អន្តរជាតិ
យោធាកូរ៉េខាងត្បូងធ្វើសមយុទ្ធការពារកោះ Dokdo ដែលមានជម្លោះជាមួយជប៉ុន កោះ Dokdo ឬកោះ Takeshima ដែលកំពុងគ្រប់គ្រងដោយកូរ៉េខាងត្បូង និងទាមទារដោយជប៉ុន (រូបភាព Xinhua)
× យោធាជើងទឹកកូរ៉េខាងត្បូង បានប្រកាសពីគម្រោងធ្វើសមយុទ្ធមួយនៅកោះ Dokdo ដែលមានទីតាំងនៅភាគខាងកើតបំផុត និងជាកោះកំពុងទាមទារដោយជប៉ុន។ សមយុទ្ធការពារនេះ ចាប់ផ្ដើមថ្ងៃទី១៥ ខែមិថុនា ដោយមានការចូលរួមពីនាវាចម្បាំងជាច្រើនគ្រឿងមកពីកងទ័ពជើងទឹកកូរ៉េខាងត្បូង។ កោះ Dokdo នេះ គឺជាឧបសគ្គដ៏ធំមួយដែលរារាំងដល់ការកសាងទំនាក់ទំនងល្អប្រសើររវាងកូរ៉េខាងត្បូង និងជប៉ុន។
ជាលើកទីមួយនៃរដ្ឋបាលប្រធានាធិបតី មូន ចេអ៊ីន កងទ័ពកូរ៉េខាងត្បូង នឹងធ្វើសមយុទ្ធមួយដោយចាប់ផ្ដើមនៅថ្ងៃនេះ។ កងទ័ពជើងទឹកកូរ៉េខាងត្បូងប្រកាសថា ខ្លួននឹងធ្វើសមយុទ្ធរយៈពេលពីរថ្ងៃ ដែលសំដៅការពារកោះ Dokdo ដែលកំពុងមានជម្លោះជាមួយជប៉ុន។ នេះ គឺជាសមយុទ្ធការពារប្រចាំឆ្នាំ ដែលចាប់ផ្ដើមតាំងពីឆ្នាំ១៩៨៦ មក ហើយសមយុទ្ធនេះ តែងធ្វើឡើងពីរដងក្នុងមួយឆ្នាំដើម្បីការពារកោះ Dokdo ។
បើតាមទីភ្នាក់ងារព័ត៌មាន Yonhap កងទ័ពជើងទឹកកូរ៉េខាងត្បូង ចាត់ទុកសមយុទ្ធនេះជាការប្រុងប្រៀបការពារអធិបតេយ្យរបស់ខ្លួនពីការគំរាមកំហែងខាងក្រៅ។ បើទោះជាមិននិយាយចំក៏ដោយ គេយល់ច្បាស់ណាស់ថា ការគំរាមកំហែងខាងក្រៅ គឺសំដៅជប៉ុនតែម្ដង។ ក្រុងតូក្យូ បានទាមទារកម្មសិទ្ធិគ្រប់គ្រងកោះ Dokdo ដែលស្ថិតក្នុងសមុទ្រខាងកើត ហើយដែលបច្ចុប្បន្នកំពុងស្ថិតក្រោមការគ្រប់គ្រងរបស់ក្រុងសេអ៊ូល។
នៅក្នុងសមយុទ្ធលើកនេះ កងទ័ពជើងទឹកកូរ៉េខាងត្បូង បានបញ្ជូននាវាពិឃាតមួយគ្រឿងមានទម្ងន់ ៣២០០តោន កប៉ាល់៦គ្រឿង។ ក្រៅពីកប៉ាល់ទាំង៧គ្រឿង យោធាកូរ៉េខាងត្បូងក៏ពង្រាយយន្តហោះ៤គ្រឿងផ្សេងទៀតដែរ ក្នុងនោះក៏មានយន្តហោះចម្បាំងធុន F-15K មួយគ្រឿង និងយន្តហោះល្បាត P-3C Orion មួយគ្រឿដែរ។ មន្ត្រីជើងទឹកកូរ៉េខាងត្បូងនិយាយថា សមយុទ្ធលើកនេះ គឺមិនខុសពីលំហាត់លើកមុនដែរ។
ដោយឡែកជប៉ុនឯណោះ ក៏មិនសប្បាយចិត្តអ្វីឡើយ ពេលកូរ៉េខាងត្បូងធ្វើសមយុទ្ធការពារកោះដែលខ្លួនទាមទារនោះ។ ជប៉ុនបានប្រឆាំងផែនការរៀបចំសមយុទ្ធនេះជាយូរមកហើយ។ អំឡុងខែមីនា រដ្ឋមន្ត្រីការបរទេសជប៉ុន ហ្វ៊ូមីអូ គីស៊ីដា (Fumio Kishida) បាននិយាយជាចំហថា ជប៉ុនមិនអាចទទួលយកសមយុទ្ធបែបនេះឡើយ ហើយជប៉ុនពិតជាសោកស្ដាយណាស់ ព្រោះជប៉ុនជាអ្នកទាមទារកម្មសិទ្ធិកោះ Dokdo ដែរ។
កោះ Dokdo ជាឈ្មោះហៅតាមភាសាកូរ៉េ ឯជប៉ុនវិញហៅកោះនេះថា Takeshima ។ ប្រទេសទាំងពីរសុទ្ធមានអំណះអំណាងរៀងៗខ្លួនដើម្បីទាមទារកម្មសិទ្ធិ ប៉ុន្តែកងឆ្នាំការពារឆ្នេរកូរ៉េខាងត្បូងចូលគ្រប់គ្រងកោះនេះតាំងពីឆ្នាំ១៩៥៤ ។ កូរ៉េខាងត្បូងលើកឡើងថាជប៉ុនទទួលស្គាល់នេះជាទឹកដីកូរ៉េខាងត្បូងតាំងពីឆ្នាំ១៦៩៦ មកម្ល៉េះ ឯជប៉ុនវិញបានត្រឹមចោទកូរ៉េខាងត្បូងថា កំពុងគ្រប់គ្រងទឹកដីរបស់ខ្លួនដោយខុសច្បាប់ប៉ុណ្ណោះ៕
Tag:
កូរ៉េខាងត្បូង
ជប៉ុន
© រក្សាសិទ្ធិដោយ thmeythmey.com