ស៊ីហ្គេម៖ បាល់បោះកម្ពុជាធ្លាក់ចំណាត់ថ្នាក់ពីលេខ៦ទៅលេខ៧

កីឡាជាតិ

ជាតិ

ស៊ីហ្គេម៖ បាល់បោះកម្ពុជាធ្លាក់ចំណាត់ថ្នាក់ពីលេខ៦ទៅលេខ៧

25, Aug 2017 , 10:05 am

រូបភាព

ប្រភពរូបថត៖ Ken Gadaffi/NOCC

ដោយ: រួបរួម

ក្រុមកីឡាបាល់បោះជម្រើសជាតិកម្ពុជា បានជាប់ចំណាត់ថ្នាក់លេខ៧ប្រចាំព្រឹត្តិការណ៍កីឡាស៊ីហ្គេមលើកទី២៩នេះ បន្ទាប់ពីពួកគេបានប្រកួតឈ្នះក្រុមមីយ៉ាន់ម៉ា ៩៤-៦១ នៅកីឡដ្ឋាន Stadium Mada ក្រុងគូឡាឡាំពួរ ប្រទេសម៉ាឡេស៊ី នាព្រឹកថ្ងៃសុក្រ ទី២៥ ខែសីហា។ បើប្រៀបធៀបទៅនឹងព្រឹត្តិការណ៍កីឡាស៊ីហ្គេមឆ្នាំ២០១៥ ក្រុមជម្រើសជាតិកម្ពុជាបានធ្លាក់ចំណាត់ថ្នាក់ក្នុងចំណោម៩ប្រទេសដែលបានចូលរួមប្រកួតប្រជែង។

សម្រាប់ព្រឹត្តិការណ៍កីឡាស៊ីហ្គេមលើកទី២៩នេះ ក្រុមកីឡាបាល់បោះជម្រើសជាតិកម្ពុជាដែលស្ថិតក្រោមការដឹកនាំរបស់គ្រូបង្វឹកនីហ្សេរីយ៉ា លោក Austin Koledoye ស្ថិតក្នុងពូល B ជាមួយឥណ្ឌូណេស៊ី សិង្ហបុរី វៀតណាម និងឡាវ។ សមាសភាពរបស់ក្រុមជម្រើសជាតិកម្ពុជារួមមាន កីឡាករ ភិក មីត កីឡាករ សូភីន ទួន កីឡាករ ដាអង់តូនី ដូមីនិច កីឡាករ សូភឿន អឿន កីឡាករ វីលៀម អេម កីឡាករ ផាត់ តារាខ្វាន់ កីឡាករ វណ្ណៈ សំ កីឡាករ ជា ថមមី កីឡាករ ផុន សូផានី កីឡាករ មាស ដានីញ៉ែល កីឡាករ ផេង ដារ៉ារិទ្ធី និងកីឡាករ ហួរ ពេជ្របួនជួរ។

នាការប្រកួតដំបូង កម្ពុជាបានចាញ់សិង្ហបុរី ៩៥-៦៣ ហើយបន្តចាញ់វៀតណាមទាំងប្រផិតប្រផើយក្នុងលទ្ធផល ៩៥-៩០ ។ កម្ពុជាបានស្តារមុខមាត់វិញក្នុងជំនួបជាមួយឡាវ ជាមួយនឹងជ័យជម្នះ ៩៣-៥៨ មុនចាញ់ឥណ្ឌូណេស៊ីរហូតដល់ទៅ ១១២-៧០ ។

ក្រុមជាប់ចំណាត់ថ្នាក់លេខ៤នៅក្នុងពូលដែលមាន៥ក្រុម ដោយត្រូវប្រកួតជាមួយមីយ៉ាន់ម៉ា ក្រុមបាតតារាងពូល A សម្រាប់ចំណាត់ថ្នាក់លេខ៧ក្នុងព្រឹត្តិការណ៍កីឡាស៊ីហ្គេម។ នាការប្រកួតចុងក្រោយរបស់ខ្លួននៅកីឡដ្ឋាន Stadium Mada កម្ពុជាបានយកឈ្នះមីយ៉ាន់ម៉ា ៩៤-៦១ ដើម្បីទទួលបានចំណាត់ថ្នាក់លេខ៧ ខណៈវៀតណាម និងម៉ាឡេស៊ី ប្រជែងយកចំណាត់ថ្នាក់លេខ៥ ។ សម្រាប់ការប្រកួតវគ្គពាក់កណ្តាលផ្តាច់ព្រ័ត្រ ម្ចាស់ការពារជើងឯកហ្វីលីពីន ប៉ះម្ចាស់សិង្ហបុរី រីឯឥណ្ឌូណេស៊ី ជួបថៃ ។

ក្រុមជាប់ចំណាត់ថ្នាក់លេខ៧ដោយឈរលើមីយ៉ាន់ម៉ា និងឡាវ ប៉ុន្តែបើប្រៀបធៀបទៅនឹងព្រឹត្តិការណ៍កីឡាស៊ីហ្គេមកាលពីឆ្នាំ២០១៥ កម្ពុជាបានធ្លាក់មួយចំណាត់ ដោយកាលណោះ ពួកគេស្ថិតនៅលេខ៦ឈរពីលើវៀតណាម មីយ៉ាន់ម៉ា និងទីម័រខាងកើត៕

ប្រភពរូបថត៖ Ken Gadaffi/NOCC