អន្តរជាតិ
កងទ័ពតួកគីទៅដល់កាតាដើម្បីធ្វើសមយុទ្ធរួមគ្នា ស្របពេលស្ថានការណ៍ក្នុងតំបន់បន្តតានតឹង
× កងទ័ពតួកគីបានទៅដល់កាតានៅថ្ងៃទី១៨ ខែមិថុនា ដើម្បីចូលរួមសមយុទ្ធរួមគ្នាជាមួយយោធាកាតា។ វត្តមានកងទ័ពតួកគីនៅលើទឹកដីកាតានៅពេលនេះ គឺជាផ្នែកមួយនៃកិច្ចព្រមព្រៀងរវាងប្រទេសទាំងពីរ ហើយវាក៏បានបង្ហាញពីការគាំទ្ររបស់តួកគីលើកាតា ដែលរងការហ៊ុមព័ទ្ធជុំជិតពីសំណាក់រដ្ឋឈូងសមុទ្រពែរ្សផ្សេងទៀត។ តួកគី ដែលជារដ្ឋក្រៅតំបន់ឈូងសមុទ្រ បានក្លាយជាអ្នកសម្រុះសម្រួលភាគីទាំងអស់ ប៉ុន្តែស្ថានការណ៍នៅមិនទាន់ប្រសើរនៅឡើយ។
ក្រសួងការពារជាតិកាតាបានប្រកាសថា កងទ័ពតួកគីមួយក្រុមបានទៅដល់ទីក្រុងដូហា ដើម្បីធ្វើលំហាត់យោធារួមគ្នាជាមួយកងទ័ពកាតា។ ក្រសួងការពារជាតិកាតាប្រកាសទៀតថា កងទ័ពទាំងពីរប្រទេសបានចាប់ផ្ដើមសមយុទ្ធរួមគ្នាលើកដំបូងនៅឯមូលដ្ឋាន Tariq bin Ziyad នៅថ្ងៃទី១៨ ខែមិថុនា។ លំហាត់រួមគ្នានេះ ធ្វើឡើងខណៈដែលកាតាកំពុងមើលមុខមិនចំជាមួរសម្ព័ន្ធមិត្តអារ៉ាប់របស់ខ្លួន និងបន្ទាប់ពីកាតាធ្វើសមយុទ្ធជើងទឹកជាមួយកងទ័ពអាមេរិក។
បើតាមសារព័ត៌មាន AL Jazeera ដែលស្រង់ប្រភពពីក្រសួងការពារជាតិកាតា សមយុទ្ធរួមគ្នានេះ ត្រូវបានគ្រោងទុកយូរមកហើយ និងស្ថិតក្រោមកិច្ចសហប្រតិបត្តិការលើវិស័យយោធារវាងកាតា និងតួកគី។ កិច្ចព្រមព្រៀងទ្វេភាគីដែលត្រូវបានចុះហត្ថលេខាតាំងពីឆ្នាំ២០១៤ មានគោលដៅពង្រឹងសមត្ថភាពកងទ័ពប្រទេសទាំងពីរ ក៏ដូចជាប្រយុទ្ធប្រឆាំងក្រុមភេរវករជ្រុលនិយម និងការរក្សាស្ថិរភាពក្នុងតំបន់ផងដែរ។
វត្តមានកងទ័ពតួកគីនៅកាតា ធ្វើឡើងបន្ទាប់ពីសភាតួកគី បានអនុម័តសេចក្ដីព្រាងច្បាប់ដែលអនុញ្ញាតឲ្យមានការពង្រាយកងទ័ពតួកគីនៅមូលដ្ឋានក្នុងរដ្ឋកាតា ដែលកំពុងរងសម្ពាធការទូតខ្លាំងពីសម្ព័ន្ធមិត្តអារ៉ាប់របស់ខ្លួន។ សេចក្ដីព្រាងច្បាប់នេះត្រូវបានអនុម័តដោយសមាជិកសភាចំនួន២៤០ សំឡេង ហើយស្របតាមកិច្ចព្រមព្រៀងរវាងតួកគី និងកាតាក្នុងឆ្នាំ២០១៤ តែម្ដង។ នេះទំនងជាវិធានការត្រៀមទុកមុនរបស់តួកគីសម្រាប់ការពារកាតាដែលជាមិត្តរបស់ខ្លួន។
តាំងពីអារ៉ាប៊ីសាអូឌីត ប៉ារ៉ែន អារ៉ាប់រួមអេមីរ៉ាត អេហ្ស៊ីប យេម៉ែន និងហ្ស៊កដានីជាដើម ផ្ដាច់ និងទម្លាក់ទំនាក់ទំនងការទូតជាមួយកាតាដោយចោទថាបានគាំទ្រក្រុមភេរវកម្ម តួកគី ដែលមិនមែនជាសមាជិកក្រុមប្រឹក្សារដ្ឋឈូងសមុទ្រ បានចេញមុខការពារកាតា និងបានដើរសម្របសម្របបញ្ចប់ជម្លោះនេះ។ ប្រធានាធិបតីតួកគី តៃយីប អ៊ែរដូហ្កាន់ បានរិះគន់រដ្ឋឈូងសមុទ្រផ្សេងដែលហ៊ុមព័ទ្ធកាតា ហើយថា ទណ្ឌកម្មមិនអាចដោះស្រាយបញ្ហាបានទេ។
តាមពិតទៅ តួកគី និងកាតាមានទំនាក់ទំនងជិតស្និទ្ធរួមគ្នាយូរមកហើយ ហើយតួកគីក៏រក្សាបានទំនាក់ទំនងល្អប្រសើរជាមួយបណ្តារដ្ឋអារ៉ាប់ជាច្រើនផ្សេងទៀតដែរ។ អ្វីដែលគួរឲ្យកត់សម្គាល់ ទាំងកាតា និងតួកគីសុទ្ធតែជាអ្នកគាំទ្រក្រុមភាតរភាពឥស្លាមនៅអេហ្ស៊ីប គាំទ្រក្រុមហាម៉ាស់នៅប៉ាឡេស្ទីន និងគាំទ្រក្រុមឧទ្ទាមប្រឆាំងរដ្ឋាភិបាលស៊ីរីដូចគ្នាដែរ៕
Tag:
តួកគី
កាតា
មជ្ឈិមបូព៌ា
© រក្សាសិទ្ធិដោយ thmeythmey.com