទអាមេរិកបានគាំទ្រក្រុមភេរវករនៅតំបន់ឆេឆិនផងដែរ។

អាមេរិកគួរតែទទួលខុសត្រូវចំពោះការងើបឡើងរបស់ក្រុមជ្រុលនិយមអាល់កៃដា និងមេខ្លោងភេរវករ អូសាម៉ា ប៊ិនឡាដិន ដែលអាមេរិកផ្ទាល់ជាអ្នកផ្ចុងផ្ដើមពួកគេឲ្យប្រឆាំងទ័ពសូវៀតនៅអាហ្វហ្គានីស្ថាន។ នេះជាសម្ដីរបស់ប្រធានាធិបតីរុស្ស៊ី វ្ល៉ាឌីមៀ ពូទីន ក្នុងកិច្ចសម្ភាសដ៏វែងជាមួយផលិតករភាពយន្តអាមេរិក Oliver Stone ។ លោក ពូទីន និយាយទៀតថា លោកក៏មានភស្តុតាងបញ្ជាក់ពីការគាំទ្ររបស់អាមេរិកលើក្រុមជ្រុលនិយមនៅតំបន់កូកាសដែរ។

ក្នុងកិច្ចសម្ភាសវគ្គដំបូងដែលផ្សាយនៅថ្ងៃទី១២ ខែមិថុនា ប្រធានាធិបតីរុស្ស៊ី បានទម្លាយពីប្រភពរបស់ក្រុមភេរវករអាល់កៃដាដែលអុកឡុកពិភពលោកយ៉ាងខ្លាំងនាពេលកន្លងមក។ លោក ពូទីន បញ្ជាក់ច្បាស់ៗថា អាល់កៃដាកើតចេញពីទង្វើរបស់អាមេរិក មិនមែនរុស្ស៊ីទេ ហើយក្រុមនេះកើតចេញជារូបរាងក្នុងសម័យសង្គ្រាមនៅអាហ្វហ្គានីស្ថាន ដែលពេលនោះអាមេរិកគាំទ្រក្រុមជ្រុលនិយមជាច្រើនក្រុមដើម្បីប្រឆាំងកងទ័ពសូវៀត។

លោក ពូទីន បានប្រាប់ផលិតករអាមេរិក Stone ថា អាមេរិកផ្ទាល់ជាអ្នកចិញ្ចឹមក្រុមអាល់កៃដា និងលោក ប៊ិនឡាដិន តែម្ដង។ យ៉ាងណាក្ដី ដោយចង់សំដៅដល់ការវាយប្រហារអាគារភ្លោះថ្ងៃទី១១ ខែកញ្ញា ដែលជាស្នាដៃក្រុមមអាល់កៃដា ប្រធានាធិបតីរុស្ស៊ីក៏ឆ្ងល់ដែរថាអាមេរិកគួរតែគិតមុនដឹងពីផលវិបាកនៃការគាំទ្រក្រុមនេះ ព្រោះពួកគេនឹងវាយបកអាមេរិកមិនខាន។ លោកសង្កត់ធ្ងន់ថា អាមេរិកគួរតែបានដឹងរឿងច្បាស់ណាស់ តែអ្វីគ្រប់យ៉ាងជាកំហុសអាមេរិកខ្លួនឯង។

បើតាមសារព័ត៌មាន RT ប្រធានាធិបតីរុស្ស៊ី ក៏ចង្អុលមុខអាមេរិកជុំវិញការងើបឡើងរបស់ក្រុមភេរវករនៅតំបន់ឆេឆិន (Chechnya) ផងដែរ។ បើតាមសម្ដីលោក ពូទីន រុស្ស៊ីមានភស្តុតាងបញ្ជាក់ថាភ្នាក់ងារ CIA ពិតជាបានសារភាពគាំទ្រក្រុមភេរវករមែន ដោយចាត់ទុកពួកគេជាក្រុមប្រឆាំងទៀតផង។ ពោល គឺអាមេរិកចេញមុខគាំទ្រក្រុមភេរវករទាំងផ្នែកនយោបាយ ក៏ដូចជាបានផ្គត់ផ្គង់ហិរញ្ញវត្ថុទៅទៀត ហើយរុស្ស៊ីក៏បានផ្ញើភស្តុតាងទៅឲ្យអាមេរិករួចអស់ដែរ។

យ៉ាងណាមិញ អាមេរិក មិនបានផ្លាស់ប្ដូរនយោបាយរបស់ពួកគេក្នុងការគាំទ្រក្រុមភេរវករទាំងនោះ ទោះជាលោក ពូទីន ធ្លាប់ប្រាប់រឿងនេះដល់អតីតប្រធានាធិបតីអាមេរិក ចច ដាប់ប៊លយូ ប៊ូស ហើយលោក ប៊ូស ផ្ទាល់ក៏សន្យាថានឹងដោះស្រាយបញ្ហានេះក៏ដោយចុះ។ CIA របស់អាមេរិក ក៏បានផ្ញើសំបុត្រមួយឲ្យរុស្ស៊ី ដោយបានប្រាប់ថា អាមេរិករក្សាសិទ្ធិគាំទ្រក្រុមប្រឆាំងទាំងអស់ ហើយអាមេរិកនឹងបន្តការគាំទ្រនេះទៀត៕