អន្តរជាតិ
ឌូទើតេ ផ្ដល់រង្វាន់៤ម៉ឺនដុល្លារដល់អ្នកចាប់ប៉ូលិសចូលដៃជាមួយអ្នកនយោបាយជួញដូរគ្រឿងញៀន
× ប្រធានាធិបតីហ្វីលីពីន រ៉ូឌ្រីហ្គោ ឌូទើតេ បានប្រកាសផ្ដល់រង្វាន់ចំនួនបួនម៉ឺនដុល្លារសម្រាប់ការចាប់ប៉ូលិសដែលចូលដៃចូលជើងជាមួយអ្នកនយោបាយដែលជួញដូរគ្រឿងញៀន។ ចំពោះមុខមន្ត្រីប៉ូលិសជាច្រើន លោក ឌូទើតេ បញ្ជាក់ថា ទឹកប្រាក់នេះនឹងប្រគល់ឲ្យភ្លាមៗ មិនថាប៉ូលិសជាប់សង្ស័យនោះនៅមានជីវិត ឬអស់ជីវិតឡើយ។ លោក ឌូទើតេ ប្រកាសដូចនេះ ក្រោយមានករណីសម្លាប់អភិបាលក្រុងម្នាក់ ដែលជាប់ឈ្មោះក្នុងបញ្ជីឈ្មួញករណីគ្រឿងញៀន។
មកទល់ពេលនេះ មនុស្សរាប់ពាន់នាក់ហើយបានបាត់បង់ជីវិតក្នុងសង្គ្រាមគ្រឿងញៀនរបស់ប្រធានាធិបតី រ៉ូឌ្រីហ្គោ ឌូទើតេ ។ ក្រៅពីប្រជាជនសាមញ្ញ គេសង្កេតឃើញមានអ្នកនយោបាយ និងអភិបាលក្រុងរូបផងដែរដែលក្លាយជាជនរងគ្រោះនៃយុទ្ធនាការបង្ក្រាបគ្រឿងញៀនរបស់លោក ឌូទើតេ ។ ឥឡូវនេះ លោក ឌូទើតេ ក៏ត្រៀមបោសសម្អាតក្នុងជួរប៉ូលិសវិញម្ដង ដោយអះអាងថាមានប៉ូលិសខ្លះជួយឈ្មួញគ្រឿងញៀនទៀតផង។
ឆ្លៀតពេលទស្សនកិច្ចទៅកាន់ស្នងការដ្ឋានប៉ូលិសជាតិនៅថ្ងៃទី៩ ខែសីហា លោក ឌូទើតេ បានប្រាប់ឲ្យប៉ូលិសទាំងអស់ចាប់ខ្លួន ឬសម្លាប់មន្ត្រីប៉ូលិសណាដែលជាប់ទាក់ទងនឹងឈ្មួញគ្រឿងញៀន ជាថ្នូរនឹងប្រាក់រង្វាន់ចំនួនបួនម៉ឺនដុល្លារ។ ដើម្បីបង្ហាញជាភស្តុតាងនោះ ប្រធានាធិបតីហ្វីលីពីនរូបនេះក៏បានប្រគល់ប្រាក់រង្វាន់ចំនួនបួនម៉ឺនដុល្លារឲ្យប៉ូលិសដែលចូលរួមក្នុងប្រតិបត្តិការសបង្ក្រាបឈ្មួញគ្រឿងញៀនឈ្មោះ Reynaldo Parojinog មានតំណែងជាអភិបាលក្រុងកាលពីថ្ងៃទី៣០ ខែកក្កដា។
យោងតាមទីភ្នាក់ងារព័ត៌មាន AFP លោក ឌូទើតេ អះអាងថា មានមន្ត្រីប៉ូលិសច្រើនទៀតមានជាប់ពាក់ព័ន្ធនឹងអភិបាលក្រុងខាងលើ ហើយលោកនឹងផ្ដល់រង្វាន់សម្រាប់ក្បាលមួយ។ លោកបញ្ជាក់ទៅកាន់ប៉ូលិសហ្វីលីពីនដូច្នេះថា៖ «អ្នកទាំងអស់គ្នាអាចសុំច្បាប់ដើម្បីស្វែងរកពួកគេបាន ហើយខ្ញុំនឹងនិយាយតែបន្តិចប៉ុណ្ណោះ ដើម្បីទុកពេលឲ្យអ្នកទាំងអស់គ្នាមានឱកាសចាប់ខ្លួនពួកគេ តែបើសម្លាប់ល្អជាង»។
សូមបញ្ជាក់ថា អភិបាលក្រុង Ozamiz លោក Parojinog និងភរិយា ព្រមទាំងកូនប្រុសម្នាក់ផង ត្រូវបានប៉ូលិសបាញ់សម្លាប់ក្នុងប្រតិបត្តិការព្រឹកព្រហាមថ្ងៃទី៣០ ខែកក្កដា។ ប៉ូលិសហ្វីលីពីននិយាយថា អភិបាលក្រុងរូបនេះ និងអង្គរក្សរបស់ខ្លួនបាញ់តដៃប៉ូលិស ទើបប៉ូលិសបាញ់ការពារខ្លួន។ ប៉ុន្តែមេធាវីលោក Parojinog ដែលលោក ឌូទើតេ ចោទថាជាឈ្មួញគ្រឿងញៀនដ៏ធំ ឆ្លើយវិញថា លោក Parojinog មិនបានតដៃឡើយ។
យ៉ាងណាមិញ លោក ឌូទើតេ បានប្រកាសលើកលែងទោសមន្ត្រីប៉ូលិសទាំងអស់ដែលជាប់ពាក់ព័ន្ធការស្លាប់របស់លោក Parojinog ។ ប្រធានាធិបតីមាត់ឆៅរូបនេះសង្កត់ធ្ងន់ថា បើមន្ត្រីប៉ូលិសទាំងនោះត្រូវរកឃើញថាមានកំហុសពីបទសម្លាប់មនុស្ស ចាំខ្ញុំលើកលែងទោសឲ្យវិញ។ ដោយសារបញ្ហានេះ លោក ឌូទើតេ រងការរិះគន់យ៉ាងខ្លាំងពីសំណាក់លោកខាងលិច ជាមួយនឹងការព្រួយបារម្ភចំពោះការរំលោភសិទ្ធិមនុស្សធ្ងន់ធ្ងរ ប៉ុន្តែលោកមិនបានខ្វល់់ខ្វាយឡើយ៕
Tag:
ហ្វីលីពីន
រ៉ូឌ្រីហ្គោ ឌូទើតេ
គ្រឿងញៀន
© រក្សាសិទ្ធិដោយ thmeythmey.com