អន្តរជាតិ
ឌូទើតេ គំរាមបាញ់សកម្មជនសិទ្ធិមនុស្ស បើហ៊ានរារាំងសង្គ្រាមប្រឆាំងគ្រឿងញៀន ប្រធានាធិបតីហ្វីលីពីន រ៉ូឌ្រីហ្គោ ឌូទើតេ (រូបភាព៖ Rappler)
× ប្រធានាធិបតីហ្វីលីពីន រ៉ូឌ្រីហ្គោ ឌូទើតេ បានគំរាមបាញ់សម្លាប់សម្មជនការពារសិទ្ធិមនុស្ស បើពួកគេហ៊ានបង្កឧបសគ្គរាំងស្ទះក្នុងយុទ្ធនាការបង្ក្រាបគ្រឿងញៀនរបស់លោក។ លោក ឌូទើតេ បានចោទសកម្មជនការពារសិទ្ធិមនុស្សថាជួយការពារឧក្រិដ្ឋជន ខណៈដែលក្រុមការពារសិទ្ធិមនុស្សទាំងនោះកំពុងស៊ើបអង្កេតករណីរំលោភសិទ្ធិមនុស្សក្នុងសង្គ្រាមគ្រឿងញៀនដែលសម្លាប់មនុស្សអស់៧ពាន់នាក់មកហើយនោះ។
ការបាញ់សម្លាប់មនុស្សឆៅៗក្នុងសង្គ្រាមបោសសម្អាតគ្រឿងញៀនរបស់ប្រធានាធិបតី រ៉ូឌ្រីហ្គោ ឌូទើតេ ធ្វើឲ្យលោករងការរិះគន់យ៉ាងខ្លាំងពីសំណាក់អង្គការ និងគណៈកម្មការការពារសិទ្ធិមនុស្សទាំងក្នុងប្រទេស និងក្រៅប្រទេស។ ប៉ុន្តែលោក ឌូទើតេ មិនបានខ្វល់ខ្វាយពាក្យរិះគន់ទាំងនោះឡើយ ហើយថែមទាំងគំរាមបាញ់សកម្មជនសិទ្ធិមនុស្សដែលរារាំងការងាររបស់លោកទៀតផង ដោយអះអាងថាលោកចង់ឲ្យពួកគេស្គាល់អ្វីជាការបំពានសិទ្ធិមនុស្សពិតប្រាកដ។
ថ្លែងក្នុងកម្មវិធីមួយនៅថ្ងៃទី១៦ ខែសីហា ប្រធានាធិបតីហ្វីលីពីនដៃឆៅរូបនេះនិយាយថា លោកនឹងចេញបញ្ជាឲ្យប៉ូលិសបាញ់សកម្មជនទាំងឡាយណាដែលជាប់ពាក់ព័ន្ធរឿងការពារសិទ្ធិមនុស្ស ក៏ដូចជាសកម្មជនទាំងឡាយដែលបង្កការរាំងស្ទះដល់ប្រតិបត្តិការរបស់ប៉ូលិស។ លោក ឌូទើតេ ចាត់ទុកការបាញ់សកម្មជនការពារសិទ្ធិមនុស្សនេះ ជាមេរៀនដើម្បីបង្ហាញថាអ្វីជាការរំលោភសិទ្ធិមនុស្សជាក់ស្ដែងនោះ។ នេះបើយោងតាមការផ្សាយរបស់សារព័ត៌មាន Rappler ។
តាមពិតទៅ ក្រុមសកម្មជនការពារសិទ្ធិមនុស្សបានបង្ហាញការព្រួយបារម្ភរបស់ខ្លួនតាំងពីការចាប់ផ្ដើមយុទ្ធនាការបង្ក្រាបឧក្រិដ្ឋជនគ្រឿងញៀនមក។ ប៉ុន្តែលោក ឌូទើតេ មិនបានយកត្រចៀកស្ដាប់ឡើយ ហើយថែមទាំងបង្ហាញការមិនសប្បាយចិត្តទៀតផង។ មិនសប្បាយចិត្តត្រង់ថា ពួកគេថ្កោលទោសចំណាត់ការរបស់លោក តែមិនបានរិះគន់ឈ្មួញរត់ពន្ធ និងអ្នកប្រើប្រាស់គ្រឿងដែលលោកចាត់ទុកជាអ្នកបង្កបញ្ហានោះឡើយ។
ឆ្លៀតពេលនោះ លោក ឌូទើតេ ក៏បានលើកឡើងពីករណីរំលោភ និងសម្លាប់ក្មេងអាយុមួយឆ្នាំ ដែលលោកអះអាងគ្មានក្រុមសិទ្ធិមនុស្សចេញមកថ្កោលទោសសោះ និងបានចោទជាសំណួរថា ឯណាទៅសិទ្ធិមនុស្ស? លោកបានរិះគន់ខ្លាំងថា ក្រុមការពារសិទ្ធិមនុស្សនេះ មិននិយាយអ្វីសោះលើបញ្ហានេះ តែដល់ពេលឧក្រិដ្ឋជនត្រូវបានសម្លាប់ក្នុងពេលប្រតិបត្តិការបង្ក្រាបគ្រឿងញៀន ពួកគេបែរជាចេញមុខនិយាយថានេះជាការរំលោភសិទ្ធិមនុស្សទៅវិញ។
ជាមួយគ្នានោះ ប្រធានាធិបតីហ្វីលីពីនរូបនេះ ក៏គំរាមបើកការស៊ើបអង្កេតលើក្រុមការពារសិទ្ធិមនុស្សទាំងឡាយ ដោយលោកចោទថាពួកគេមានគំនិតក្បត់។ លោក ឌូទើតេ គំរាមបែបនេះ ស្របពេលដែលក្រុមសិទ្ធិមនុស្សកំពុងស៊ើបអង្កេតសង្គ្រាមគ្រឿងញៀនរបស់លោក។ លោកក៏បានរិះគន់ប្រធានគណៈកម្មការសិទ្ធិមនុស្សហ្វីលីពីន Chito Gascon ដែលប្រឆាំងរូបលោកថាជាមនុស្សស្លេកស្លាំងផងដែរ៕
Tag:
ហ្វីលីពីន
រ៉ូឌ្រីហ្គោ ឌូទើតេ
គ្រឿងញៀន
សិទ្ធិមនុស្ស
© រក្សាសិទ្ធិដោយ thmeythmey.com