អន្តរជាតិ
លោក ពូទីន ទុកឲ្យប្រជាជនរុស្ស៊ីសម្រេចចិត្តថានរណាជាប្រធានាធិបតី ប្រធានាធិបតីរុស្ស៊ី វ្ល៉ាឌីមៀ ពូទីន ក្នុងកម្មវិធីឆ្លើយសំណួរប្រចាំឆ្នាំ (រូបភាពគេហទំព័រប្រធានាធិបតីរុស្ស៊ី)
× តើលោកនឹងឈរឈ្មោះក្នុងការបោះឆ្នោតប្រធានាធិបតី ឬទេនៅឆ្នាំក្រោយ? នេះជាសំណួរចាក់ដោតមួយក្នុងចំណោមសំណួរជាច្រើនដែលសួរទៅកាន់ប្រធានាធិបតីរុស្ស៊ី វ្ល៉ាឌីមៀ ពូទីន ពីសំណាក់ប្រជាជនរុស្ស៊ីនាឱកាសកម្មវិធីសំណួរនិងចម្លើយប្រចាំឆ្នាំនៅថ្ងៃទី១៥ ខែមិថុនា។ លោក ពូទីន មិនបានឆ្លើយចំសំណួរទេ តែឆ្លើយពង្វាងថាប្រជាជនរុស្ស៊ីនឹងសម្រេចចិត្តថានរណាជាប្រធានាធិបតី។ នាឱកាសនោះ លោកក៏បានឆ្លើយសំណួរច្រើនទៀតទាក់ទងបញ្ហាក្នុងស្រុក នយោបាយការបរទេស និងបញ្ហាទាក់ទងគ្រួសាររបស់លោកផងដែរ។
ប្រធានាធិបតីរុស្ស៊ី វ្ល៉ាឌីមៀ ពូទីន បានចំណាយពេលជិតបួនម៉ោងក្នុងការឆ្លើយតបនឹងសំណួរជិត៧០ ក្នុងកម្មវិធីសួរឆ្លើយប្រចាំឆ្នាំនៅថ្ងៃទី១៥ ខែមិថុនា។ ច្រើនជាងពាក់កណ្ដាលនៃសំណួរទាំងអស់ ជាចម្ងល់របស់ប្រជាជនរុស្ស៊ីទាក់ទងបញ្ហាសង្គម និងសេដ្ឋកិច្ច ខណៈមានសំណួរចំនួន៧ ទាក់ទងបញ្ហាអន្តរជាតិដូចជាអាមេរិក អ៊ុយក្រែន និងស៊ីរីជាដើម, សំណួរចំនួន២ ស្ដីពីបញ្ហាបរិស្ថាន និងមានសំណួរ៤ ទាក់ទងបញ្ហាក្នុងស្រុកផ្សេងៗ។
១. ប្រជាជនរុស្ស៊ីនឹងសម្រេចថា នរណាជាប្រធានាធិបតី
ការបោះឆ្នោតប្រធានាធិបតីនៅឆ្នាំ២០១៨ គឺជាប្រធានបទសំខាន់មួយក្នុងការឆ្លើយឆ្លងសំណួរលើកនេះ ហើយសំណួរដែលលោក វ្ល៉ាឌីមៀ ពូទីន ត្រូវឆ្លើយ គឺនរណានឹងក្លាយជាប្រធានាធិបតីរុស្ស៊ី។ ជាសំណួរដែលអាចដឹងចម្លើយជាមុន តែលោក ពូទីន មិនបានផ្ដល់ចម្លើយទេ ដោយលោកបានត្រឹមឆ្លើយថា ប្រជាជនរុស្ស៊ីនឹងសម្រេចចិត្តដោយខ្លួនឯង បើទោះជាលោកមានបេក្ខជនដែលលោកពេញចិត្តក៏ដោយចុះ។
