អន្តរជាតិ
មូន ចេអ៊ីន៖ អាមេរិកចង់វាយកូរ៉េខាងជើង ត្រូវសុំភ្លើងខៀវពីកូរ៉េខាងត្បូងសិន ប្រធានាធិបតីកូរ៉េខាងត្បូង មូន ចេអ៊ីន ចាប់ដៃជាមួយនាយសេនាធិការចម្រុះកងទ័ពអាមេរិក ឧត្តមសេនីយ៍ ចូសេហ្វ ដាន់ហ្វត (រូបភាព៖ Reuters)
× ប្រធានាធិបតីកូរ៉េខាងត្បូង លោក មូន ចេអ៊ីន បានប្រកាសថា អន្តរាគមន៍យោធាប្រឆាំងកូរ៉េខាងជើង នឹងមិនអាចកើតឡើងបានទេ បើគ្មានការអនុញ្ញាតពីកូរ៉េខាងត្បូង។ លោក មូន ចេអ៊ីន ប្រកាសដូចនេះ ខណៈដែលអាមេរិកបានគំរាមវាយប្រហារកូរ៉េខាងជើង បើកូរ៉េខាងជើងហ៊ានបាញ់មីស៊ីលដាក់កោះហ្គាមនោះ។ ប្រធានាធិបតីកូរ៉េខាងត្បូងរូបនេះនិយាយទៀតថា លោកនឹងព្យាយាមធ្វើគ្រប់យ៉ាងដើម្បីទប់ស្កាត់សង្គ្រាមនេះ។
សង្គ្រាមពាក្យសម្ដីរវាងអាមេរិក និងកូរ៉េខាងជើង បានឡើងដល់កម្រិតមួយដែលពិបាកស្មាន។ កូរ៉េខាងជើងបានរៀបចំផែនការបាញ់មីស៊ីលដាក់កោះហ្គាមរួចហើយ ទោះជាប្រធានាធិបតីអាមេរិក ដូណាល់ ត្រាំ បានប្រកាសក្ដែងៗថា កូរ៉េខាងជើងនឹងមានបញ្ហា បើហ៊ានប៉ះពាល់កោះហ្គាម។ យ៉ាងណាមិញ សម្ព័ន្ធមិត្តអាមេរិក គឺកូរ៉េខាងត្បូង មិនមានបំណងធ្វើសង្គ្រាមនេះទេ ហើយក៏មិនឲ្យសង្គ្រាមនេះកើតឡើងបានដែរ។
យោងតាមទីភ្នាក់ងារព័ត៌មាន Yonhap ប្រធានាធិបតីកូរ៉េខាងត្បូង មូន ចេអ៊ីន បាននិយាយថា សង្គ្រាមប្រឆាំងកូរ៉េខាងជើងគឺមិនអាចធ្វើទៅរួចទេ បើកូរ៉េខាងត្បូងមិនព្រមនោះ។ ថ្លែងក្នុងខួបលើកទី៧២ ថ្ងៃរំដោះប្រទេសពីការគ្រប់គ្រងរបស់ជប៉ុននៅថ្ងៃទី១៥ ខែសីហា លោក មូន ចេអ៊ីន បញ្ជាក់ថា មានតែកូរ៉េខាងត្បូងតែមួយគត់ដែលអាចសម្រេចចិត្តលើអន្តរាគមន៍យោធានេះ ហើយគ្មាននរណាដែលអាចធ្វើសង្គ្រាមប្រឆាំងកូរ៉េខាងជើងដោយគ្មានភ្លើងខៀវរបស់កូរ៉េខាងត្បូងដែរ។
នេះគឺជាសារច្បាស់ៗរបស់លោក មូន ចេអ៊ីន ផ្ញើទៅឲ្យប្រធានាធិបតី ត្រាំ ដែលចង់ប្រើកម្លាំងទ័ពដាក់កូរ៉េខាងជើង។ លោក ត្រាំ បានព្រមានកូរ៉េខាងជើងម្ដងជាពីរដងថា លោកនឹងមិនរារែកក្នុងការធ្វើសង្គ្រាមឡើយ បើរដ្ឋកុម្មុយនីស្តមួយនេះនៅតែមិនបោះបង់មហិច្ឆតានុយក្លេអ៊ែរ ហើយបាញ់មីស៊ីលដាក់កោះហ្គាមនោះ។ លើសពីនោះ លោក ត្រាំ ក៏គំរាមទៀតថា កងទ័ពអាមេរិកចាំតែបញ្ជារបស់លោកប៉ុណ្ណោះ។
យ៉ាងណាក្ដី លោក មូន ចេអ៊ីន ដែលប្រកាន់ជំហរទន់ភ្លន់ដាក់កូរ៉េខាងជើង ហាក់ដើរលើផ្លូវបញ្ច្រាសជាមួយសមភាគីអាមេរិករបស់លោក។ ប្រធានាធិបតីកូរ៉េខាងត្បូងរូបនេះ នៅតែចង់បានការចរចាដើម្បីបញ្ចប់បញ្ហា ទោះជាផ្លូវនេះរដាក់រដុបយ៉ាងណាក៏ដោយចុះ។ ក្រុងសេអ៊ូលក៏ព្យាយាមឲ្យអស់ពីលទ្ធភាពដើម្បីទប់ស្កាត់ជម្លោះនេះ ហើយបានទទូចឲ្យក្រុងព្យុងយ៉ាងត្រឡប់ចូលតុចរចាវិញ ព្រោះជាផ្លូវតែមួយគត់ក្នុងការរក្សាសន្តិភាពនៅឧបទ្វីកូរ៉េ។
អ្វីគួរឲ្យកត់សម្គាល់នោះ លោក មូន ចេអ៊ីន ក៏សន្យាជួយកូរ៉េខាងជើង បើកូរ៉េខាងជើងដើរលើផ្លូវត្រូវវិញ។ លោកសង្កត់ធ្ងន់ថា កូរ៉េខាងត្បូងមិនចង់ផ្ដួលរំលំរបបដឹកនាំកូរ៉េខាងជើងឡើយ តែនឹងជួយអភិវឌ្ឍសេដ្ឋកិច្ចថែមទៀត ក្នុងករណីកូរ៉េខាងជើងបោះបង់នុយក្លេអ៊ែរ។ ឆ្លៀតឱកាសនោះ លោក មូន ក៏អញ្ជើញកូរ៉េខាងជើងឲ្យចូលរួមព្រឹត្តិការណ៍អូឡាំពិករដូវត្រជាក់នៅទីក្រុង PyeongChang ដែលលោកចាត់ទុកជាឱកាសពិសេសសម្រាប់ការកសាងសន្តិភាព៕
Tag:
មូន ចេអ៊ីន
កូរ៉េខាងត្បូង
កូរ៉េខាងជើង
អាមេរិក
© រក្សាសិទ្ធិដោយ thmeythmey.com