ជាតិ
តុលាការ កាត់ទោសមេបក្សអំណាចខ្មែរ ឲ្យជាប់ពន្ធនាគារ ៥ឆ្នាំ ពីបទ «ញុះញង់កងទ័ព»
× ភ្នំពេញ៖ លោក សួន សេរីរដ្ឋា ប្រធានគណបក្សអំណាចខ្មែរ ត្រូវជាប់ពន្ធនាគាររយៈពេល ៥ឆ្នាំ។ តុលាការរាជធានីភ្នំពេញ បានប្រកាសទោសរបស់លោក សួន សេរីរដ្ឋា យ៉ាងដូច្នេះ នៅរសៀលថ្ងៃទី២៥ ខែសីហា ឆ្នាំ២០១៧នេះ។
ក្រៅពីជាប់ពន្ធនាគារ តុលាការ ក៏តម្រូវឲ្យលោក សួន សេរីរដ្ឋា បង់ប្រាក់១០លានរៀល ចូលទៅរដ្ឋផងដែរ។ តុលាការ បានបើកសវនាការលើសំណុំរឿងរបស់លោក សួន សេរីរដ្ឋា នៅថ្ងៃទី២៤ ខែសីហា ឆ្នាំ២០១៧។ ប៉ុន្តែក្រោយបញ្ចប់សវនាការ តុលាការ ពុំបានប្រកាសសាលក្រមភ្លាមៗនោះទេ ដោយរង់ចាំប្រកាសនៅរសៀលថ្ងៃសុក្រនេះវិញ។
លោក សួន សេរីរដ្ឋា បានរងបទចោទចំនួនបី គឺ «បទញុះញង់កុំឲ្យយោធិនស្ដាប់បង្គាប់ បទធ្វើឱ្យខូចទឹកចិត្តកងទ័ព និងបទញុះញង់ឱ្យប្រព្រឹត្តបទឧក្រិដ្ឋជាអាទិ៍»។ ប្រធានគណបក្សអំណាចខ្មែររូបនេះ ត្រូវបានឃាត់ខ្លួន កាលពីថ្ងៃទី១៤ ខែសីហា ឆ្នាំ២០១៧ ក្រោយបង្ហោះសារលើបណ្តាញសង្គមហ្វេសប៊ុក ដែលសមត្ថកិច្ចនិងតុលាការ ចាត់ទុកថា ធ្វើឲ្យកងទ័ព មិនគោរពបទបញ្ជា ហើយអាចប៉ះពាល់ដល់សន្តិសុខជាតិ។
កាលពីថ្ងៃទី១២ ខែសីហា ឆ្នាំ២០១៧ លោក សួន សេរីរដ្ឋា បានសរសេរយ៉ាងដូច្នេះថា៖« [….] ពេលសង្គ្រាមកើតឡើងជាមួយប្រទេសឡាវ លទ្ធផល មិនខុសពីសង្គ្រាម ដែលកើតឡើងជាមួយប្រទេសសៀមទេ គឺកូនខ្មែរ កងទ័ពជាតិ នឹងស្លាប់ក្នុងសមរភូមិយ៉ាងវេទនា។ ហើយមេទ័ព នឹងឡើងបុណ្យសក្តិ ប្រមូលបានលុយកាក់ សប្បាយជាមួយស្រីយ៉ាងគគ្រឹកគគ្រេង។ [ ….]»។
ការសរសេររបស់លោក សួន សេរីរដ្ឋា គឺស្ថិតក្នុងអំឡុង ដែលរដ្ឋាភិបាលកម្ពុជា កំពុងដោះស្រាយបញ្ហាព្រំដែនជាមួយប្រទេសឡាវ។ ពេលនោះ រដ្ឋាភិបាលកម្ពុជា ដែលដឹកនាំដោយសម្តេច ហ៊ុន សែន បានបញ្ជូនកងទ័ពនិងសព្វាវុធ ទៅកាន់តំបន់ក្បែរអូរអាឡៃ និងតំបន់អូរតាង៉ាវ ព្រំដែនខេត្តស្ទឹងត្រែង ដែលកងទ័ពឡាវ ចូលមកឈរជើង។ តែកងទ័ពឡាវ បានចាកចេញពីតំបន់នោះវិញ បន្ទាប់ពីការចរចារវាងសម្តេច ហ៊ុន សែន និងលោក ថោងលន់ ស៊ីសូលីត នាយករដ្ឋមន្ត្រីនៃប្រទេសឡាវ៕
Tag:
សួន សេរីរដ្ឋា
ជាប់ឃុំ
តុលាការ
© រក្សាសិទ្ធិដោយ thmeythmey.com