ការលើកឡើងរបស់លោក ពូទីន ធ្វើឡើង ចំពេលដែលោកផ្ទាល់មិនទាន់បង្ហាញជំហរច្បាស់លាស់ថាលោកនឹងចូលរួមការបោះឆ្នោតប្រធានាធិបតីនៅឆ្នាំក្រោយឬអត់ទេ។ ប៉ុន្តែនៅចុងបញ្ចប់កម្មវិធីមានឈ្មោះថាការជជែកផ្ទាល់ជាមួយប្រធានាធិបតីនៅឆ្នាំនេះ ប្រជាជនរុស្ស៊ីក៏បានសួរលោកថា នឹងមានកម្មវិធីនេះជាមួយរូបលោកទៀតឬទេនៅឆ្នាំក្រោយ។ លោក ពូទីន ដែលកាន់តំណែងប្រធានាធិបតីចំនួនបីអាណត្តិមកហើយ ក៏ឆ្លើយថាបើលោកជាប់ កម្មវិធីជជែកផ្ទាល់នេះនឹងមានទៀត។
បើតាមសារព័ត៌មាន RT លោកប្រធានាធិបតី ពូទីន ក៏បង្ហើបដែរថា លោកមិនយល់ទាស់អ្វីទេចំពោះមេដឹកនាំកាន់អំណាចយូរឆ្នាំនោះ សំខាន់ឲ្យតែស្របតាមច្បាប់ទៅបានហើយ។ ចំពោះលោក ពូទីន ការកាន់តំណែងយូរ គឺជារឿងធម្មតា ឲ្យតែការកាន់តំណែងនេះធ្វើឡើងតាមយន្តការប្រជាធិបតេយ្យ និងច្បាប់របស់ប្រទេសនោះ។ លោកបានប្រាប់អ្នកសារព័ត៌មាននៅក្រោយបញ្ចប់កម្មវិធីទៀតថា នៅរុស្ស៊ី មិនទាន់មាននរណាល្មើសច្បាប់នៅឡើយទេ។
សព្វថ្ងៃនេះ លោក ពូទីន កំពុងកាន់តំណែងប្រធានាធិបតីក្នុងអាណត្តិទីបី។ ប៉ុន្តែច្បាប់រដ្ឋធម្មនុញ្ញរុស្ស៊ីចែងថា គ្មាននរណាអាចកាន់តំណែងប្រធានាធិបតីលើសពីពីរអាណត្តិឡើយ។ ដោយរឿងនេះ ទើបក្នុងឆ្នាំ២០០៨ លោក ពូទីន ដែលពេលនោះកំពុងកាន់តំណែងក្នុងអាណត្តិទីពីរ បានគាំទ្រលោកនាយករដ្ឋមន្ត្រី ឌីមីទ្រី ម៉េដវ៉េដេវ ជាប្រធានាធិបតី មុនពេលឈរជាបេក្ខជនប្រធានាធិបតីម្ដងទៀតក្នុងឆ្នាំ២០១២ ។
២. ពូទីន មិនចង់ឲ្យកូនចៅរបស់លោកទទួលបានការយកចិត្តទុកដាក់ដូចរាជវង្សឡើយ
ក្រៅពីរឿងនយោបាយសំខាន់ៗ ប្រធានាធិបតីរុស្ស៊ីក៏បានទទួលបានសំណួរទាក់ទងបញ្ហាគ្រួសាររបស់លោកផងដែរ។ តាំងពីដើមមកនោះ លោក ពូទីន កម្រនឹងលើកយកបញ្ហាគ្រួសារមកនិយាយជាសាធារណៈណាស់ ខណៈកូន និងចៅៗរបស់លោករស់នៅក្នុងជីវិតអាថ៌កំបាំង ហើយកម្របង្ហាញមុខណាស់ដែរ។ ប៉ុន្តែលោកបញ្ជាក់ថា ពួកគេក៏ទទួលបានការការពារពីសំណាក់ភ្នាក់ងារពិសេសក្នុងនាមពួកគេជាគ្រួសារប្រធានាធិបតី។
