បក្សប្រធានាធិបតី ម៉ាក្រុង រំពឹងឈ្នះភ្លូកទឹកភ្លូកដីក្នុងការបោះឆ្នោតសភា

អន្តរជាតិ

បក្សប្រធានាធិបតី ម៉ាក្រុង រំពឹងឈ្នះភ្លូកទឹកភ្លូកដីក្នុងការបោះឆ្នោតសភា

18, Jun 2017 , 1:14 pm

រូបភាព

ដោយ: តន ចាន់រិទ្ធារ៉ា

ការបោះឆ្នោតជ្រើសរើសសមាជិកសភាបារាំងជុំទីពីរកំពុងធ្វើឡើងនៅថ្ងៃទី១៨ ខែមិថុនានេះ។ គណបក្ស Republique en Marche របស់ប្រធានាធិបតីបារាំង អេម៉ានុយអែល ម៉ាក្រុង រំពឹងថានឹងទទួលបានជ័យជម្នះភ្លូកទឹកភ្លូកដីម្ដងទៀត បន្ទាប់ពីទទួលបានសំឡេងគាំទ្រភាគច្រើនកាលពីជុំទីមួយ។ គេរំពឹងថា គណបក្សថ្មីថ្មោងរបស់លោក ម៉ាក្រុង នឹងទទួលបានសំឡេង ៤០០ ដល់ ៤៤៥ ក្នុងចំណោមអាសនៈសរុប ៥៧៧ នៅឯសភាបារាំង។

ប្រជាជនបារាំង នាំគ្នាទៅបោះឆ្នោតជ្រើសរើសសមាជិកសភាជុំទីពីរនៅថ្ងៃទី១៨ ខែមិថុនា ដោយបក្សទើបបង្កើតរបស់ប្រធានាធិបតី អេម៉ានុយអែល ម៉ាក្រុង នឹងកាន់កាប់អសនៈភាគច្រើនលើសលប់ក្នុងសភាជាតិ។ នេះ គឺជាជ័យជម្នះផ្ទួនៗរបស់លោក ម៉ាក្រុង បន្ទាប់ជោគជ័យក្នុងការបោះឆ្នោតប្រធានាធិបតីកាលពីខែមុន។ ជ័យជម្នះនេះនឹងផ្ដល់ឱកាសឲ្យលោកអនុវត្តនយោបាយកែទម្រង់ប្រទេសជាតិ តែវាក៏ជាការបំបាក់មុខអ្នកនយោបាយជើងចាស់ដែលមិនអាចតទល់អ្នកនយោបាយជើងថ្មីបាន។

ត្រឹមមួយខែក្រោយក្លាយជាប្រមុខរដ្ឋក្មេងជាងគេរបស់បារាំង លោក ម៉ាក្រុង បានបន្តដឹកនាំបក្ស Republique en Marche (REM) របស់លោកដែលមានអាយុជាងមួយឆ្នាំ ឲ្យទទួលបានជោគជ័យនៅឯសភាទៀត។ បើតាមទីភ្នាក់ងារព័ត៌មាន Reuters ការស្ទង់មតិនានា និងលទ្ធផលជុំទីមួយបង្ហាញថា បក្ស REM អាចទទួលបានសំឡេងកៅអីសរុបចន្លោះ៧៥ភាគរយ ទៅ៨០ភាគរយនៃកៅអីសភាជាន់ទាប។ សមាជិកសភាថ្មី ដែលភាគច្រើនមិនសូវមានបទពិសោធនយោបាយ នឹងចូលកាន់ការងារជំនួសអ្នកនយោបាយចាស់វស្សាម្ដង។

ក្រុមអ្នកនយោបាយអភិរក្ស និងសង្គមនិយម ដែលត្រួតត្រានយោបាយបារាំងជាច្រើនឆ្នាំមកហើយនោះ មិនអាចតដៃជាមួយបក្សថ្មីថ្មោងដឹកនាំដោយអ្នកនយោបាយវ័យក្មេងពេញកម្លាំងបានឡើយ។ អ្នកនយោបាយជើងចាស់ទាំងនោះ ចាញ់ទាំងការបោះឆ្នោតប្រធានាធិបតី ហើយមកចាញ់ទាំងការបោះឆ្នោតសភាទៅទៀត។ យ៉ាងណាក្ដី ពួកគេបានស្នើឲ្យប្រជាជនបារាំងគិតដល់តុល្យភាពអំណាចផង ដោយមិនត្រូវឲ្យបក្ស REM កាន់អាសនៈលើសលប់ពេកឡើយ។

អ្វីដែលគួរឲ្យកត់សម្គាល់នោះ ភាគរយអ្នកទៅចូលរួមបោះឆ្នោតសភាស្ថិតក្នុងកម្រិតទាបបំផុតក្នុងប្រវត្តិសាស្ត្របារាំង។ កាលពីការបោះឆ្នោតជុំទីមួយថ្ងៃអាទិត្យទី ១១ មិថុនា ប្រជាជនបារាំងចេញទៅបោះឆ្នោតជ្រើសរើសតំណាងរបស់ខ្លួនមានត្រឹម ៤៩ភាគរយប៉ុណ្ណោះ។ ចំនួនអ្នកទៅបោះឆ្នោតអាចរក្សាកម្រិតទាបដដែលនៅការបោះឆ្នោតជុំទីពីរនេះ ព្រោះពួកគេដឹងច្បាស់ថា បក្សលោក ម៉ាក្រុង នឹងឈ្នះឆ្នោតទៅហើយ។

ជ័យជម្នះធំធេងនេះ នឹងបង្កភាពងាយស្រួលសម្រាប់ការអនុម័ត និងអនុវត្តគោលនយោបាយប្រធានាធិបតី ម៉ាក្រុង ដែលក្នុងនោះរួមមានទាំងការកែទម្រង់សេដ្ឋកិច្ចនិងសង្គម ដូចជាច្បាប់ការងារ និងប្រព័ន្ធសោធនិវត្តន៍ផងដែរ។ ប្រធានាធិបតីបារាំងវ័យ ៣៩ ឆ្នាំរូបនេះដែលមានឈ្មោះល្បីល្បាញរូបនេះបានប្រើប្រាស់យុទ្ធសាស្ត្រទាញសំឡេងឆ្នោតដោយ ជ្រើសរើសសមាជិកគណៈរដ្ឋមន្ត្រីដែលមកពីគណបក្សចម្រុះ រួមទាំងមានសមាសភាពខ្លះមកពីសង្គមស៊ីវិលផង៕