ជាតិ
រាជបណ្ឌិត្យសភាកម្ពុជា អង្វរអ្នកនិពន្ធ កុំយកគំនិតកំហឹងវណ្ណៈដាក់ក្នុងស្នាដៃរបស់ខ្លួន
× ភ្នំពេញ៖ រាជបណ្ឌិត្យសភាកម្ពុជា ដែលជាស្ថាប័នអ្នកប្រាជ្ញបង្កើតឡើងដោយរដ្ឋាភិបាលកម្ពុជា បានអង្វរដល់អ្នកនិពន្ធ កុំដាក់បញ្ចូលគំនិតកំហឹងវណ្ណៈនៅក្នុងស្នាដៃរបស់ខ្លួន។ ការស្នើសុំនេះ គឺបន្ទាប់ពីស្ថាប័នមួយនេះ យល់ឃើញថា អ្នកនិពន្ធ ជាបុព្វហេតុសំខាន់មួយ ដែលជំរុញឲ្យមានសង្គ្រាមវណ្ណៈ តាមរយៈសំណេរ ឬស្នាដៃរបស់ពួកគេ។
លោក សោម សុមុនី ប្រធានវិទ្យាស្ថានមនុស្សសាស្ត្រ និងវិទ្យាសាស្ត្រសង្គមនៃរាជបណ្ឌិត្យសភាកម្ពុជា បានថ្លែងថា ការដាក់បញ្ចូលកំហឹងវណ្ណៈក្នុងស្នាដៃរបស់អ្នកនិពន្ធ បានជះឥទ្ធិពលខ្លាំងនៅក្នុងសង្គម ដែលជាបុព្វហេតុសំខាន់មួយជំរុញឲ្យសង្គ្រាមរវាងអ្នកក្រីក្រ និងអ្នកមាន។ លោកពន្យល់ថា អ្នកនិពន្ធនៅក្នុងរបបខ្មែរក្រហម និងសម័យសាធារណរដ្ឋខ្មែរមួយចំនួន បាននិពន្ធចម្រៀង និងឯកសារដោយ បញ្ចូលទស្សនៈតស៊ូវណ្ណៈ ដែលធ្វើប្រទេសធ្លាក់ក្នុងភ្នក់ភ្លើងសង្គ្រាម។
លោកបញ្ជាក់យ៉ាងដូច្នេះថា៖ «កំណាព្យចម្រៀងរបស់ខ្មែរក្រហម ដែលបំផុសអ្នកស្រែឲ្យខឹងអ្នកមាន ដូចជា អ្នកមានទិញសាច់គោឲ្យឆ្កែ អ្នកស្រែម្ចាស់គោស៊ីប្រហុក…។ ការថ្លែងរបស់ លោក សោម សុមុនី គឺធ្វើឡើងនៅក្នុងសិក្ខាសាលាជាតិស្តីពី៖«បច្ចុប្បន្នភាព និងទស្សនៈវិស័យក្នុងការអភិវឌ្ឍអក្សរសិល្បិ៍ខ្មែរ» ដែលរៀបចំដោយរាជបណ្ឌិត្យសភាកម្ពុជា នាព្រឹកថ្ងៃទី២៤ ខែសីហា ឆ្នាំ២០១៧។
លោក សោម សុមុនី បានកោតសរសើររឿងកុលាបប៉ៃលិន ជាស្នាដៃនិពន្ធរបស់ កវី ញ៉ុក ថែម ដែលបានសរសេរអប់រំអ្នកមានឲ្យបន្ទន់ឥរិយាបថ និងមិនមើលងាយអ្នកក្រីក្រ ព្រមទាំងបំផុសអ្នកក្រីក្រដែលតួរអង្គចៅចិត្រជាកម្មករមានជីវិតតស៊ូប្រឹងប្រែង មានគុណធម៌ខ្ពស់ និងចុងក្រោយក្លាយជាអ្នកមាន។
លោកពន្យល់យ៉ាងដូច្នេះថា៖«ក្នុងប្រវត្តិសាស្ត្រ ខណៈចិន និងរុស្សី កំពុងធ្វើបដិវត្តន៍សម្លាប់គ្នារវាងអ្នកមាន និងអ្នកក្រ អាមេរិកបានដឹង អាមរិកធ្វើនយោបាយអប់រំអ្នកមានឲ្យលះបង់ និងបរិច្ចាគសម្រាប់អ្នកក្រ បង្កើតមូលនិធិជួយអ្នកក្រ ដំឡើងប្រាក់ខែជូនកម្មករ។ នៅពេលហ្នឹង គឺស្ងប់រៀងខ្លួន។ ដូច្នេះ រកវិធីយ៉ាងណាក៏ដោយ កុំឲ្យវណ្ណៈទាំងពីរខឹងគ្នា»។
