អន្តរជាតិ
មេទ័ពអាកាសចិន៖ «សមុទ្រជប៉ុន» មិនមែនរបស់ជប៉ុនទេ ឧត្តមសេនីយ៍ Ma Xiaotian មេបញ្ជាការកងទ័ពជើងអាកាសនៃកងទ័ពរំដោះប្រជាជនចិន (រូបភាព Xinhua)
× ប្រមុខកងទ័ពអាកាសចិន នៅថ្ងៃទី១០ ខែសីហា បាននិយាយការពារសកម្មភាពយោធាចិននៅសមុទ្រជប៉ុនដែលកើនឡើងខ្លាំងនារយៈពេលចុងក្រោយ។ ជប៉ុន បានបង្ហាញការព្រួយបារម្ភយ៉ាងខ្លាំងចំពោះសកម្មភាពរបស់យោធាជើងទឹកចិននៅតំបន់សមុទ្រក្បែរខ្លួន ហើយសកម្មភាពយោធានេះនឹងនៅបន្តកើនឡើងនៅពេលខាងមុខ។ ប៉ុន្តែមេទ័ពជើងអាកាសចិនប្រកាសថា សមុទ្រជប៉ុនមិនមែនកម្មសិទ្ធិរបស់ជប៉ុនតែម្នាក់ឡើយ។
វត្តមានញឹកញាប់នៃនាវា និងយន្តហោះចម្បាំងមកពីកងទ័ពជើងទឹកចិននៅតំបន់សមុទ្រជប៉ុន ដែលនៅចន្លោះចិន ឧបទ្វីបកូរ៉េ ជប៉ុន និងរុស្ស៊ី ធ្វើឲ្យជប៉ុនបារម្ភខ្លាំង។ ក្នុងរបាយការណ៍ការពារជាតិចេញផ្សាយថ្ងៃទី៨ ខែសីហា ជប៉ុនបានព្រមានពីការកើនឡើងសកម្មភាពយោធាចិននៅទីនោះ ហើយជឿថា នេះជាសកម្មភាពវាតទីរបស់ចិនចូលមកតំបន់សមុទ្រចិនខាងកើត និងប៉ាស៊ីហ្វិក ជាទីដែលជប៉ុនកំពុងគ្រប់គ្រងបណ្ដុំកោះជាច្រើន។
យ៉ាងណាមិញ ឧត្តមសេនីយ៍ Ma Xiaotian មេបញ្ជាការកងទ័ពជើងទឹកនៃកងទ័ពរំដោះប្រជាជន បានទាត់ចោលរបាយការណ៍របស់ជប៉ុន និងចោទជប៉ុនថា និយាយពន្លើសការពិតទៀតផង។ ថ្លែងក្នុងកម្មវិធីមួយនៅថ្ងៃទី១០ ខែសីហា លោក Ma Xiaotian អះអាងថា «សមុទ្រជប៉ុន»មិនមែនជារបស់ជប៉ុនឡើយ ហើយកងទ័ពអាកាសចិននឹងធ្វើសមយុទ្ធនៅទីនោះទៀត ព្រោះកងទ័ពចិនមិនមែនល្បាតតែដីគោក ហើយមិនហោះទៅសមុទ្រទេ។
យោងតាមទីភ្នាក់ងារព័ត៌មាន Reuters ដែលស្រង់ប្រភពទូរទស្សន៍ហុងកុង ប្រមុខកងទ័ពអាកាសចិនបញ្ជាក់ថា សកម្មភាពយោធាចិននៅតំបន់សមុទ្រជប៉ុនមិនមានច្រើនដូចការអះអាងរបស់ជប៉ុនឡើយ។ តែបើតាមរបាយការណ៍របស់ជប៉ុន យន្តហោះជប៉ុនបានហោះស្កាត់យន្តហោះចិនយ៉ាងញឹកញាប់ក្នុងឆ្នាំ២០១៧ ហើយសកម្មភាពរបស់ទ័ពអាកាស និងទ័ពជើងទឹកចិននៅតំបន់សមុទ្រចន្លោះចិន និងជប៉ុន ក៏អាចកើនឡើងថែមទៀតក្នុងឆ្នាំខាងមុខៗ។
បញ្ហាដែនទឹកនេះ គឺជាមូលហេតុដែលធ្វើឲ្យទំនាក់ទំនងរវាងចិន និងជប៉ុនរកាំរកូសមិនចេះចប់ បន្ថែមពី ជម្លោះដែនកោះនៅសមុទ្រចិនខាងកើត និងស្នាមរបួសផ្លូវចិត្តបន្សល់ទុកតាំងពីសម័យសង្គ្រាម។ ការកើនឡើងសកម្មភាពយោធាចិន ដែលស្ដែងចេញតាមរយៈការធ្វើទំនើបកម្មកងទ័ព រឹតតែធ្វើស្ថានការណ៍នៅតំបន់សមុទ្រជាប់ចិន និងជប៉ុន កើតឡើងកម្ដៅថែមទៀត។ ផ្លូវទឹកនៅទីនោះ ក្លាយជាច្រកធ្វើដំណើររបស់នាវាចិនឆ្ពោះទៅកាន់មហាសមុទ្រប៉ាស៊ីហ្វិក។
ជប៉ុនពិតជាមិនស្ងប់ចិត្តឡើយជុំវិញការធ្វើទំនើបកម្មវិស័យយោធារបស់ខ្លួន ខណៈដែលភាគីទាំងពីរមានជម្លោះដែនដីជាមួយគ្នានោះ។ ប៉ុន្មានឆ្នាំចុងក្រោយនេះ ចិនបានសម្រុកកែប្រែរចនាសម្ព័ន្ធយោធា ពង្រឹងឥទ្ធិពលយោធាឥតឈប់ឈរ ខណៈដែលជប៉ុនឯណោះមិនអាចពង្រឹងសមត្ថភាពយោធាតាមការចង់បានឡើយ ព្រោះតែធម្មនុញ្ញសន្តិភាពរបស់ខ្លួន។ យ៉ាងណាក្ដី ជប៉ុនកំពុងគិតចង់កែប្រែធម្មនុញ្ញនេះ ដើម្បីសម្របខ្លួនតាមសភាពការណ៍៕
Tag:
ចិន
ជប៉ុន
Ma Xiaotian
© រក្សាសិទ្ធិដោយ thmeythmey.com