អន្តរជាតិ
អាមេរិក គំរាមឈប់ធ្វើជំនួញជាមួយប្រទេសដែលរកស៊ីជាមួយកូរ៉េខាងជើង រដ្ឋមន្ត្រីការបរទេសអាមេរិក រិច ធីល័រសិន (រូបភាព Reuters)
× រដ្ឋមន្ត្រីការបរទេស រិច ធីល័រសិន (Rex Tillerson) បានប្រាប់សមាជិកព្រឹទ្ធសភាអាមេរិកថា អាមេរិកកំពុងពិចារណាដាក់ទណ្ឌកម្មលើប្រទេសដែលមិនជួយដាក់ទណ្ឌកម្មលើកូរ៉េខាងជើង តែបន្តរកស៊ីជាមួយរដ្ឋកុម្មុយនីស្តនេះទៀត។ លោក ធីល័រសិន និយាយថា អាមេរិក ដែលគ្មានការរកស៊ីជាមួយកូរ៉េខាងជើងបន្តិចសោះ មិនអាចដាក់សម្ពាធដោយផ្ទាល់បានឡើយ ហើយត្រូវពឹងផ្អែកលើប្រទេសទីបីក្នុងការដាក់ទណ្ឌកម្មបង្ខំឲ្យកូរ៉េខាងជើងបោះបង់មហិច្ឆតានុយក្លេអ៊ែរ។
ទណ្ឌកម្មបន្តបន្ទាប់របស់សហគមន៍អន្តរជាតិដែលដឹកមុខដោយអាមេរិក ធ្វើឲ្យកូរ៉េខាងជើងរងផលប៉ះពាល់ខ្លាំង តែរដ្ឋឯកោមួយនេះនៅតែអាចមានច្រកដកដង្ហើមសេដ្ឋកិច្ចរបស់ខ្លួនដដែល។ កូរ៉េខាងជើងនៅតែអាចបន្តនាំចូលផលិតផលចាំបាច់ដូចជាប្រេងឥន្ធនៈជាដើម ព្រោះគេឃើញមានប្រទេសមួយចំនួនបន្តធ្វើជំនួញជាមួយកូរ៉េខាងជើងដដែល បើទោះជាមានការហាមឃាត់ដោយសេចក្ដីសម្រេចក្រុមប្រឹក្សាសន្តិសុខក្ដី។
ដោយហេតុថាមានប្រទេសខ្លះមិនរវីរវល់នឹងទណ្ឌកម្មសេដ្ឋកិច្ចនោះ អាមេរិកកំពុងរកមធ្យោបាយថ្មីទៀតក្នុងការបិទទ្វារសេដ្ឋកិច្ចកូរ៉េខាងជើងទាំងស្រុងតែម្ដង។ បើតាមទីភ្នាក់ងារព័ត៌មាន Reuters រដ្ឋមន្ត្រីការបរទេសអាមេរិក រិច ធីល័រសិន និយាយក្នុងកិច្ចប្រជុំជាមួយគណៈកម្មាធិការកិច្ចការបរទេសព្រឹទ្ធសភានៅថ្ងៃទី១៣ ខែមិថុនា ថា អាមេរិកនឹងបង្កើនសម្ពាធនយោបាយ និងសេដ្ឋកិច្ចលើកូរ៉េខាងជើង ដោយសហការជាមួយសម្ព័ន្ធមិត្តទាំងឡាយរបស់ខ្លួន។
បើតាមលោក ធីល័រសិន ក្រុងវ៉ាស៊ីនតោន នឹងធ្វើការនេះជាមួយប្រទេសផ្សេងទៀតដើម្បីបិទផ្លូវរបស់ក្រុងព្យុងយ៉ាងក្នុងការនាំចូលទំនិញសំខាន់ៗដូចជាប្រេងឥន្ធនៈជាដើម។ ជាមួយគ្នានោះ ក្រុងវ៉ាស៊ីនតោន ក៏កំពុងពិចារណាឈប់រកស៊ី ឬក៏ដាក់ទណ្ឌកម្មលើប្រទេសដែរធ្វើជំនួញជាមួយរបបក្រុងព្យុងយ៉ាងដូចគ្នាដែរ។ បច្ចុប្បន្ននេះ ដៃគូពាណិជ្ជកម្មធំជាងគេរបស់កូរ៉េខាងជើង គឺចិន ដែលអាមេរិកកំពុងត្រូវការដើម្បីដាក់បន្ទុកលើកូរ៉េខាងជើងវិញ។
ច្បាស់ណាស់ថា បើអាមេរិកចង់ធ្វើអ្វីលើកូរ៉េខាងជើង អាមេរិកត្រូវការចិនជាចាំបាច់បំផុតក្នុងកាលៈទេសៈណាក៏ដោយ។ ដោយសារកូរ៉េខាងជើងចេះតែបន្តសកម្មភាពព្រហើនម្ដងហើយម្ដងទៀត អាមេរិកក៏ព្យាយាមបញ្ចុះបញ្ចូលចិនឲ្យជួយដាក់សម្ពាធលើកូរ៉េខាងជើង ហើយចិនក៏បានចាត់វិធានការខ្លះវិញដែរដូចជាការបិទនាំចូលធ្យូងថ្មជាដើម។ ប៉ុន្តែសម្រាប់អាមេរិក ការបិទការនាំចូលធ្យូងថ្មប៉ុណ្ណេះ មិនគ្រប់គ្រាន់ទេ។
មួយវិញទៀតនោះ អាមេរិក ត្រូវការប្រទេសទីបីក្នុងការដាក់សម្ពាធលើកូរ៉េខាងជើងដែរ ដ្បិតអាមេរិកគ្មានទំនាក់ទំនងសេដ្ឋកិច្ចជាមួយកូរ៉េខាងជើងឡើយ។ នេះមានន័យថា បើប្រទេសទីបីបន្តរកស៊ីជាមួយកូរ៉េខាងជើងនោះ ទណ្ឌកម្មដែលសម្រេចបានដោយលំបាកនៅឯកិច្ចប្រជុំក្រុមប្រឹក្សាសន្តិសុខ នឹងមិនអាចបង្ខំឲ្យកូរ៉េខាងជើងបញ្ឈប់កម្មវិធីនុយក្លេអ៊ែរបានឡើយ។ ចុងក្រោយនោះ អាមេរិកនឹងបង្វែររ៉ាដារបស់ខ្លួនដាក់ប្រទេសណាដែលធ្វើជំនួញជាមួយកូរ៉េខាងជើងវិញ៕
Tag:
អាមេរិក
កូរ៉េខាងជើង
នុយក្លេអ៊ែរ
រិច ធីល័រសិន
© រក្សាសិទ្ធិដោយ thmeythmey.com