ស៊ីហ្គេម៖ ប៉េតង់៣នាក់ទល់៣នាក់បុរសឡើងទៅវគ្គ១/២ ខណៈនារីហាលអាវ

កីឡាជាតិ

ជាតិ

ស៊ីហ្គេម៖ ប៉េតង់៣នាក់ទល់៣នាក់បុរសឡើងទៅវគ្គ១/២ ខណៈនារីហាលអាវ

25, Aug 2017 , 1:37 pm

រូបភាព

រូបភាពពីហ្វេសប៊ុក PNN

ដោយ:

វិញ្ញាសាប៉េតង់៣នាក់ទល់៣នាក់បុរសដែលមានកីឡាករ ថោង ឈឿន, យ៉ា ច័ន្ទដារ៉ារិទ្ធ, ហេង ថា និងកីឡាករ ញ៉ែម បូរ៉ា បានឡើងទៅវគ្គពាក់កណ្តាលផ្តាច់ព្រ័ត្រក្នុងព្រឹត្តិការណ៍កីឡាស៊ីហ្គេមនៅទីក្រុងកូឡាឡាំពួរ ក្រោយយកឈ្នះវៀតណាម ១៣-១១ នាការប្រកួតដែលរៀបចំនៅទីលាន Arena Petanque កាលពីព្រឹកថ្ងៃទី២៥ ខែសីហា នេះ។ ចំណែក វិញ្ញាសា៣នាក់ទល់៣នាក់ផ្នែកនារីបានរងការខកចិត្តដោយធ្លាក់ត្រឹមវគ្គជម្រុះក្រោយចាញ់ពីរប្រកួតជាប់ៗគ្នា។

ក្រុមកីឡាករប៉េតង់កម្ពុជាផ្នែកបុរសលើវិញ្ញាសា៣នាក់ទល់៣នាក់បានយកឈ្នះក្រុមវៀតណាម ១៣-១១ ក្នុងវគ្គជម្រុះតាមពូល នៅលើទីលាន Arena Petanque KL នៅព្រឹកថ្ងៃទី២៥ ខែសីហា នេះ។ ជ័យជម្នះនេះនាំឲ្យកម្ពុជាទទួលបានកៅអីឡើងទៅកាន់វគ្គពាក់កណ្តាលផ្តាច់ព្រ័ត្រក្នុងព្រឹត្តិការណ៍កីឡាស៊ីហ្គេមលើកទី២៩នៅទីក្រុងកូឡាឡាំពួរដែលមានមេដាយ១ជាស្រេចក្នុងដៃ។

ការឡើងទៅវគ្គ១/២របស់កម្ពុជាដោយសារពូលនេះមានតែ៣ក្រុមចូលរួមគឺ កម្ពុជា វៀតណាម និងថៃ ខណៈវៀតណាមមុនចាញ់កម្ពុជា ១៣-១១ បានចាញ់ថៃក្នុងលទ្ធផល ១៣-៦។ កម្ពុជា និងថៃត្រូវជួបប្រកួតគ្នានៅរសៀលនេះ ដើម្បីដណ្តើមចំណាត់ថ្នាក់លេខ១ប្រចាំពូល។

ស្របពេលវិញ្ញាសា៣នាក់ទល់៣នាក់ផ្នែកបុរសអបអរជាមួយជ័យជម្នះ ផ្នែកនារីដែលមានកីឡាការិនី ឃួន យ៉ារី, ស្រ៊ាង សុរ៉ាឃីម, ស៊ុន គន្ធា និងកីឡាការិនី វង ចន្ថា បានរងការខកចិត្តទៅវិញ ដោយពួកគេបានចាញ់ក្រុមម្ចាស់ផ្ទះម៉ាឡេស៊ី ១៣-១១ ក្នុងជុំទី១ ហើយបន្តចាញ់ឡាវ ១៣-១១ ដូចគ្នាក្នុងជុំទី២។ ការបរាជ័យពីរប្រកួតជាប់ៗគ្នា បានធ្វើឲ្យកម្ពុជាបាត់បង់ឱកាសឡើងទៅវគ្គបន្តក្នុងព្រឹត្តិការណ៍កីឡាស៊ីហ្គេមលើកទី២៩ ដែលកំពុងដំណើរការនៅទីក្រុងកូឡាឡាំពួរប្រទេសម៉ាឡេស៊ី៕