អន្តរជាតិ
លោក ត្រាំ ស្នើក្រុមហ៊ុនបច្ចេកវិទ្យាធំៗជួយដោះស្រាយបញ្ហា IT របស់រដ្ឋាភិបាល ប្រធានាធិបតី ដូណាល់ ត្រាំ អង្គយអមដោយលោក Tim Cook នាយកក្រុមហ៊ុន Apple និងនាយកប្រតិបត្តិ Microsoft លោក Satya Nadella (រូបភាព Reuters)
× ប្រធានាធិបតីអាមេរិក ដូណាល់ ត្រាំ បានជាមួយបណ្ដានាយកក្រុមហ៊ុនបច្ចេកវិទ្យាធំៗរបស់ពិភពលោកដូចជា Apple Inc, Amazon.com Inc និង Microsoft Corp ជាដើម ដើម្បីបង្កើនប្រសិទ្ធភាពប្រព័ន្ធព័ត៌មានបច្ចេកវិទ្យារបស់រដ្ឋាភិបាល។ លោក ត្រាំ បានស្នើសុំជំនួយពីក្រុមហ៊ុនបច្ចេកវិទ្យាយក្សទាំងនេះដើម្បីដោះស្រាយប្រព័ន្ធកុំព្យូទ័ររបស់រដ្ឋាភិបាល ដែលមានបញ្ហា និងនាំឲ្យរដ្ឋខាតបង់ទឹកប្រាក់ជាច្រើនទៀតផង។
នាយកក្រុមហ៊ុនបច្ចេកវិទ្យាចំនួន១៨ បានជួបជាមួយប្រធានាធិបតី ដូណាល់ ត្រាំ នៅសេតវិមាននៅថ្ងៃទី១៩ ខែមិថុនា ដោយបានទទួលបានសំណើឲ្យជួយដោះស្រាយប្រព័ន្ធបច្ចេកវិទ្យារបស់ដែលជួបបញ្ហា។ សេតវិមានចង់ឲ្យក្រុមហ៊ុនធំៗទាំងនេះជួយធ្វើឲ្យប្រព័ន្ធកុំព្យូទ័ររបស់រដ្ឋាភិបាលប្រសើរឡើងតាមរយៈការកាត់បន្ថយថ្លៃដើម លុបបំបាត់ការខ្ជះខ្ជាយ និងពង្រឹងសេវាកម្មជាដើម។ បើតាមលោក ត្រាំ បើវិធានការនេះទទួលជោគជ័យ អាមេរិកបានសន្សំប្រាក់បាន មួយពាន់លានដុល្លារក្នុងពេល១០ឆ្នាំ។
ដោយលើកឡើងពីជំហរក្នុងការតាមឲ្យទាន់ការជឿនលឿនទៅមុខនៃប្រព័ន្ធព័ត៌មានវិទ្យា ប្រធានាធិបតី ត្រាំ ក៏បានប្រាប់បណ្ដាមេដឹកនាំក្រុមហ៊ុនធំៗទាំង១៨ ថា លោកចង់បានការផ្លាស់ប្ដូរក្នុងប្រព័ន្ធបច្ចេកវិទ្យារបស់រដ្ឋាភិបាល ដើម្បីបម្រើប្រជាជនឲ្យបានល្អប្រសើរ។ នេះបើតាមការផ្សាយរបស់ទីភ្នាក់ងារព័ត៌មាន Reuters ដែលបានបន្តថា ជំនួបពេលនេះ គឺជាផ្នែកមួយរបស់ក្រុមប្រឹក្សាបច្ចេកវិទ្យាអាមេរិក ដែលលោក ត្រាំ បង្កើតឡើងក្នុងខែឧសភា ដើម្បីធ្វើទំនើបកម្មរដ្ឋាភិបាល។
នាយកក្រុមហ៊ុន Apple លោក Tim Cook និយាយថា អាមេរិកគួរតែមានរដ្ឋាភិបាលដែលទំនើបជាងគេលើលោក ប៉ុន្តែរដ្ឋាភិបាលសព្វថ្ងៃមិនមែនដូច្នោះឡើយ។ ដោយឡែកនាយកប្រតិបត្តិក្រុមហ៊ុន Amazon លោក Jeff Bezos ដែលមានវត្តមានក្នុងកិច្ចប្រជុំនេះដែរបានផ្ដល់យោបល់ថា រដ្ឋបាលប្រធានាធិបតី ត្រាំ គួរតែប្រើប្រាស់ប្រព័ន្ធបច្ចេកវិទ្យាក្នុងវិស័យពាណិជ្ជកម្ម ហ្វឹកហ្វឺនមន្ត្រីឡើងវិញ ក៏ដូចជាបើកការបណ្ដុះបណ្ដាលលើការប្រើប្រាស់គ្រឿងម៉ាស៊ីន។
ក្រៅពីនាយក Apple និង Amazon នាយកក្រុមហ៊ុនបច្ចេកវិទ្យាយក្សផ្សេងទៀតដូចជា Alphabet Inc, IBM Corp, Intel Corp, Qualcomm Inc, Oracle Corp និង Adobe Systems Inc ផងដែរ។ ប៉ុន្តែអ្វីជាការកត់សម្គាល់នោះនាយកក្រុមហ៊ុន Facebook លោក Mark Zuckerberg មិនបានចូលរួមក្នុងជំនួបជាមួយលោក ត្រាំ ឡើយ ទោះជាលោកទទួលបានការអញ្ជើញពីសេតវិមានក៏ដោយ ដ្បិតមានបញ្ហាខ្លះ។
កាលពីឆ្នាំ២០១៦ រដ្ឋាភិបាលអាមេរិកបានចំណាយលុយចំនួនច្រើនជាង៨០លានដុល្លារទៅលើប្រព័ន្ធព័ត៌មានវិទ្យានេះ ខណៈស្ថាប័នខ្លះបន្តប្រើប្រាស់ប្រព័ន្ធដំណើរការដែលមានអាយុជាង៥០ឆ្នាំមកហើយ។ ការណ៍នេះធ្វើឲ្យប្រព័ន្ធកុំព្យូទ័ររបស់រដ្ឋាភិបាលមានលក្ខណៈយឺតយ៉ាវ និងខាតបង់ទឹកប្រាក់ច្រើន។ ជាមួយគ្នានេះ បណ្ដាក្រុមហ៊ុនបច្ចេកវិទ្យាយក្សទាំងអស់ ក៏មានគម្រោងស្នើប្រធានាធិបតី ត្រាំ ឲ្យពិនិត្យមើលការផ្ដល់ទិដ្ឋាការសម្រាប់ទាក់ទាញអ្នកជំនាញព័ត៌មានវិទ្យាមកអាមេរិកកាន់តែច្រើនទៀត៕
Tag:
អាមេរិក
ដូណាល់ ត្រាំ
IT
© រក្សាសិទ្ធិដោយ thmeythmey.com