អន្តរជាតិ
និស្សិតអាមេរិកដែលកូរ៉េខាងជើងដោះលែងទាំងសន្លប់ស្ដូកស្ដឹង បានស្លាប់ហើយ
× និស្សិតអាមេរិកឈ្មោះ Otto Warmbier ដែលទើបត្រូវបានកូរ៉េខាងជើងដោះលែង បានស្លាប់ហើយនៅមន្ទីរពេទ្យទីក្រុង Cincinnati រដ្ឋ Ohio នៅថ្ងៃទី១៩ ខែមិថុនា។ នេះបើតាមការប្រកាសរបស់គ្រួសារជនជាតិអាមេរិករូបនេះ។ Otto Warmbier បានទៅដល់ទឹកដីអាមេរិកវិញជាមួយអាការៈសន្លប់មិនដឹងខ្លួន ដែលទំនងជារងទណ្ឌកម្មធ្ងន់ធ្ងរអំឡុងពេលឃុំខ្លួនកូរ៉េខាងជើង ដែលនៅទីនោះរូបគេត្រូវដាក់ទោសឲ្យធ្វើការធ្ងន់ដល់ទៅ ១៥ឆ្នាំ។
និស្សិតអាមេរិក Otto Warmbier បានទៅដល់កូរ៉េខាងជើងនៅអំឡុងខែមិនា ឆ្នាំ២០១៦ ក្នុងនាមអ្នកទេសចរ។ ប៉ុន្តែរូបគេត្រូវបានអាជ្ញាធរកូរ៉េខាងជើងចាប់ខ្លួន និងដាក់ទោសឲ្យធ្វើការធ្ងន់ដល់ទៅ ១៥ឆ្នាំ ដោយរងការចោទប្រកាន់ថាបានលួចយកក្រដាសឃោសនាក្នុងសណ្ឋាគារដែលរូបគេស្នាក់នៅក្នុងរដ្ឋធានីព្យុងយ៉ាង។ អាមេរិកបានរិះគន់ការដាក់ទោសលើជនជាតិរបស់ខ្លួនថាធ្ងន់ធ្ងរពេក បើប្រៀបធៀបនឹងទោសរបស់គេ។
កូរ៉េខាងជើងបានដោះលែង Otto Warmbier ដែលមានវ័យ២២ឆ្នាំ និងបញ្ជូនត្រឡប់ទៅកាន់អាមេរិកនៅថ្ងៃទី១៣ ខែមិថុនា បន្ទាប់ពីឃុំខ្លួនអស់១៧ខែរួចមក។ ពេលត្រូវបានដោះលែងនេះ និស្សិតរូបនេះបានរងរបួសខួរក្បាលធ្ងន់ធ្ងររហូតមិនអាចនិយាយស្ដី ឬធ្វើអ្វីបានឡើយ និងស្ថិតក្នុងស្ថានភាពសន្លប់មិនដឹងខ្លួនរហូត។ ឯកូរ៉េខាងជើងវិញ ក៏បានប្រកាសដែរថា ខ្លួនដោះលែងនិស្សិតអាមេរិកដោយផ្អែកលើមូលដ្ឋានមនុស្សធម៌ប៉ុណ្ណោះ។
ក្រុមគ្រួសាររបស់ Otto Warmbier និយាយថា កូនប្រុសពួកគេរងការធ្វើការបាបយ៉ាងអាក្រក់ពេលត្រូវឃុំខ្លួននៅកូរ៉េខាងជើង ហើយអ្វីដែលកូរ៉េខាងជើងធ្វើដាក់លើ Otto Warmbier គឺជាមូលហេតុនៃភាពសោកសៅពេលនេះ។ បើតាមទីភ្នាក់ងារព័ត៌មាន AFP គ្រួសាររបស់និស្សិតអាមេរិករូបនេះបញ្ជាក់ដែរថា Otto Warmbier បានសន្លប់អត់ដឹងខ្លួនតាំងពីត្រូវបានអាជ្ញាធរកូរ៉េខាងជើងឃុំខ្លួនភ្លាមៗក្នុងខែមីនា ឆ្នាំ២០១៦ មកម្ល៉េះ។
ដោយឡែកប្រធានាធិបតីអាមេរិក ដូណាល់ ត្រាំ បានរិះគន់កូរ៉េខាងជើងយ៉ាងខ្លាំងដែរ ក្រោយទទួលបានព័ត៌មាននៃការស្លាប់របស់ Otto Warmbier ។ ក្នុងសេចក្ដីថ្លែងការណ៍របស់សេតវិមាន លោក ត្រាំ បានហៅរបបដឹកនាំកូរ៉េខាងជើង ជារបបសាហាវ មិនគោរពសិទ្ធិមនុស្ស ឬគោលការណ៍មនុស្សជាតិអ្វីឡើយ។ លោកបន្តថា អ្វីដែលកើតឡើងលើ Otto Warmbier នឹងពង្រឹងការប្ដេជ្ញាចិត្តរបស់រដ្ឋបាលលោកក្នុងការការពារជនជាតិអាមេរិកមិនឲ្យធ្លាក់ក្នុងដៃរបបព្រៃផ្សៃនេះទៀត។
បន្ទាប់ពីទៅដល់អាមេរិក ក្រុមគ្រូពេទ្យនិយាយថា Otto Warmbier មានបញ្ជាប្រព័ន្ធប្រសាទយ៉ាងធ្ងន់ធ្ងរ ហើយមិនអាចឆ្លើយតបអ្វីបាន ឬក៏ប្រតិកម្មពីអ្វីដែលនៅជុំវិញខ្លួនគេបានឡើយ ដោយបានត្រឹមតែបិទបើកភ្នែកចុះឡើងប៉ុណ្ណោះ។ ចំណែកកូរ៉េខាងជើងវិញនិយាយថា Otto Warmbier អត់ដឹងខ្លួនបន្ទាប់ពីត្រូវបានកាត់ទោសកាលពីឆ្នាំមុន ហើយរូបគេបានពុលអាហារ និងបានលេបថ្នាំងងុយដេកទៀតផង៕
Tag:
អាមេរិក
កូរ៉េខាងជើង
Otto Warmbier
© រក្សាសិទ្ធិដោយ thmeythmey.com