លោក ពូទីន បានពន្យល់ថា លោកមិនចង់ឲ្យកូនស្រី និងចៅរបស់លោករស់នៅដូចជាសមាជិករាជវង្សឡើយ តែលោកចង់ឲ្យពួកគេធំធាត់ដូចមនុស្សធម្មតា ហើយពួកគេក៏ត្រូវការទំនាក់ទំនងជាមួយក្មេងៗដទៃទៀតដែរ។ បើតាមសម្ដីប្រធានាធិបតីរូបនេះ ប្រសិនគេដឹងពីឈ្មោះ និងអាយុពួកគេ អត្តសញ្ញាណរបស់ពួកគេត្រូវគេឯងស្គាល់ជាសាធារណៈ ហើយពួកគេនឹងទទួលការរំខាន ឬក៏មិនអាចរស់នៅដោយស្ងប់ស្ងៀមដែរ។
ក្នុងកិច្ចសម្ភាសជាមួយផលិតករអាមេរិក Oliver Stone លោក ពូទីន ក៏បានទម្លាយព័ត៌មានថា លោកក្លាយជាជីតា។ ប្រធានាធិបតីរុស្ស៊ីនិយាយទៀតថា ចៅប្រុសទីពីររបស់លោកក៏ទើបចាប់កំណើតថ្មីៗនេះដែរ។ នេះ គឺជារឿងចម្លែកដែលលោក ពូទីន ទម្លាយរឿងរ៉ាវក្នុងគ្រួសារ ដែលធ្លាប់តែលាក់បាំងជាច្រើនឆ្នាំមកហើយនោះ។
៣. ទណ្ឌកម្មថ្មីរបស់អាមេរិក ជារឿងមិនគួរភ្ញាក់ផ្អើល
ក្នុងចំណោមសំណួរទាំងអស់ ដែលលោក ពូទីន ចំណាយពេលដល់ទៅ៣ម៉ោង និង៥៦នាទីដើម្បីឆ្លើយ ក៏មានសំណួរទាក់ទងជាមួយទណ្ឌកម្មអាមេរិកដែរ។ យ៉ាងណាក្ដី លោកប្រធានាធិបតី ពូទីន មិនភ្ញាក់ផ្អើលទណ្ឌកម្មថ្មីដែលទើបអនុម័តដោយព្រឹទ្ធសភាអាមេរិកឡើយ ដោយលោកនិយាយថាទណ្ឌកម្មថ្មីនេះជាធ្វើឡើងដោយគ្មានមូលហេតុច្បាស់លាស់ឡើយ។ លោកបែរជាចាត់ទុកទណ្ឌកម្មនេះ ជាជម្លោះផ្ទៃក្នុងនៅអាមេរិកទៅវិញ។
ប្រធានាធិបតីរុស្ស៊ីសង្កត់ធ្ងន់ថា រុស្ស៊ីស្ថិតក្រោមទណ្ឌកម្មរបស់បស្ចិមប្រទេស ព្រោះរុស្ស៊ីជាន់ជើងលោកខាងលិចលើឆាកអន្តរជាតិ ហើយទណ្ឌកម្មនេះក្លាយជាឧបករណ៍សម្រាប់ការប្រកួតប្រជែងក្នុងវិស័យសេដ្ឋកិច្ចផងដែរ។ សម្រាប់លោក ពូទីន ក្រុមលោកខាងលិច នឹងរកផ្លូវដាក់ទណ្ឌកម្មលើរុស្ស៊ី ទោះជាគ្មានបញ្ហានៅគ្រីមៀ ឬបញ្ហាផ្សេងទៀតក្ដី។ ពោល គឺពួកលោកខាងលិចនឹងបង្កើតបញ្ហាដើម្បីដាក់ទណ្ឌកម្មទាល់តែបាន៕
Tag:
អឺរ៉ុប
រុស្ស៊ី
វ្ល៉ាឌីមៀ ពូទីន
© រក្សាសិទ្ធិដោយ thmeythmey.com