អន្តរជាតិ
ប្រធានាធិបតីនីហ្សេរីយ៉ាត្រៀមត្រឡប់ទៅស្រុកវិញ ក្រោយសម្ងំព្យាបាលជំងឺនៅអង់គ្លេសអស់បីខែ
× ប្រធានាធិបតីនីហ្សេរីយ៉ា Muhammadu Buhari និយាយថា លោកត្រៀមខ្លួនត្រឡប់ទៅប្រទេសវិញ បន្ទាប់ពីទទួលការព្យាបាលជំងឺនៅអង់គ្លេសអស់ពេលបីខែរួចមក។ ប្រធានាធិបតីវ័យចំណាស់រូបនេះ កំពុងរង់ចាំការអនុញ្ញាតពីក្រុមគ្រូពេទ្យដើម្បីចាកចេញ និងធ្វើដំណើរទៅកាន់នីហ្សេរីយ៉ា ដើម្បីដឹកនាំប្រទេសបន្តទៀត ព្រោះលោកអវត្តមានពីប្រទេសអស់ពេលយូរគួរសមដែរហើយ។
សុខភាពប្រធានាធិបតីនីហ្សេរីយ៉ា Muhammadu Buhari បានប្រសើរឡើងច្រើនហើយ ក្រោយទទួលការព្យាបាលយកចិត្តទុកដាក់ពីសំណាក់ក្រុមគ្រូពេទ្យអង់គ្លេសអស់ពេលបីខែ។ លោក Buhari និយាយថា លោកមានអារម្មណ៍ប្រសើរឡើងវិញ ហើយអាចធ្វើដំណើរទៅកាន់ប្រទេសកំណើតបាន បន្ទាប់ពីសុំច្បាប់ពិនិត្យសុខភាពមកនោះ។ យ៉ាងណាក្ដី លោក Buhari ត្រូវរង់ចាំការសម្រេចចិត្តរបស់ក្រុមគ្រូពេទ្យសិន។
លោក Buhari ដែលមានវ័យ៧៤ឆ្នាំ ទទួលការព្យាបាលជំងឺដែលមិនត្រូវបានប្រាប់ឈ្មោះតាំងពីខែឧសភាមកម្ល៉េះ។ អវត្តមានពីប្រទេស និងការលាក់បាំងពីបញ្ហាសុខភាពរបស់លោក ធ្វើឲ្យស្ថានការណ៍នៅនីហ្សេរីយ៉ាងច្រួលច្របល់យ៉ាងខ្លាំង និងមានការធ្វើបាតុកម្មទៀតផង។ លើសពីនោះ គេក៏ឃើញមានការទាមទារឲ្យលោក Buhari លាលែងពីតំណែងទៀតផង ដ្បិតលោកមិនមានសុខភាពល្អគ្រប់គ្រាន់ដើម្បីដឹកនាំប្រទេសឡើយ។
យោងតាមសារព័ត៌មាន Al Jazeera លោក Buhari បាននិយាយក្នុងសេចក្ដីថ្លែងការណ៍កាលពីចុងសប្ដាហ៍ថា លោកមានសុខភាពល្អវិញហើយ និងអាចត្រឡប់ទៅផ្ទះវិញបានទៀតផង។ ដើម្បីបញ្ជាក់ពីការល្អប្រសើរនៃសុខភាពលោក Buhari ការិយាល័យប្រធានាធិបតីនីហ្សេរីយ៉ាបានបញ្ចេញរូបថតមួយសន្លឹករបស់លោក Buhari ដែលមានមនុស្សមួយចំនួនឈរអមជុំវិញ កំពុងឈរញញឹមស្រស់ស្រាយទៀត។
ខណៈដែលលោក Buhari ចំណាយពេលច្រើននៅអង់គ្លេសដើម្បពិនិត្យជំងឺ នៅនីហ្សេរីយ៉ាឯណោះ ក៏មានសំណើឲ្យមានការផ្លាស់ប្ដូរលោកតែម្ដង ប៉ុន្តែមន្ត្រីជាន់ខ្ពស់រដ្ឋាភិបាលបានទាត់ចោលសំណើ និងរង់ចាំការត្រឡប់វិលវិញរបស់លោក Buhari ដើម្បីដឹកនាំប្រទេស។ ចំណែកខាងយោធាវិញ បណ្ដាថ្នាក់ដឹកនាំកងទ័ពបានប្រាប់ឲ្យទាហានទាំងអស់រក្សាភាពស្មោះត្រង់នឹងប្រធានាធិបតី ទោះលោកកំពុងអវត្តមានក្ដី។
ក្នុងឆ្នាំ២០១៧ លោក Buhari បានចំណាយពេលនៅបរទេសច្រើនជាងនៅក្នុងស្រុកទៅទៀត។ ចន្លោះខែមករា ដល់ខែមីនា ប្រធានាធិបតីរូបនេះបានសុំច្បាប់ទៅព្យាបាលជំងឺ។ មកដល់ខែឧសភា លោកក៏សុំច្បាប់ម្ដងទៀតដោយប្រើប្រាស់មូលហេតុដដែល។ អំឡុងអវត្តមានទាំងពីរទាំងពីរដងនេះ លោកបានតែងតាំងអនុប្រធានាធិបតី Yemi Osinbajo ជាប្រមុខរដ្ឋស្ដីទី៕
Tag:
នីហ្សេរីយ៉ា
អង់គ្លេស
Muhammadu Buhari
© រក្សាសិទ្ធិដោយ thmeythmey.com