កូរ៉េខាងត្បូង អាចកាត់បន្ថយសព្វាវុធនិងសមយុទ្ធជាមួយអាមេរិក បើកូរ៉េខាងជើងឈប់បង្ករឿង

អន្តរជាតិ

កូរ៉េខាងត្បូង អាចកាត់បន្ថយសព្វាវុធនិងសមយុទ្ធជាមួយអាមេរិក បើកូរ៉េខាងជើងឈប់បង្ករឿង

17, Jun 2017 , 8:59 pm

រូបភាព

ដោយ: តន ចាន់រិទ្ធារ៉ា

ទីប្រឹក្សាប្រធានាធិបតីកូរ៉េខាងត្បូង មូន ចេអ៊ីន នៅថ្ងៃទី១៦ ខែមិថុនា បាននិយាយថា កូរ៉េខាងត្បូងនឹងពិភាក្សាជាមួយអាមេរិកក្នុងការកាត់បន្ថយសព្វាវុធរបស់អាមេរិក ក៏ដូចជាកាត់បន្ថយសមយុទ្ធយោធារួមគ្នា បើកូរ៉េខាងជើងសុខចិត្តផ្អាកកម្មវិធីនុយក្លេអ៊ែររបស់ខ្លួន។ បើតាមលោក Moon Chung-in ទីប្រឹក្សាពិសេសប្រធានាធិបតី នេះជាគំនិតរបស់លោក មូន ចេអ៊ីន ក្នុងការដោះស្រាយវិបត្តិនៅឧបទ្វីបកូរ៉េជាជំហានៗ ជាជាងការដោះស្រាយបញ្ហាទាំងមូល។

កូរ៉េខាងជើងបានរងទណ្ឌកម្មខ្លាំងៗអស់ពេលជាច្រើនឆ្នាំដោយសារមហិច្ឆតាអភិវឌ្ឍនុយក្លអ៊ែររបស់ខ្លួន។ សហគមន៍អន្តរជាតិនាំគ្នាដាក់ទណ្ឌកម្មលើកូរ៉េខាងជើងជាច្រើនលើកច្រើនសារ ដើម្បីបង្ខំឲ្យរដ្ឋកុម្មុយនីស្តមួយនេះបញ្ឈប់គំនិតអភិវឌ្ឍអាវុធមហាប្រល័យនេះទៀត។ ទណ្ឌកម្មរបស់អន្តរជាតិ គឺជាវិធានការខ្លាំង សំដៅបញ្ចប់មហិច្ឆតារបស់កូរ៉េខាងជើងតែម្ដង។ យ៉ាងណាក្ដី កូរ៉េខាងជើងនៅតែមានះបន្តអភិវឌ្ឍអាវុធដដែល។

ទំនងមើលឃើញថាការដាក់ទណ្ឌកម្មដើម្បីបញ្ចប់កម្មវិធីនុយក្លេអ៊ែរជារឿងលំបាកសម្រេចបាន ប្រធានាធិបតីកូរ៉េខាងត្បូង មូន ចេអ៊ីន លើកជាគំនិតដោយសំដៅបន្ថយចំនួនអាវុធអាមេរិកនៅកូរ៉េខាងត្បូង ជាថ្នូរនឹងការបញ្ចប់ទង្វើបង្កហេតុរបស់កូរ៉េខាងជើងដូចជាការបាញ់មីស៊ីលជាដើម។ ថ្លែងក្នុងសិក្ខាសាលានៅអាមេរិកនៅថ្ងៃទី១៥ ខែមិថុនា លោក Moon Chung-in ទីប្រឹក្សាលោក មូន ចេអ៊ីន និយាយថា ប្រធានាធិបតីកូរ៉េខាងត្បូងលើកសំណើបែបនេះដើម្បីដោះស្រាយវិបត្តិឧបទ្វីបកូរ៉េតាមសម្រួល។

យោងតាមទីភ្នាក់ងារព័ត៌មាន Yonhap លោក Moon Chung-in និយាយថា លោក មូន ចេអ៊ីន បានលើកឡើងសំណើចំនួនពីរក្នុងការបញ្ចប់បញ្ហានេះទៅតាមលំដាប់ ដោយចាប់ផ្ដើមពីការផ្អាកកម្មវិធីនុយក្លេអ៊ែរជាមុន។ លោកបន្តថា ទីមួយ គឺកូរ៉េខាងជើងត្រូវផ្អាកការបាញ់មីស៊ីល ឬការសាកល្បងនុយក្លេអ៊ែរសិន បន្ទាប់មកកូរ៉េខាងត្បូងអាចនឹងជជែកជាមួយអាមេរិកដើម្បីបន្ថយបរិមាណសព្វាវុធយុទ្ធសាស្ត្រដែលត្រូវបានពង្រាយនៅកូរ៉េខាងត្បូង ព្រមទាំងបន្ថយចំនួនសមយុទ្ធរួមគ្នាដែរ។

បើតាមសម្ដីទីប្រឹក្សារូបនេះ លោក មូន ក៏មានបំណងបង្កើតសន្តិភាពតាមរយៈការលុបបំបាត់នុយក្លេអ៊ែរពីឧបទ្វីបកូរ៉េ ប៉ុន្តែនេះជារឿងដ៏ស្មុគស្មាញមួយ និងមិនងាយសម្រេចបានដូចកិច្ចព្រមព្រៀងអ៊ីរ៉ង់ឡើយ។ យ៉ាងណាក្ដី គំនិតទាំងពីរនេះ មានគោលដៅបញ្ចប់បញ្ហានៅឧបទ្វីបកូរ៉ និងបញ្ចប់កម្មវិធីនុយក្លេអ៊ែររបស់កូរ៉េខាងជើងតែម្ដង។ គំនិតទាំងនេះ អាចដោះស្រាយបញ្ហាបន្តិចម្ដងៗ ព្រោះដំណោះស្រាយបញ្ចប់បញ្ហាទាំងមូល មិនមែនជារឿងងាយស្រួលឡើយ។

សំណើរបស់ប្រធានាធិបតីកូរ៉េខាងត្បូង ទំនងជាអាចទាក់ទាញការចាប់អារម្មណ៍ពីសំណាក់កូរ៉េខាងជើង ព្រោះតាំងពីដើមមកនោះ កូរ៉េខាងជើងមិនពេញចិត្តទាល់សោះវត្តមានអាមេរិកនៅកូរ៉េខាងត្បូង ក៏ដូចជាការពង្រាយសព្វាវុធយុទ្ធសាស្ត្រជាដើម។ ម្យ៉ាងទៀតនោះ ព្យុងយ៉ាងក៏មិនអាចសប្បាយចិត្តនឹងសមយុទ្ធរួមគ្នារវាងសេអ៊ូល និងវ៉ាស៊ីនតោនដែរ ហើយបានចាត់ទុកជាការរៀបចំធ្វើសង្គ្រាមទៅទៀត។ ប៉ុន្តែគេមិនទាន់ដឹងថាកូរ៉េខាងជើង និងអាមេរកគិតយ៉ាងណាចំពោះសំណើនេះទេ៕