អន្តរជាតិ
ម៉ាឡេស៊ីថ្កោលទោសហិង្សាប្រដាប់អាវុធនៅមីយ៉ាន់ម៉ា និងស្នើឲ្យរដ្ឋាភិបាលដោះស្រាយបញ្ហាឲ្យបានត្រឹមត្រូវ រូបភាព៖ សារព័ត៌មាន The Star
× ម៉ាឡេស៊ីបានថ្កោលទោសការវាយប្រហាររបស់ក្រុមប្រដាប់អាវុធប្រឆាំងកងទ័ពសន្តិសុខមីយ៉ាន់ម៉ាកន្លងមកនៅរដ្ឋ Rakhine។ រដ្ឋមន្ត្រីការបរទេសម៉ាឡេស៊ីក៏បានបង្ហាញក្តីបារម្ភខ្លាំងចំពោះភាពតានតឹងកាន់ដែលបន្តកើនឡើង រួមជាមួយហិង្សាប្រដាប់អាវុធដែលបង្ខំឲ្យប្រជាជនរត់ភៀសខ្លួន និងបាត់បង់ជីវិតផងនោះ។
នៅថ្ងៃពុធទី៣០ខែសីហា រដ្ឋាភិបាលម៉ាឡេស៊ីបានចេញសេចក្តីថ្លែងការណ៍មួយថ្កោលទោសការវាយប្រហារដែលបង្កឡើងដោយក្រុមប្រដាប់អាវុធរ៉ូហ៊ីងយ៉ាប្រឆាំងកងសន្តិសុខមីយ៉ាន់ម៉ាកាលពីសប្ដាហ៍មុន។
យោងទូរទស្សន៍ Channel News Asia ក្រសួងការបរទេសម៉ាឡេស៊ីបានចេញសេចក្តីថ្លែងការណ៍មួយដែលមានខ្លឹមសារដូច្នេះថា៖«ពួកយើងបានអំពាវនាវដល់ភាគីទាំងអស់ដែលជាប់ពាក់ព័ន្ធជម្លោះប្រដាប់អាវុធនេះឲ្យបញ្ឈប់រាល់សកម្មភាពដែលធ្វើឲ្យជម្លោះកាន់តែយ៉ាប់យ៉ឺន។ យើងក៏ទទូចឲ្យរដ្ឋាភិបាលមីយ៉ាន់ម៉ាដោះស្រាយបញ្ហានេះដោយយុត្តិធម៌ ស្របតាមគោលការណ៍ការពារសិទ្ធិមនុស្សដែលមានចែងក្នុងធម្មនុញ្ញអាស៊ាន និងសេចក្ដីថ្លែងការណ៍សិទ្ធិមនុស្សរបស់អាស៊ាន»។
សេចក្តីថ្លែងការណ៍ដដែលបន្តថា ក្រោយពេលការប៉ះទង្គិចបានកើតឡើង ម៉ាឡេស៊ីស្នើឲ្យភាគីចៀសវាងធ្វើសកម្មភាពដែលប៉ះពាល់ដល់ជនស៊ីវិល ឬបង្កឲ្យមានវិបត្តិមនុស្សជាតិធ្ងន់ធ្ងរដូចឆ្នាំ២០១៦ទៀត។ ស្របពេលជាមួយគ្នានេះ វាក៏ត្រូវមានការធានាថា ប្រជាជនដែលរងគ្រោះដោយសារការប៉ះទង្គិចគ្នានេះអាចទទួលបានជំនួយសង្គ្រោះមនុស្សធម៌ផង។
បន្ថែមពីនេះ ក្រសួងការបរទេសម៉ាឡេស៊ីក៏បានលើឡើងពីដំណោះស្រាយអង្គការសហប្រតិបត្តិការឥស្លាម ដែលដាក់ចេញកាលពីដើមខែមករាកន្លងមក ដែលដំណោះស្រាយនោះផ្តោតលើស្ថានភាព ជនជាតិមូស្លីមភាគតិចរ៉ូហ៊ីងយ៉ាក្នុងរដ្ឋ Rakhine ដែលរងការធ្វើទុក្ខបុកម្នេញនិងរងការបំពានសិទ្ធិមនុស្សយ៉ាងធ្ងន់ធ្ងរ។
ដោយឡែក ម៉ាឡេស៊ីពេញស្វាគមន៍ របាយការណ៍របស់គណៈកម្មការប្រឹក្សាទទួលបន្ទុករដ្ឋ Rakhine ដែលផ្តោតលើបញ្ហាសិទ្ធិមនុស្ស សិទ្ធិរស់នៅ រួមទាំងការប្ដេជ្ញាចិត្តរបស់មីយ៉ាន់ម៉ាក្នុងការអនុវត្តតាមសេចក្ដីណែនាំក្នុងរបាយការណ៍នេះដែរ។
សូមជម្រាបដែរថា ម៉ាឡេស៊ីកំពុងរង់ចាំសហការជាមួយបណ្តារដ្ឋដទៃទៀតក្នុងតំបន់ដើម្បីផ្ដល់ជំនួយ និងគាំទ្រដល់មីយ៉ាន់ម៉ាក្នុងការដោះស្រាយបញ្ហាប្រឈមដ៏ស្មុគស្មាញនៅរដ្ឋ Rakhine នេះដែរ៕
Tag:
ម៉ាឡេស៊ី
រ៉ូហ៊ីងយ៉ា
Rakhine
មីយ៉ាន់ម៉ា
© រក្សាសិទ្ធិដោយ thmeythmey.com