សំណុំរឿងលោកស្រី ទេព វន្នី និងស្រី្តបឹងកក់មួយចំនួនទៀត ឈានដល់តុលាការកំពូល

ជាតិ

សំណុំរឿងលោកស្រី ទេព វន្នី និងស្រី្តបឹងកក់មួយចំនួនទៀត ឈានដល់តុលាការកំពូល

25, Aug 2017 , 10:32 am

រូបភាព

ដោយ: ថ្មីៗ

ភ្នំពេញ៖ លោកស្រី ទេព វន្នី និងស្ត្រីបឹងកក់មួយចំនួនទៀត បានដាក់បណ្តឹងសាទុក្ខទៅកាន់តុលាការកំពូល ដើម្បីសុំប្រឆាំងនឹងតុលាការរាជធានភ្នំពេញ ដែលកាត់ទោសពួកគេឲ្យជាប់ពន្ធនាគាររយៈពេល៦ខែ ទាក់ទងនឹងបទល្មើសតាំងពី ឆ្នាំ២0១៣ មក។

តាមការកំណត់ តុលាការកំពូល ត្រូវបើកសវនាការលើបណ្តឹងសាទុក្ខរបស់ស្ត្រីបឹងកក់ខាងលើ នៅថ្ងៃទី២៥ ខែសីហា ឆ្នាំ២0១៧នេះ។ ប៉ុន្តែ តុលាការកំពូល បានប្រកាសថា សវនាការលើបណ្តឹងសាទុក្ខនេះ នឹងត្រូវជំនុំជម្រះនៅថ្ងៃក្រោយវិញ។

លោកស្រី ទេព វន្នី ត្រូវបានមន្ត្រីពន្ធនាគារ ដឹកតាមរថយន្តទៅកាន់តុលាការកំពូល នៅព្រឹកថ្ងៃសុក្រនេះ។ ប៉ុន្តែ ដោយសារសវនាការ ត្រូវបានលើកពេល មន្ត្រីពន្ធនាគារ ក៏បញ្ជូនលោកស្រី ទេព វន្នី ទៅកាន់ពន្ធនាគារ វិញភ្លាមៗ។

នៅមុខតុលាការកំពូល ប្រជាពលរដ្ឋមួយចំនួនពីតំបន់បឹងកក់ បានស្រែឲ្យដោះលែងលោកស្រី ទេព វន្នី។ ប្រជាពលរដ្ឋទាំងនោះ បាននាំគ្នាកាន់រូបរបស់លោកស្រី ទេព វន្នី ដោយសរសេរពាក្យថា «ដោះលែង ទេព វន្នី»។

លោកស្រី ទេព វន្នី រួមទាំងស្ត្រីបឹងកក់៣នាក់ទៀត គឺលោកស្រី ហេង មុំ លោកស្រី បូ ឆវី និងលោកស្រី គង់ ចន្ថា ត្រូវបានតុលាការរាជធាភ្នំពេញ កាន់ទោសឲ្យជាប់ពន្ធនាគាររយៈពេល៦ខែ ពាក់ព័ន្ធនឹងការជេរប្រមាថមន្ត្រីរាជសាធារណៈ តាំងពីឆ្នាំ២0១៣ មក។ បច្ចុប្បន្ននេះ មានតែលោកស្រី ទេព វន្នី ប៉ុណ្ណោះ ដែលជាប់ពន្ធនាគារ រីឯស្ត្រីបឹងកក់៣នាក់ផ្សេងទៀត ត្រូវបានដោះលែងឲ្យរស់នៅក្រៅឃុំជាបណ្តោះអាសន្ន។

កន្លងមកលោកស្រី ទេព វន្នី និងស្ត្រីបឹងកក់ទាំង៤នាក់ ក៏ធ្លាប់ដាក់បណ្តឹងទៅកាន់សាលាឧទ្ធរណ៍ដែរ ដើម្បីសុំប្តឹងប្រឆាំងនឹងការកាត់ទោសលើពួកគេ ប៉ុន្តែ សាលាឧទ្ធរណ៍ បានច្រានចោលបណ្តឹងនោះ៕