ព័ត៌មានជាតិ
ខ្មែរក្រហម
កំណាព្យ
ONE Championship
ចំណេះដឹងទូទៅ
ពន្យល់ពាក្យ
នយោបាយ
សេដ្ឋកិច្ច
សង្គម
ព័ត៌មានកីឡាជាតិ
វិទ្យុ
ព័ត៌មានសុខភាព
រូបត្លុក
ពីនេះ ពីនោះ
ព័ត៌មានអន្តរជាតិ
នយោបាយ
សិល្បៈ
COVID-19
សេដ្ឋកិច្ច
សង្គម
វប្បធម៌
FIFA
កីឡាអន្តរជាតិ
អត្ថបទពាណិជ្ជកម្ម
បទយកការណ៍/សម្ភាស
ជាតិ
អ្នកនាំពាក្យ៖ ការបង្កើតក្រុមស៊ើបអង្កេតលើករណីលោក កែម ឡី អាចធ្វើបាន លុះត្រាមានដីកាពីតុលាការ
10, Jul 2017 ,
9:39 pm
រូបភាព
រូបសកម្មជន ពលរដ្ឋ និងព្រះសង្ឃ យករូបថតលោក កែម ឡី មកដុតធូបគោរព នៅព្រឹកថ្ងៃទី១០ កក្កដា នៅស្តាម៉ាត ក្បែរសុបបូកគោ ដែលជាកន្លែងឃាតករបាញ់សម្លាប់លោក កែម ឡី
×
ដោយ:
ថ្មីៗ
ភ្នំពេញ៖ សង្គមស៊ីវិល ស្នើឲ្យក្រសួងមហាផ្ទៃ បង្កើតក្រុមការងារស៊ើបអង្កេតឯករាជ្យមួយ ជុំវិញឃាតកម្មលើលោកបណ្ឌិត កែម ឡី។ ជាការឆ្លើយតបក្រសួងមហាផ្ទៃ លើកឡើងថា ការបង្កើតក្រុមស៊ើបស៊ើបអង្កេតអាចធ្វើទៅបាន លុះត្រាមានដីកាស្នើសុំពីតុលាការ។
អ្នកនាំពាក្យក្រសួងមហាផ្ទៃ លោក ខៀវ សុភ័គ បាននិយាយថា សំណើរបស់ក្រុមអង្គការសង្គមស៊ីវិល ដែលស្នើឲ្យបន្តការស៊ើបអង្កេតលើករណីលោក កែម ឡី នេះ វាជារឿងត្រឹមត្រូវ។ ប៉ុន្តែករណីនេះវាមិនស្ថិតនៅក្នុងដែនសមត្ថកិច្ចរបស់ក្រសួងមហាផ្ទៃទៀតឡើយ។ លោក ខៀវ សុភ័គ បន្ថែមថា ករណីឃាតកម្មលើលោក កែម ឡី នេះ គឺមានតែតុលាការទេ ដែលអាចមានសិទ្ធិស្នើសុំស៊ើបអង្កេត។ ហើយក្រសួងមហាផ្ទៃរង់ចាំតែអនុវត្តលើករណីនេះប៉ុណ្ណោះ។
ថ្លែងប្រាប់សារព័ត៌មានថ្មីៗ អ្នកនាំពាក្យរូបនេះបានបញ្ជាក់ដូច្នេះថា៖«យើងបានវេចខ្ចប់សំណុំរឿងលោក កែម ឡី នេះជូនតុលាការហើយ។ ហើយតុលាការក៏បានកាត់ទោសឈ្មោះ អឿត អាង (ជួប សម្លាប់) ដែរ។ ប៉ុន្តែតុលាការក៏ធ្លាប់បានបញ្ជាក់ថា មិនទាន់បញ្ចប់ករណីនេះទេ។ ដូច្នេះតុលាការនៅបន្តរឿងនេះ»។
អ្នកនាំពាក្យសាលាដំបូងរាជធានីភ្នំពេញលោក លី សុផាន់ណា មិនបកស្រាយនឹងសំនួររបស់អ្នកសារព័ត៌មានពាក់ព័ន្ធនឹងករណីលោក កែម ឡី នេះឡើយ ដោយលោកគ្រាន់តែបញ្ជាក់ថា វាស្ថិតនៅនិតិវិធី នៃវិធានការស្រាវជ្រាវសម្ងាត់ នៃការស៊ើបសួរ និងអំណាចឯករាជ្យរបស់តុលាការ។
សមាគម អង្គការជាតិ និងអន្តរជាតិចំនួន១៦៤ ស្នើឲ្យរដ្ឋមន្ត្រីក្រសួងមហាផ្ទៃសម្ដេច ស ខេង បង្កើតគណៈកម្មការស៊ើបអង្កេតឯករាជ្យមួយ ដែលស្របតាមបទដ្ឋានអន្តរជាតិ ដើម្បីបន្តស៊ើបអង្កេតបន្ថែមទៀតជុំវិញករណីឃាតកម្មលោកបណ្ឌិត កែម ឡី ។