លោកបន្តថា៖«មិនមែនជាការបិទសេរីភាពទេ សរសេរអីក៏សរសេរទៅ តែជួយថែមគំនិតសន្តិភាពនៅក្នុងស្នាដៃ។ វាមិនមែនជាបន្ទាត់នយោបាយកំណត់សេរីភាពលើអ្នកនិពន្ធនោះទេ ប៉ុន្តែ សុំអង្វរ អ្នកនិពន្ធឲ្យគិតពីប្រយោជន៍ប្រទេសជាតិ។ វាជាការអង្វរ បើគាត់ព្រមល្អហើយ តែបើគាត់មិនព្រម ក៏មិនដឹងធ្វើម៉េចទេ»។
ជុំវិញបញ្ហានេះ លោក យិន លួត សាស្ត្រាចារ្យអក្សរសាស្ត្រខ្មែរ និងអក្សរសិល្បិ៍ខ្មែរនៅសាកលវិទ្យាល័យវ៉ាស៊ីនតោននៅសហរដ្ឋអាមេរិក ដែលបានមកចូលរួមសិក្ខាសាលានេះដែរ បានឲ្យដឹងថា ការលើកស្នើសុំរបស់រាជបណ្ឌិត្យសភាកម្ពុជា គឺជាបេសកកម្មលំបាក។ អ្នកនិពន្ធកំណាព្យមានដើមកំណើតខ្មែររូបនេះ បន្ថែមថា ការដាក់បញ្ចូលគំនិតសន្តិភាពនិយមនេះ គឺជាការល្អសម្រាប់ការស្តាប់ ប៉ុន្តែ ពិបាកសម្រាប់ការធ្វើជាក់ស្តែង។
លោកពន្យល់យ៉ាងដូច្នេះថា៖«បើគេខឹង ទាល់តែមានមូលហេតុ បើយើងរកឃើញមូលហេតុ និងដោះស្រាយបាន នោះមិនមានកំហឹងវណ្ណៈអ្វីឡើយ»។
យ៉ាងណាក៏ដោយ លោកសាស្ត្រាចារ្យ អះអាងថា សិក្ខាសាលាពេញមួយព្រឹកនេះ មិនទាន់មានគោលការណ៍ជាក់លាក់ណាមួយ ជុំវិញដាក់បញ្ចូលគំនិតសន្តិភាពនិយមក្នុងស្នាដៃអ្នកនិពន្ធនេះនៅឡើយទេ។
ងាយមកផ្នែកពុទ្ធចក្រវិញ ភិក្ខុ សន វ៉ាឃីន គង់នៅវត្តមហាមន្ត្រីក្នុងរាជធានីភ្នំពេញ បានមានសង្ឃដីកាថា ព្រះពុទ្ធសាសនា បានចូលរួមចំណែកជាច្រើននៅក្នុងអក្សរសិល្បិ៍សន្តិភាព។ កំពុងរៀនអក្សរសាស្ត្រខ្មែរនៅសាកលវិទ្យាល័យភូមិន្ទភ្នំពេញ ព្រះតេជគុណ សន វ៉ាឃីន មានសង្ឃដីកាយ៉ាងដូច្នេះ៖«ពុទ្ធសាសនាបានអប់រំមនុស្សតាមរយៈអក្សរសិល្បិ៍ និងបែបបទសាសនា ដើម្បីធ្វើមនុស្សមានសីលធម៌ក្នុងការរស់នៅ និងប្រាសចាកពីអំពីបាប ព្រមទាំងរស់នៅបានសុខសាន្ត ដែលជាបុព្វហេតុសន្តិភាពផ្លូវចិត្ត និងសាមគ្គីធម៌»៕
Tag:
សោម សុមុនី
យិន លួត
© រក្សាសិទ្ធិដោយ thmeythmey.com