អន្តរជាតិ
ប្រធានាធិបតី ពូទីន ថា អាមេរិកតែងតែលូកលាន់កិច្ចការបោះឆ្នោតរុស្ស៊ី
× ធ្លាប់តែរងការចោទប្រកាន់ថាបានលូកលាន់ការបោះឆ្នោតអាមេរិក ពេលនេះប្រធានាធិបតីរុស្ស៊ី វ្ល៉ាឌីមៀ ពូទីន បែរជានិយាយថារុស្ស៊ីរងគ្រោះដោយសារអាមេរិកកកូរកកាយកិច្ចការបោះឆ្នោតរបស់ខ្លួនទៅវិញ។ លោក ពូទីន បានប្រាប់អ្នកដឹកនាំរឿងអាមេរិក Oliver Stone ថា អាមេរិកតែងបានលូកលាន់កិច្ចការបោះឆ្នោតរុស្ស៊ីរហូត សូម្បីតែការបោះឆ្នោតឆ្នាំ២០១២ក្ដី។ មិនត្រឹមតែរុស្ស៊ីឡើយ សូម្បីប្រទេសអតីតសហភាពសូវៀត ក៏រងគ្រោះដូចគ្នាដែរ។
សំណុំរឿងរុស្ស៊ីលូកលាន់ការបោះឆ្នោតនៅអាមេរិកដែលលោក ដូណាល់ ត្រាំ ឈ្នះឆ្នោតជាប្រធានាធិបតី កំពុងតែក្ដៅគគុកនៅឡើយ។ ដោយសាររឿងនេះ ប្រធាន FBI ជេមស៍ ខូមី ត្រូវអស់តំណែង និងត្រូវសភាហៅទៅសួរចម្លើយ រដ្ឋមន្ត្រីយុត្តិធម៌ Jeff Sessions ក៏ត្រូវចូលខ្លួនបំភ្លឺ ឯទីប្រឹក្សាជាន់ខ្ពស់ Jared Kushner ជាកូនប្រសារលោក ត្រាំ ក៏មានឈ្មោះជាប់ពាក់ព័ន្ធ ខណៈលោកប្រធានាធិបតី ត្រាំ ផ្ទាល់ក៏កំពុងស្ថិតក្រោមការស៊ើបអង្កេតទៅទៀត។
ខណៈដែលការស៊ើបអង្កេតកំពុងធ្វើឡើងដោយរដ្ឋអាជ្ញាពិសេស នៅរុស្ស៊ីឯណោះ ប្រធានាធិបតី វ្ល៉ាឌីមៀ ពូទីន បែរជាប្រកាសថា អាមេរិកក៏បានជ្រៀតជ្រែកក្នុងការបោះឆ្នោតរុស្ស៊ីដែរ។ បើតាមសារព័ត៌មាន Sputnik លោក ពូទីន បានប្រាប់លោក Oliver Stone ថា អាមេរិកបញ្ចេញសកម្មភាពកាន់តែខ្លាំងក្នុងការបោះឆ្នោតឆ្នាំ២០១២ ដែលពេលនោះលោក ពូទីន ឈ្នះឆ្នោតជាប្រធានាធិបតីមកដល់សព្វថ្ងៃ។
បើទោះជាមិនទម្លាយព័ត៌មានលម្អិតក្ដី ប្រធានាធិបតីរុស្ស៊ីបានទម្លាយថា អាមេរិកធ្វើសកម្មភាពលូកលាន់នេះតាមមធ្យោបាយជាច្រើន រួមទាំងការប្រើប្រាស់ស្ថានទូតរបស់ខ្លួនផងដែរ។ លោក ពូទីន និយាយថា អាមេរិកក៏បានដឹងពីរឿងនេះដែរ ព្រោះលោកបានប្រាប់រឿងនេះដល់អតីតរដ្ឋមន្ត្រីការបរទេស John Kerry ក៏ដូចជាអតីតប្រធានាធិបតី បារ៉ាក់ អូបាម៉ា ដែរ។ លោកបន្តថា បុគ្គលិកស្ថានទូតអាមេរិកចូលរួមក្នុងការឃោសនារបស់បក្សប្រឆាំង និងផ្ដល់លុយឲ្យពួកគេទៅទៀត។
ក្រៅពីការប្រើប្រាស់ស្ថានទូត លោក ពូទីន ក៏បានចោទអាមេរិកថាបានប្រើប្រាស់អង្គការក្រៅរដ្ឋាភិបាលក្នុងការជ្រៀតជ្រែកកិច្ចការបោះឆ្នោតនេះដែរ។ ប្រធានាធិបតីរុស្ស៊ីរូបនេះសង្កត់ធ្ងន់ថា អង្គការក្រៅរដ្ឋាភិបាលទាំងអស់អាចធ្វើការស្រេចចិត្ត តែពួកគេទទួលបានការផ្គត់ផ្គង់ពីស្ថាប័នរដ្ឋនៅអាមេរិកដូចជាក្រសួងការបរទេសជាដើម ដើម្បីលូកលាន់ការងារបោះឆ្នោត ហើយរឿងបែបនេះកើតឡើងនៅស្ទើរគ្រប់កន្លែងទាំងអស់ មិនថាអឺរុបខាងកើត អាមេរិកឡាទីន ឬអាហ្វ្រិកឡើយ។
អ្វីគួរឲ្យចាប់អារម្មណ៍ នេះជាលើកដំបូងដែលលោកប្រធានាធិបតី ពូទីន និយាយចោទអាមេរិកចំៗលើការកកូរកកាយការបោះឆ្នោតនៅរុស្ស៊ី ខណៈរុស្ស៊ីក្លាយជាផ្ទាំងស៊ីបរបស់អាមេរិកដោយសាររឿងនេះដូចគ្នា។ ទំនាក់ទំនងរវាងអាមេរិក និងរុស្ស៊ី ក៏ល្អក់កករមិនទាន់ស្ដារឡើងវិញបាននៅឡើយ ស្របពេលដែលមេដឹកនាំអាមេរិកកំពុងជាប់ខ្លួនផុងក្នុងការស៊ើបអង្កេតករណីនេះ។ រុស្ស៊ី ត្រូវបានចោទថា ជួយឲ្យលោក ត្រាំ ឈ្នះឆ្នោតតាមរយៈការលួចកែទិន្នន័យលទ្ធផលបោះឆ្នោត៕
Tag:
រុស្ស៊ី
អាមេរិក
វ្ល៉ាឌីមៀ ពូទីន
© រក្សាសិទ្ធិដោយ thmeythmey.com