មន្ត្រីជាន់ខ្ពស់អង្គការលីកាដូ លោក អំ សំអាត បាននិយាយថា បើទោះជាតុលាការកាត់ទោសជនសង្ស័យឈ្មោះ អឿត អាង ហៅ ជួប សម្លាប់ ក្តី ប៉ុន្តែករណីនេះមិនមែនត្រូវបញ្ចប់ត្រឹមនេះទេ។ លោក អំ សំអាត ដាក់ការសន្និដ្ឋានថា ករណីឃាតកម្មលើលោក កែម ឡី អាចមានមនុស្សមួយចំនួនទៀតជាប់ពាក់ព័ន្ធនឹងការស្លាប់របស់លោក កែម ឡី ដែលតុលាការ និងសមត្ថកិច្ច ត្រូវចាប់ខ្លួនមកផ្ដន្ទាទោសតាមច្បាប់ ដើម្បីផ្ដល់យុត្តិធម៌ដល់គ្រួសារសព។ បើតាមលោក សំអាត មានតែការស៊ើបអង្កេតឯករាជ្យទេ ដែលអាចបង្ហាញពីភាពត្រឹមត្រូវរបស់ប្រព័ន្ធតុលាការ ដើម្បីឲ្យពលរដ្ឋមានជំនឿទុកចិត្តលើប្រព័ន្ធយុត្តិធម៌ក្នុងប្រទេសកម្ពុជា។
ថ្លែងនៅទីតាំងស្ដាម៉ាតក្បែរស្តុបបូកគោ ដែលជាកន្លែងមរណភាព១ឆ្នាំរបស់លោក កែម ឡី នៅព្រឹកថ្ងៃទី១០ កក្កដានេះ លោក អំ សំអាត បានបញ្ជាក់ដូច្នេះថា៖«បើសិនជាយុត្តិធម៌សម្រាប់លោកបណ្ឌិត កែម ឡី នេះ រកមិនទាន់ឃើញទេ បានន័យថាកិច្ចការពារការរស់រានមានជីវិតរបស់ពលរដ្ឋនេះ គឺវាអត់ទាន់បានផ្ដល់ពេញលេញនៅឡើយ។ ដូច្នេះមកទល់ពេលនេះ យើងឃើញថាទោះបីជាមានលោក ជួប សម្លាប់ ត្រូវបានតុលាការកាត់ទោសក៏ដោយ ក៏អ្នកពាក់ព័ន្ធ ឬអ្នកផ្សំគំនិតផ្សេងទៀត ដែលតុលាការបានបំបែកសំណុំរឿង ដើម្បីស៊ើបអង្កេតមកដល់ពេលនេះ មិនទាន់មានលទ្ធផលយ៉ាងណាទេ។ ដូច្នេះវា សបញ្ជាក់ថា យុត្តិធម៌សម្រាប់លោកបណ្ឌិត កែម ឡី មិនទាន់មានទេ»។
គួររម្លឹកថា លោក កែម ឡី ត្រូវបានឃាតករបាញ់សម្លាប់នៅក្នុងស្តាម៉ាតនៃស្ថានីយប្រេងឥន្ធនៈកាល់តិច ស្ថិតនៅម្តុំស្តុបបូកគោ កាលពីថ្ងៃទី១០ ខែកក្កដា ឆ្នាំ២០១៦។ ក្រោយឃាតកម្មនេះកើតឡើង សមត្ថកិច្ចក៏បានឃាត់ខ្លួនបុរសម្នាក់ឈ្មោះ អឿត អាង ហៅ ជួប សម្លាប់ ដែលអះអាងថា មូលហេតុរូបគេបាញ់សម្លាប់លោក កែម ឡី ដោយសារលោក កែម ឡី ខ្ចីលុយ៣០០០ដុល្លារមិនសង។ សាច់ញាតិលោក កែម ឡី បានបដិសេធនូវហេតុផលរបស់ ជួប សម្លាប់។
ជនជាប់ចោទ ជួប សម្លាប់ ត្រូវបានសាលាដំបូងរាជធានីភ្នំពេញ កាត់ទោសឲ្យជាប់ពន្ធនាគារអស់មួយជីវិត ពីបទមនុស្សឃាតគិតទុកជាមុន និងការកាន់កាប់អាវុធខុសច្បាប់កាលពីថ្ងៃទី ២៣ ខែមីនា ឆ្នាំ ២០១៧ ។ ក្រៅពីនេះតុលាការក៏បានបំបែកសំណុំរឿងឃាតកម្មលើលោក កែម ឡី ដើម្បីស៊ើបអង្កេតរកអ្នកជាប់ពាក់ព័ន្ធករណីនេះដែរ៕
សូមចុចត្រង់នេះដើម្បីអានថ្មីៗជាភាសាអង់គ្លេស (Cambodianess.com)
Tag:
ខៀវ សុភ័គ
កែម ឡី
© រក្សាសិទ្ធិដោយ thmeythmey.com
អត្ថបទពេញនិយម
សណ្ដែកកួរ ឡើងដល់៤ម៉ឺនរៀល ក្នុងមួយគីឡូក្រាម
7 ថ្ងៃ
«ប្រទានកម្ម»មានន័យដូចម្តេច?
1 ថ្ងៃ
តើពេលណាដែលគេសរសេរ«បរិបូរ, បរិបូណ៌ និង បរិបូរណ៍»នៅក្នុងសំណេរភាសាខ្មែរ?
2 ថ្ងៃ
«រឭក»,«រំឮក»,«រំលឹក» និង«រម្លឹក» ពាក្យណាត្រឹមត្រូវ?
3 ថ្ងៃ
រវាង «លស់» «លួស» និង «លោះ» មានអត្ថន័យខុសគ្នាដូចម្តេច?
1 សប្តាហ៍
អត្ថបទពេញនិយមបន្ថែម