ជាតិ
ជប៉ុនបន្តជួយកម្ពុជាក្នុងការបោសសម្អាតមីនសរុបទឹកប្រាក់ជាង១១លានដុល្លារ រូបភាព៖ ហ្វេសបុក លោក លីវ សុខុន។
× សៀមរាប៖ កម្មវិធីផ្ទេរ និងប្រគល់សម្ភារៈបច្ចេកទេសបោសសម្អាតមីន ដែលជាជំនួយរបស់រាជរដ្ឋាភិបាលជប៉ុន ត្រូវបានធ្វើឡើងនៅមជ្ឈមណ្ឌលសកម្មភាពកំចាត់មីនកម្ពុជា ហៅកាត់ថា ស៊ីម៉ាក់ ខេត្តសៀមរាប នៅព្រឹកថ្ងៃទី៦ កក្កដា។ តាមរបាយការណ៍របស់ស៊ីម៉ាក់ ជំនួយរបស់រាជរដ្ឋាភិបាលជប៉ុន ដែលធ្វើការប្រគល់នៅពេលនេះ សរុបជាទឹកប្រាក់មានចំនួនជាង ១១លានដុល្លារ។
កម្មវិធីផ្ទេរ និងទទួលសម្ភារបច្ចេកទេសបោសសម្អាតមីន ដែលជាជំនួយរបស់រាជរដ្ឋាភិបាលជប៉ុន ត្រូវបានរៀបចំឡើងនៅភូមិអន្លង់២ ឃុំត្រពាំងធំ ស្រុកប្រាសាទបាគង ខេត្តសៀមរាប នៅស្នាក់ការអង្គការស៊ីម៉ាក់។ ជំនួយរបស់ជប៉ុនមកដល់អង្គការស៊ីម៉ាក់នៅពេលនេះ ជាជំនួយក្នុងដំណាក់កាលទី៧ ដែលសរុបជាទឹកប្រាក់ជាង១១លានដុល្លារនោះ រួមមាន គ្រឿងចក្រកម្ទេចមីនធុនធ្ងន់៩គ្រឿង រថយន្តគ្រប់ប្រភេទ៨៨គ្រឿង ម៉ាស៊ីនរាវមីន៧៨៨គ្រឿង អាវពាក់ការពារសុវត្ថិភាពចំនួន ៤៥០អាវ និងគ្រឿងបន្លាស់ជាច្រើនមុខទៀត។
តាមរបាយការណ៍ដែលអានដោយ លោក ហេង រតនា ប្រតិភូរាជរដ្ឋាភិបាលទទួលបន្ទុកបោសសម្អាតមីនកម្ពុជា បានឲ្យដឹងថា រយៈពេល២៥ឆ្នាំមកនេះ អង្គការស៊ីម៉ាក់ កងយោធពលខេមរភូមិន្ទ និងអង្គការដោះមីនអន្តរជាតិផ្សេងទៀត បានបោសសម្អាតមីននៅលើផ្ទៃដីជាង ១៤០០គីឡូម៉ែត្រក្រឡា រុករកឃើញ និងកម្ទេចចោលគ្រាប់មីន និងយុទ្ធភណ្ឌមិនទាន់ផ្ទុះគ្រប់ប្រភេទ បានជិត ៤លានគ្រាប់ ដែលក្នុងនោះ ស៊ីម៉ាក់ បានបោសសម្អាតលើផ្ទៃដីជាង ៨៥៨គីឡូម៉ែត្រក្រឡា រុករកឃើញ និងកម្ទេចចោលគ្រាប់មីន និងយុទ្ធភណ្ឌមិនទាន់ផ្ទុះ បានជិត ៣លានគ្រាប់។ តាមរបាយការណ៍ដដែល កម្ពុជានៅសល់ផ្ទៃដីដែលមានមីនប្រមាណ ២០០០គីឡូម៉ែត្រក្រឡាទៀត ទើបបោសសម្អាតទាំងស្រុង។
ក្រៅពីពិធីផ្ទេរ និងប្រគល់សម្ភារបោសសម្អាតមីនពីរាជរដ្ឋាភិបាលជប៉ុន ក្នុងនោះក៏មានពិធីសម្ពោធដាក់ឲ្យប្រើប្រាស់នូវសារមន្ទីរសន្តិភាពកម្មភាពកំចាត់មីនផងដែរ។ ឯកអគ្គរដ្ឋទូតជប៉ុនប្រចាំប្រទេសកម្ពុជា លោក ហូរិនូឈិ ហិដេហិសា (Horinouchi Hidenhisa) បានថ្លែងឲ្យដឹងថា ចាប់ពីឆ្នាំ១៩៩៨មក ជប៉ុនបានគាំទ្រយ៉ាងសកម្ម ក្នុងការបោសសម្អាតមីននៅកម្ពុជា។ តាមរយៈនេះ ស៊ីម៉ាក់ជប៉ុន កំពុងជំរុញសកម្មភាពបោសសម្អាតមីនយ៉ាងសកម្មនៅខេត្តបាត់ដំបង និងត្រៀមផ្ទេរបច្ចេកទេសទៅកាន់បណ្តាប្រទេសកំពុងអភិវឌ្ឍន៍មួយចំនួន ដែលមានហានិភ័យស្រដៀងគ្នានេះ។
លោកទូតជប៉ុន រំពឹងថា ជាមួយនឹងជំនួយនេះ ស៊ីម៉ាក់កម្ពុជានឹងពង្រីកសម្មភាពបោសសម្អាត មីនឲ្យកាន់តែមានសុវត្ថិភាព និងប្រសិទ្ធិភាពជាងមុនៗ ដែលនឹងអាចផ្តល់ភាពកក់ក្តៅដល់ ប្រជាជន ដោយគ្មានហានិភ័យដែលបង្កឡើងដោយសារគ្រាប់មីនទៀតឡើយ។
មានប្រសាសន៍ក្នុងពិធីនោះដែរ លោក ទៀ បាញ់ រដ្ឋមន្ត្រីក្រសួងការពារជាតិ បានអរគុណ ដល់រាជរដ្ឋាភិបាលជប៉ុន ទីភ្នាក់ងារកិច្ចសហប្រតិបត្តិការអន្តរជាតិជប៉ុន JICA និងស្ថាប័ន ពាក់ព័ន្ធផ្សេងទៀត ដែលតែងផ្តល់ជំនួយគ្រប់ប្រភេទដល់ប្រជាជន និងរាជរដ្ឋាភិបាលកម្ពុជា នាពេលកន្លង រួមនឹងជំនួយបច្ចេកទេសបោសសម្អាតមីននៅពេលនេះផង។ លោករដ្ឋមន្ត្រី ក៏បានអរគុណដល់អង្គការស៊ីម៉ាក់ ដែលបានកសាងសារមន្ទីរសកម្មភាពកំចាត់មីន ដែលមាន សារសំខាន់ ទុកសម្រាប់យុវជនជំនាន់ក្រោយ សិក្សាស្វែងយល់ពីបញ្ហាមីននៅកម្ពុជា៕
© រក្សាសិទ្ធិដោយ thmeythmey.com