អន្តរជាតិ
ប្រធានាធិបតីបារាំង ម៉ាក្រុង ថា ទ្វារអឺរ៉ុបនៅតែចំហចាំអង់គ្លេស ប្រធានាធិបតីបារាំង អេម៉ានុយអែល ម៉ាក្រុង ក្នុងសន្និសីទកាសែតជាមួយនាយករដ្ឋមន្ត្រីអង់គ្លេស ថេរ៉េសា ម៉េយ៍ (រូបភាព AFP)
× ប្រធានាធិបតីបារាំង អេម៉ានុយអែល ម៉ាក្រុង បានប្រាប់នាយករដ្ឋមន្ត្រីអង់គ្លេស ថេរ៉េសា ម៉េយ៍ ថា ទ្វារអឺរ៉ុបនៅតែចំហសម្រាប់អង់គ្លេស ដរាបណាចរចាចាកចេញមិនទាន់បញ្ចប់ទេ។ លោក ម៉ាក្រុង ក៏បញ្ជាក់ដែរថា លោកគោរពការសម្រេចចិត្តរបស់ប្រជាជនអង់គ្លេសដែលចង់ចាកចេញពីអឺរ៉ុប ប៉ុន្តែបើការចរចាចាប់ផ្ដើមហើយនោះ ការត្រឡប់វិលវិញក៏ជារឿងលំបាកដែរ។ ក្នុងជំនួបថ្ងៃទី១៣ ខែមិថុនា នៅទីក្រុងប៉ារីស លោកស្រី ម៉េយ៍ ឆ្លើយវិញថា ការចរចាចាកចេញ នឹងធ្វើឡើងតាមគ្រោងទុក។
នាយករដ្ឋមន្ត្រីអង់គ្លេស ថេរ៉េសា ម៉េយ៍ បានទៅជួបប្រធានាធិបតីបារាំង អេម៉ានុយអែល ម៉ាក្រុង ដល់រដ្ឋធានីប៉ារីស។ ទស្សនកិច្ចរបស់លោកស្រី ម៉េយ៍ ធ្វើឡើងតែប៉ុន្មានថ្ងៃក្រោយអង់គ្លេស និងបារាំងទើបរៀបចំការបោះឆ្នោតសភាដូចគ្នា ហើយទទួលជ័យជម្នះដូចគ្នា។ ចំណុចខុសប្លែកគ្នា គឺបក្សអភិរក្សរបស់លោកស្រី ម៉េយ៍ មិនទទួលបានសំឡេងភាគច្រើនក្នុងសភាឡើយ តែបក្សលោក ម៉ាក្រុង អាចដណ្ដើមបានអាសនៈច្រើនក្នុងសភា។
សំណុំរឿងចរចាលែងលះរវាងសហភាពអឺរ៉ុប និងចក្រភពអង់គ្លេស នៅតែជាប្រធានបទសំខាន់ក្នុងជំនួបរវាងមេដឹកនាំទាំងពីរ។ អ្វីគួរឲ្យចាប់អារម្មណ៍នោះ ប្រធានាធិបតីបារាំងកំពុងមានប្រជាប្រិយភាពខ្ពស់ លោក ម៉ាក្រុង បានបង្ហាញជំហរចង់ឲ្យអង់គ្លេសបន្តជាសមាជិកសហភាពអឺរ៉ុបទៀត ប៉ុន្តែលោកក៏ប្រាប់ឲ្យអង់គ្លេសត្រូវសម្រេចចិត្តឲ្យច្បាស់មុនការចរចាលែងលះត្រូវបានបញ្ចប់ ដើម្បីកុំឲ្យលំបាកនៅថ្ងៃក្រោយ។
ក្នុងសន្និសីទកាសែតនៅវិមាន Elysee លោក ម៉ាក្រុង និយាយច្បាស់ៗត្រង់ៗថា ទ្វារអឺរ៉ុបនៅតែបើកចំហរសម្រាប់អង់គ្លេសដដែល បើអង់គ្លេសចង់វិលវិញបន្តជាសមាជិកសហភាពអឺរ៉ុប។ ដោយមានលោកស្រីនាយករដ្ឋមន្ត្រី ម៉េយ៍ ឈរក្បែរ ប្រធានាធិបតីថ្មីថ្មោងរូបនេះ បន្តទៀតថា ក្នុងករណីដំណើរការលែងលះមិនទាន់ចប់ទេនោះ លទ្ធភាពនៃការត្រឡប់ក្រោយនៅតែមាន ប៉ុន្តែវានឹងមិនងាយស្រួលឡើយ។
យ៉ាងណាក្ដី បំណងរបស់ប្រធានាធិបតីបារាំង ហាក់មិនត្រូវបានទទួលយកដោយនាយករដ្ឋមន្ត្រីអង់គ្លេសឡើយ។ បើតាមទីភ្នាក់ងារព័ត៌មាន AFP ក្នុងសន្និសីទរួមគ្នាខាងលើ លោកស្រី ម៉េយ៍ បានសង្កត់ធ្ងន់ពីជំហររបស់អង់គ្លេសក្នុងការអនុវត្តតាមកាលបរិច្ឆេទដែលកំណត់បានពេលវេលាចរចាលែងលះគ្នានេះ។ បើតាមគម្រោង ក្រុងឡុងដ៍ និងក្រុងព្រុចសែល នឹងចាប់ផ្ដើមការចរចានៅសប្ដាហ៍ក្រោយ ហើយភាគីទាំងពីរមានរយៈពេលពីរឆ្នាំដើម្បីសម្រេចឲ្យបានលក្ខខណ្ឌលែងលះសមស្រប។
រឿងគួរឲ្យកត់សម្គាល់នោះ លោកស្រី ម៉េយ៍ ទើបរងបរាជ័យក្នុងការប្រមូលអំណាចដើម្បីចរចាលែងលះនេះ។ លទ្ធផលបោះឆ្នោតថ្ងៃទី៨ ខែមិថុនា បង្ហាញពីការធ្លាក់ចុះប្រជាប្រិយភាពរបស់ក្រុមអភិរក្ស ដែលមិនអាចប្រមូលសំឡេងភាគច្រើនក្នុងសភាបាន។ ដោយគ្មានសំឡេងគ្រប់គ្រាន់ លោកស្រី ម៉េយ៍ ត្រូវបបង្ខំចិត្តចងសម្ព័ន្ធភាពជាមួយបក្សតូចមួយដើម្បីបង្គ្រប់សំឡេងក្នុងការបង្កើតរដ្ឋាភិបាលចម្រុះមួយ។ កាន់តែសំខាន់ រឿងនេះ ក៏នឹងប៉ះពាល់ដល់ដំណើរការចរចាជាមួយអឺរ៉ុបផងដែរ៕
Tag:
អឺរ៉ុប
បារាំង
អង់គ្លេស
អេម៉ានុយអែល ម៉ាក្រុង
ថេរ៉េសា ម៉េយ៍
© រក្សាសិទ្ធិដោយ thmeythmey.com