អន្តរជាតិ
ប្រមុខស្ថាប័នសិទ្ធិមនុស្សUN ថ្កោលទោស ត្រាំ ដែលបន្តវាយប្រហារ«ប្រព័ន្ធផ្សព្វផ្សាយ»
× ប្រមុខស្ថាប័នសិទ្ធិមនុស្សអង្គការសហប្រជាជាតិបានទិតៀនប្រធានាធិបតីអាមេរិកលោក ដូណាល់ ត្រាំ ខ្លាំងៗ ពាក់ព័ន្ធការប្រើសម្តីវាយប្រហារលើប្រព័ន្ធផ្សព្វផ្សាយដែលប៉ះពាល់ដល់សេរីភាពសារព័ត៌មាននោះ។ វាជារឿងកម្រដែលមន្ត្រីអង្គការសហប្រជាជាតិរិះគន់ប្រមុខរដ្ឋប្រទេសមហាអំណាចខ្លាំងៗបែបនេះ។
ប្រធានាធិបតីអាមេរិកលោក ដូណាល់ ត្រាំ បន្តចាត់ទុកប្រព័ន្ធផ្សព្វផ្សាយជាសត្រូវ ហើយលោកបន្តប្រើសម្តីវាយប្រហារប្រព័ន្ធផ្សព្វផ្សាយទាំងនោះឥតឈប់។ ការវាយប្រហារប្រព័ន្ធផ្សព្វផ្សាយ ត្រូវគេចាត់ទុកថា ជាសកម្មភាពដែលរំលោភបំពាននិងបង្កផលប៉ះពាល់សេរីភាពសារព័ត៌មានផងដែរ។
ពាក់ព័ន្ធបញ្ហានេះប្រមុខឧត្តមស្នងការទទួលបន្ទុកសិទ្ធិមនុស្សនៃអង្គការសហប្រជាជាតិលោក Zeid Ra’ad al-Hussein ក៏ចាត់ទុកកាយវិកា និងសម្តីរបស់ប្រធានាធិបតីអាមេរិក ជាគ្រោះថ្នាក់ដល់សេរីភាពសារព័ត៌មានពាសពេញពិភពលោក។ មន្ត្រីជាន់ខ្ពស់ផ្នែកសិទ្ធិមនុស្សរូបនេះ ក៏បានថ្កោលទោសលោក ត្រាំ ផងដែរដែលបន្តចាត់ទុកប្រព័ន្ធផ្សព្វផ្សាយជាត្រូវទាំងដែលខ្លួនជាមេដឹកនាំមហាអំណាចប្រជាធិបតេយ្យ។
លោក Zeid Ra’ad al-Hussein រិះគន់លោក ត្រាំ នៅពេលដែលលោកថ្លែងក្នុងសន្និសីទសារព័ត៌មានកាលពីថ្ងៃពុធទី ៣០ ខែសីហា ហើយលោកប្រតិកម្មតបនឹងសម្តីលោក ត្រាំ ថ្លែងក្នុងការជួបជុំគ្នាមួយនៅ Phoenix កន្លងមក។
ដើម្បីបង្វែរការចាប់អារម្មណ៍ពេលដែលលោកមិនថ្កោលទោស ក្រុមណាស៊ីជំនាន់ថ្មី ( Neo-Nazi) ឬក្រុមស្បែកសរើសអើងពូជសាសន៍ (White Supremacist) ដែលបង្កហិង្សានៅក្រុងCharlottesville លោក ត្រាំ បានចោទប្រកាន់ថា ប្រព័ន្ធផ្សព្វផ្សាយបានផ្តល់សំឡេងឲ្យតែក្រុមបញ្ឆេះកំហឹងស្អប់ខ្ពើមទៅវិញ។
សារព័ត៌មាន New York Times ស្រង់សម្តីប្រមុខស្ថាប័នសិទ្ធិមនុស្សខាងលើដូច្នេះថា៖ «វាពិតជាគួរឲ្យភ្ងាក់ផ្អើលដែលអ្នកគិតថា សេរីភាពសារព័ត៌មាន ដែលវាមិនត្រឹមតែជាចំណុចស្នូលនៃរដ្ឋធម្មនុញ្ញប៉ុណ្ណោះអាមេរិកទេ តែវាជាអ្វីដែលអាមេរិកប្រឹងការពាររាប់ឆ្នាំ បែរជាត្រូវរងការវាយប្រហារពីសំណាក់ប្រធានាធិបតីរបស់ខ្លួនទៅវិញ»។
តាមពិតទៅ វាជារឿងកម្របំផុតមួយដែរ ដែលមន្ត្រីជាន់ខ្ពស់អង្គការសហប្រជាជាតិហ៊ានរិះគន់ប្រមុខរដ្ឋប្រទេសមហាអំណាចជាចំហរចំពោះមុខអ្នកកាសែតនោះ។ ប៉ុន្តែវាបង្ហាញឲ្យឃើញពីការខ្វាយខ្វល់របស់អង្គការសហប្រជាជាតិចំពោះការធ្លាក់ដុតដាបនៃសេរីភាពសារព័ត៌មានពិភពលោក ពេលដែលសេរីភាពនេះត្រូវជាន់ឈ្លីដោយមហាអំណាចប្រជាធិបតេយ្យដូចជាអាមេរិកទៀតនោះ។
យ៉ាងណាក៏ដោយចុះ អ្នកនាំពាក្យសេតវិមានអាមេរិកលោកស្រី Sarah Huckabee Sanders បានឆ្លើយតបនឹងសម្តីរិះគន់ប្រធានាធិបតីអាមេរិកពីសំណាក់ប្រមុខស្ថាប័នសិទ្ធិមនុស្សផងដែរ។ លោកស្រីបានថ្លែងថា អាមេរិកជឿជាក់លើសេរីភាពសារព័ត៌មាន ហើយវាក៏មានសារសំខាន់សម្រាប់ប្រជាធិបតេយ្យដូចគ្នា។
ប៉ុន្តែលោកស្រីសុំចិត្តឲ្យសារព័ត៌មានទាំងអស់ទទួលស្គាល់ពីការទទួលខុសត្រូវរបស់ខ្លួនដ៏ធំធេងចំពោះប្រជាជនអាមេរិក ជាពិសេសផ្សាយព័ត៌មានដែលត្រឹមត្រូវ។ មិនត្រឹមតែប៉ុណ្ណោះលោកស្រី បានសង្កត់ធ្ងន់ថា សារព័ត៌មានត្រូវផ្សាយព័ត៌មាន មិនមែនបង្កើតព័ត៌មានដែលបង្កឲ្យមានការភាន់ច្រឡំនោះឡើយ៕
Tag:
UNHCR
Zeid Ra’ad al-Hussein
ដូណាល់ ត្រាំ
© រក្សាសិទ្ធិដោយ thmeythmey.com