ស៊ីហ្គេម៖ ប្រាយុទ្ធ ថា ជាធម្មតាដែលម្ចាស់ផ្ទះបានមេដាយមាសច្រើន ព្រោះពួកគេហ្វឹកហាត់បានច្រើន

កីឡាអន្តរជាតិ

អន្តរជាតិ

ស៊ីហ្គេម៖ ប្រាយុទ្ធ ថា ជាធម្មតាដែលម្ចាស់ផ្ទះបានមេដាយមាសច្រើន ព្រោះពួកគេហ្វឹកហាត់បានច្រើន

31, Aug 2017 , 7:39 pm

រូបភាព

ដោយ: ទេព ពិទូរ្យ

នាយករដ្ឋមន្ត្រីថៃលោកឧត្តមសេនីយ៍ ប្រាយុទ្ធ ចាន់អូចា បានការពារលទ្ធផលមេដាយមាសដ៏ច្រើនសន្ធឹកសន្ធាប់របស់ម៉ាឡេស៊ីដែលទទួលបានពីការប្រកួតកីឡាស៊ីហ្គេម ឆ្នាំ២០១៧នេះ។ លោកប្រាយុទ្ធលើកហេតុផលថា នេះជារឿងធម្មតាទេសម្រាប់ប្រទេសជាម្ចាស់ផ្ទះ ពីព្រោះពួកគេរៀបចំបានល្អ។ នេះបើតាមទីភ្នាក់ងារសារព័ត៌មានម៉ាឡេស៊ី Bernama ចុះផ្សាយនៅថ្ងៃ ៣០ ខែសីហា។

ការប្រកួតកីឡាស៊ីហ្គេមលើកទី២៩ ក្នុងទីក្រុងកូឡាឡាំពួ ប្រទេសម៉ាឡេស៊ី បានបញ្ចប់ហើយកាលថ្ងៃពុធ ទី៣០ ខែសីហាម្សិលមិញ ដោយម្ចាស់ផ្ទះទទួលបានជោគជ័យយ៉ាងធំធេង។ ក្នុងចំណោមវិញ្ញាសាសរុប៤០៦ ម៉ាឡេស៊ីទទួលបានមេដាយមាស១៤៥ ពោលគឺលើសក្រុមចំណាត់ថ្នាក់លេខ២ ថៃ ដល់ទៅពាក់កណ្តាល។

បើទោះជាលទ្ធផលយ៉ាងនេះក្តី លោកឧត្តមសេនីយ៍ ប្រាយុទ្ធ ចាន់អូចា នៅតែការពារចំនួនមេដាយមាសរបស់ម៉េឡេស៊ី ហើយសរសើរក្រុមអត្តពលិកខ្លួនក្រោយទទួលបានមេដាយមាសត្រឹម ៧២ ដែលចំនួននេះតិចជាងកាលពីព្រឹត្តិការណ៍មុនៗ។

«វាជារឿងធម្មតាទេដែលម្ចាស់ផ្ទះនឹងទទួលបានមេដាយមាសបន្ថែមទៀតបន្ទាប់ពីការត្រៀមលក្ខណៈរបស់ពួកគេនៅទឹកដីខ្លួនឯង។ វាដូចគ្នានៅពេលដែលយើងធ្វើជាម្ចាស់ផ្ទះនោះគឺយើងអាចគ្រប់គ្រងប្រភេទកីឡាដូចដែរពួកគេ [ម៉ាឡេស៊ី]បានធ្វើនេះពេលនេះ ហើយម្ចាស់ផ្ទះម៉ាឡេស៊ីមានការរៀបចំល្អ»។ នេះជាការលើកឡើងរបស់លោកនាយករដ្ឋមន្ត្រីថៃដែលបានបានប្រាប់ប្រព័ន្ធផ្សព្វផ្សាយនៅឯវិមានរដ្ឋាភិបាលកាលពីថ្ងៃចន្ទ ទី៣០ ខែសីហា។

ប្រាយុទ្ធ នៅតែសប្បាយរីករាយជាមួយនឹងការបង្ហាញខ្លួន ក៏ដូចជាកិច្ចខិតខំប្រឹងប្រែងដ៏ល្អរបស់ក្រុមអត្តពលិកថៃទាំងអស់ ក្នុងអំឡុងពេលប្រកួតព្រឹត្តិការណ៍កីឡាប្រចាំតំបន់អាស៊ាននេះ ទោះបានត្រឹមលេខ២។

លោកថា៖«ខ្ញុំសប្បាយរីករាយណាស់ដែលយើងបានបញ្ចប់ក្នុងចំណាត់ថ្នាក់លេខ ២ ទោះបីជាខ្ញុំចង់ឲ្យពួកគេ [ថៃ] បញ្ចប់ក្នុងចំណាត់ថ្នាក់ទី១ក៏ដោយ»៕