អន្តរជាតិ
អាល្លឺម៉ង់គំរាមសងសឹក បើទណ្ឌកម្មអាមេរិកលើរុស្ស៊ីប៉ះពាល់ក្រុមហ៊ុនអាល្លឺម៉ង់
× អាល្លឺម៉ង់ នឹងចាត់វិធានការឆ្លើយតបវិញ បើទណ្ឌកម្មលើរុស្ស៊ីដែលទើបអនុម័តដោយព្រឹទ្ធសភាអាមេរិក បង្កបញ្ហាដល់ក្រុមហ៊ុនអាល្លឺម៉ង់។ ទណ្ឌកម្មថ្មីរបស់អាមេរិកនេះ មិនទាន់ចេញជារូបរាងផ្លូវការឡើយ ព្រោះរង់ចាំការសម្រេចចិត្តរបស់រដ្ឋសភា និងហត្ថលេខារបស់ប្រធានាធិបតី ដូណាល់ ត្រាំ សិន ប៉ុន្តែអាល្លឺម៉ង់បារម្ភថា ទណ្ឌកម្មថ្មីនេះអាចប៉ះពាល់ក្រុមហ៊ុនរបស់ខ្លួនដែលកំពុងរកស៊ីជាមួយរុស្ស៊ីក្នុងការសាងសង់បំពង់បង្ហូរឧស្ម័ន។
នៅថ្ងៃទី១៥ ខែមិថុនា ព្រឹទ្ធសភាអាមេរិកបានអនុម័តកញ្ចប់ទណ្ឌកម្មថ្មីទៀតលើរុស្ស៊ី និងអ៊ីរ៉ង់ដោយសំឡេង៩៨ ទល់២ ។ ប្រធានាធិបតីរុស្ស៊ី វ្ល៉ាឌីមៀ ពូទីន មិនបានភ្ញាក់ផ្អើលនឹងទណ្ឌកម្មថ្មីនេះឡើយ ប៉ុន្តែអាល្លឺម៉ង់ ជារដ្ឋសមាជិក និងមានក្រុមហ៊ុនធ្វើពាណិជ្ជកម្មជាមួយក្រុមហ៊ុនរុស្ស៊ី កំពុងបារម្ភខ្លាំងនឹងទណ្ឌកម្មនេះ ព្រោះក្រុមហ៊ុនរបស់ខ្លួនអាចរងការពិន័យពីសំណាក់អាមេរិក ដោយសារជាប់ពាក់ព័ន្ធជាមួយរុស្ស៊ី។
ទណ្ឌកម្មថ្មី ដែលរង់ចាំការសម្រេចពីរដ្ឋសភា និងប្រធានាធិបតី ដូណាល់ ត្រាំ ត្រូវគេមើលឃើញជាមុនថាជាវិធានការប្រឆាំងក្រុមហ៊ុនដែលសហការជាមួយរុស្ស៊ីក្នុងការសាងសង់បណ្ដាញបង្ហូរថាមពលសម្រាប់នាំចេញ។ អាល្លឺម៉ង់ កំពុងភ័យខ្លាចថាទណ្ឌកម្មនេះនឹងបើកផ្លូវដល់ការពិន័យលើក្រុមហ៊ុនរបស់ខ្លួន ក៏ដូចជាក្រុមហ៊ុនអឺរ៉ុបផ្សេងទៀត ដែលកំពុងរកស៊ីជាមួយរុស្ស៊ីក្នុងគម្រោងសាងសង់បំពង់បង្ហូរឧស្ម័នកាត់តំបន់បាល់ទិក។
អ្នកនាំពាក្យអធិការបតីអាល្លឺម៉ង់ Angela Merkel ចាត់ទុកសំណើច្បាប់របស់ព្រឹទ្ធសភាអាមេរិកជារឿងចំឡែក។ លោក Steffen Seibert ជាអ្នកនាំពាក្យនិយាយថា វាជារឿងប្លែកដែលទណ្ឌកម្មរបស់អាមេរិកដាក់លើរុស្ស៊ីព្រោះតែការជ្រៀតជ្រែកកិច្ចការបោះឆ្នោតប្រធានាធិបតីអាមេរិកក្នុងឆ្នាំ២០១៦ បែរជាអាចដាក់ពិន័យក្រុមហ៊ុនអាល្លឺម៉ង់ទៅវិញ។ លោកបន្តថា រឿងប្លែកៗរបៀបនេះ មិនអាចកើតឡើងបានឡើយ។
ជាមួយគ្នានេះ រដ្ឋមន្ត្រីសេដ្ឋកិច្ចអាល្លឺម៉ង់ Brigitte Zypries បានប្រាប់ទីភ្នាក់ងារព័ត៌មាន Reuters ដែរថា ក្រុងបែរឡាំងអាចរកវិធានការតបវិញ ប្រសិនបើប្រធានាធិបតី ត្រាំ ដែលមានសិទ្ធិជំទាស់គម្រោងទណ្ឌកម្មថ្មី គាំទ្រផែនការរបស់ព្រឹទ្ធសភានេះមែន។ លោកបញ្ជាក់ថា ប្រសិនបើលោក ត្រាំ ពិតជាចុះហត្ថលេខាយល់ព្រមមែន នោះអាល្លឺម៉ង់ត្រូវតែពិចារណាពីចំណាត់ការឆ្លើយតបវិញ។
ច្បាស់ណាស់ថា យោងតាមស្ថានភាពជាក់ស្តែង ច្បាប់នេះនឹងបង្កើតឧបសគ្គថ្មីទៀតសម្រាប់រដ្ឋបាលលោក ដូណាល់ ត្រាំ ដែលមានបំណងចង់បង្កើតចំណងមិត្តភាពស្និទ្ធស្នាលជាមួយរបបដឹកនាំរុស្ស៊ីនោះ ក៏ដូចជសម្ព័ន្ធមិត្តអាមេរិនៅអឺរ៉ុបផងដែរ។ បើចេញជារូបបរាងមែននោះ ទំនាក់ទំនងរវាងអាមេរិក និងសមាជិកអឺរ៉ុបដែលកំពុងប្រេះស្រាំស្រាប់ផងនោះ នឹងកាន់តែផុងជ្រៅមិនខាន ហើយរដ្ឋបាលលោក ត្រាំ នឹងឃ្លាតកាន់តែឆ្ងាយពីមិត្តចាស់វស្សារបស់ខ្លួន៕
Tag:
អាមេរិក
អាល្លឺម៉ង់
រុស្ស៊ី
© រក្សាសិទ្ធិដោយ thmeythmey.com