អន្តរជាតិ
ក្រោយជេរ គីម ជុងអ៊ុន រួច ឌូទើតេ ចង់ឲ្យកូរ៉េខាងជើងក្លាយជាដៃគូសន្ទនាល្អរបស់អាស៊ាន រដ្ឋមន្រ្តីការបរទេសកូរ៉េខាងជើង រី យ៉ុងហូ (ឆ្វេងទី២) ឈរក្បែរប្រធានាធិបតី រ៉ូឌ្រីហ្គោ ឌូទើតេ (រូបភាព Rappler)
× បន្ទាប់ពីបានជេរប្រទេចផ្តាសាមេដឹកនាំកំពូលកូរ៉េខាងជើងលោក គីម ជុងអ៊ុន រួចមក ប្រធានាធិបតីហ្វីលីពីន រ៉ូឌ្រីហ្គោ ឌូទើតេ បានផ្លាស់ប្ដូរឥរិយាបថវិញ និងបានប្រាប់រដ្ឋមន្ត្រីការបរទេសកូរ៉េខាងជើងថា លោកចង់ឲ្យអាស៊ាន និងកូរ៉េខាងជើងក្លាយជាដៃគូល្អ។ នៅសប្ដាហ៍មុន លោក ឌូទើតេ ហៅលោក គីម ជុងអ៊ុន ជា «មនុស្សឆ្គួតឡប់» ព្រោះបន្តបាញ់សាកល្បងមីស៊ីលឥតឈប់ឈរដែលអាចបង្កគ្រោះមហន្តរាយដល់ពិភពលោកទាំងមូល។
គេអាចចាំបាន ប៉ុន្មានថ្ងៃប៉ុណ្ណោះមុនកិច្ចប្រជុំថ្នាក់រដ្ឋមន្ត្រីការបរទេសអាស៊ាន និងកិច្ចប្រជុំពាក់ព័ន្ធមកដល់ ប្រធានអាស៊ានលោក រ៉ូឌ្រីហ្គោ ឌូទើតេ ទិតៀនមេដឹកនាំកូរ៉េខាងជើងពេញៗមាត់ជុំវិញការបន្តផ្គើនសហគមន៍អន្តរជាតិដោយការបាញ់សាកល្បងមីស៊ីល។ ប៉ុន្តែនៅចំពោះមុខរដ្ឋមន្ត្រីការបរទេសកូរ៉េខាងជើង រី យ៉ុងហូ លោក ឌូទើតេ បានបង្ហាញអត្តចរឹតផ្សេង សក្តិសមជាមេដឹកនាំ និងចង់បានទំនាក់ទំនងល្អជាមួយកូរ៉េខាងជើងទៀតផង។
លោក ឌូទើតេ និងលោក រី យ៉ុងហូ បានជួបគ្នាមួយភ្លែតនៅថ្ងៃទី៨ ខែសីហា នៅមុនពិធីបើកកម្មវិធីអបអរខួបទី៥០ ថ្ងៃកំណើតអាស៊ាន។ ខណៈកំពុងចាប់ដៃស្វាគមន៍គ្នាទៅវិញទៅមក លោក ឌូទើតេ បាននិយាយទៅកាន់លោក រី យ៉ុងហូ ថា៖ «យើងរីករាយដែលលោកមានវត្តមាននៅទីនេះ។ សូមអរគុណ។ លោកនឹងត្រូវបានអញ្ជើញមកអាស៊ានជានិច្ច ហើយយើងនឹងក្លាយជាដៃគូសន្ទនាដ៏ល្អ»។ នេះបើតាមការផ្សាយរបស់សារព័ត៌មាន The Manila Bulletin ។
ចំណែករដ្ឋមន្ត្រីការបរទេសក៏ឆ្លើយតបវិញ ដោយបានអបអរសាទរអាស៊ាននាឱកាសខួបទី៥០ របស់ខ្លួនដែរ។ អំឡុងពេលស្នាក់នៅរដ្ឋធានីម៉ានីល លោក រី យ៉ុងហូ បានចូលរួមក្នុងកិច្ចប្រជុំវេទិកាតំបន់អាស៊ាន (ARF) ។ វេទិកាតំបន់អាស៊ាន ដែលផ្ដោតសំខាន់លើបញ្ហាសន្តិសុខ គឺជាកិច្ចប្រជុំអន្តរជាតិតែមួយគត់ដែលកូរ៉េខាងជើងតែងមានវត្តមានជាប់លាប់ ខណៈដែលរដ្ឋមន្ត្រីការបរទេសអាមេរិក ចិន ជប៉ុន កូរ៉េខាងត្បូង និងអូស្ត្រាលី ក៏មានវត្តមានដូចគ្នាដែរ។
ជាមួយការប្រើប្រាស់ពាក្យ «ដៃគូសន្ទនាល្អ» លោក ឌូទើតេ ទំនងចង់សំដៅដល់ទំនាក់ទំនងដែលមានស្រាប់របស់អាស៊ានជាមួយកូរ៉េខាងជើង ក្នុងការដោះស្រាយបញ្ហាផ្សេងៗដូចជាករណីកិច្ចប្រជុំ ARF ជាដើម។ យ៉ាងណាក្ដី ទង្វើព្រហើនរបស់កូរ៉េខាងជើង ក៏រងការរិះគន់ខ្លាំងពីសំណាក់អាស៊ានដែរ។ អំឡុងពេលកិច្ចប្រជុំនោះ គ្មានរដ្ឋមន្ត្រីអាស៊ានណាជួបជាមួយរដ្ឋមន្ត្រីកូរ៉េខាងជើងឡើយ លើកលែងតែរដ្ឋមន្ត្រីការបរទេសហ្វីលីពីនដែលជាប្រធានប្ដូរអាស៊ានប៉ុណ្ណោះ។
រដ្ឋមន្ត្រីការបរទេសអាស៊ានទាំង១០ បានបង្ហាញការព្រួយបារម្ភចំពោះការកើនឡើងភាពតានតឹងនៅឧបទ្វីបកូរ៉េ ដែលកើតចេញពីការបាញ់មីស៊ីលរបស់កូរ៉េខាងជើង។ អាស៊ានចាត់ទុកសកម្មភាពរបស់កូរ៉េខាងជើងជាការគំរាមសន្តិភាព សន្តិសុខ និងស្ថិរភាពតំបន់ និងពិភពលោកទាំងមូល។ ក្នុងន័យនេះ អាស៊ានទទូចឲ្យកូរ៉េខាងជើងអនុវត្តឲ្យបានពេញលេញសេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ៕
Tag:
កូរ៉េខាងជើង
ហ្វីលីពីន
រ៉ូឌ្រីហ្គោ ឌូទើតេ
គីម ជុងអ៊ុន
© រក្សាសិទ្ធិដោយ thmeythmey.com