ពលរដ្ឋជនជាតិដើមភាគតិចព្នង ដាក់ញត្តិសុំឲ្យចុះបញ្ជីដី និងបញ្ឈប់ការគំរាមកំហែង

ជាតិ

ពលរដ្ឋជនជាតិដើមភាគតិចព្នង ដាក់ញត្តិសុំឲ្យចុះបញ្ជីដី និងបញ្ឈប់ការគំរាមកំហែង

25, Aug 2017 , 8:19 pm

រូបភាព

រូបជនជាតិភាគតិចព្នង

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ ប្រជាពលរដ្ឋជនជាតិដើមភាគតិចព្នង ចំនួន ១៤៣គ្រួសារ រស់នៅក្នុងឃុំក្បាលរមាស និងឃុំស្រែគរ ស្រុកសេសាន ខេត្តស្ទឹងត្រែង បានដាក់ញត្តិជូនរដ្ឋមន្ត្រីក្រសួង រ៉ែ និងថាមពល ដើម្បីទាមទារឲ្យចុះបញ្ជីដី និងបញ្ឈប់ការគំរាមកំហែង ដែលប្រើប្រាស់កងកម្លាំងប្រដាប់អាវុធ។ ញត្តិនេះ បានដាក់នៅក្រសួងរ៉ែ និងថាមពល នាព្រឹកថ្ងៃទី ២៥ សីហានេះ។

ប្រជាពលរដ្ឋជនជាតិដើមភាគតិចព្នង ដែលរស់នៅក្នុងភូមិក្បាលរមាស ឃុំក្បាលរមាស និងភូមិស្រែគរ ឃុំស្រែគរ ស្រុកសេសាន ខេត្តស្ទឹងត្រែង បានមកដាក់ញត្តិជូនរដ្ឋមន្ត្រីក្រសួងរ៉ែ និងថាមពល។ ក្នុងលិខិតមួយច្បាប់ ដែលជាញត្តិដាក់ជូនរដ្ឋមន្ត្រីក្រសួងរ៉ែ ពលរដ្ឋទាំងអស់នោះ បានលើកយកចំណុចចំនួន ៥ ដើម្បីឲ្យរដ្ឋមន្ត្រីក្រសួងរ៉ែ និងថាមពល ដោះស្រាយបញ្ហាដែលពួកគេជួបប្រទះ។

ជនជាតិដើមភាគតិចព្នងទាំង ១៤៣គ្រួសារ ទាមទារឲ្យចុះបញ្ជីដីសមូហភាពសម្រាប់សហគមន៍ជនជាតិដើមភាគតិច និងទាមទារឲ្យបើកឡើងវិញនូវសេវាសាធារណៈ។ ជាមួយគ្នា ពួកគេស្នើឲ្យបញ្ឈប់ការកាប់បំផ្លាញព្រៃឈើ បញ្ឈប់ការគំរាមកំហែង និងរក្សាគោលជំហមិនចាក់ចេញពីភូមិចាស់។

ពលរដ្ឋភាគតិចព្នងទាំងនោះ បានលើកឡើង ជុំវិញបញ្ហាការធ្វើទំនប់វារីអគ្គិសនីសេសានក្រោមពីរ ដែលប៉ះពាល់ដល់ការរស់នៅ និងលុបបំបាត់អត្តសញ្ញាណជនជាតិដើមភាគតិច។ ម្យ៉ាងទៀត ការជម្លៀសប្រជាពលរដ្ឋដោយបង្ខំ ដោយមានកងកម្លាំងប្រដាប់អាវុធ។ ក្នុងញត្តិខាងលើ ពលរដ្ឋទាំងនោះ អះអាងថា មិនចាកចេញពីភូមិដ្ឋានឡើយ ហើយស្នើឲ្យក្រុមហ៊ុនទទួលខុសត្រូវចំពោះមុខច្បាប់ក្នុងករណីដែលធ្វើឲ្យខូចខាតដល់ទ្រព្យសម្បត្តិ។

សូមបញ្ជាក់ថា ទំនប់វារីអគ្គិសនីសេសានក្រោមពីរ បានសាងសង់ដោយទប់ទឹកទន្លេសេសាន ដោយមានកម្ពស់រហូត៧៥ម៉ែត្រ និងអាចផលិតអគ្គិសនីបាន៤០០មេហ្គាវ៉ាត់។ ទំនប់នេះ គ្រប់ដណ្តប់លើផ្ទៃដី៣ម៉ឺន៦ពាន់ហិចតា ស្ថិតនៅស្រុកសេសាន ខេត្តស្ទឹងត្រែង ដែលចាប់ផ្តើមសាងសង់តាំងពីឆ្នាំ២០១៤មកម្ល៉េះ៕