អន្តរជាតិ
កូរ៉េខាងជើងកាត់ទោសប្រហារជីវិតអ្នកកាសែតកូរ៉េខាងត្បូងបួននាក់ដែលប្រមាថរបបដឹកនាំខ្លួន រូបភាព៖ The Star Online
× អ្នកសារព័ត៌មានកូរ៉េខាងត្បូងបួននាក់ត្រូវតុលាការកូរ៉េខាងជើងកាត់ទោសប្រហារជីវិតពីបទសរសេរបញ្ចេញយោបល់លើសៀវភៅរឿងសម្ងាត់កូរ៉េខាងជើងដោយបានមួលបង្កាច់និងប្រមាថដល់កេរ្ដ៍ឈ្មោះក៏ដូចជានិមិត្តសញ្ញាជាតិរបស់កូរ៉េខាងជើងផងដែរ។ ប៉ុន្តែវាមិនមែនជាលើកដំបូងឡើយដែលកូរ៉េខាងជើងប្រកាសកាត់ទោសប្រហារជីវិតជនជាតិកូរ៉េខាងត្បូងបែបនេះ។
នៅថ្ងៃព្រហស្បតិ៍ទី៣១ខែសីហា កូរ៉េខាងជើងបានប្រកាសថា ខ្លួនសម្រេចកាត់ទោសប្រហារជីវិតអ្នកកាសែតពីរនាក់ និងចាហ្វាងបោះពុម្ពពីរនាក់ទៀតដែលជាជនជាតិកូរ៉េខាងត្បូងពាក់ព័ន្ធបទបង្ខូចកេរ្ដ៍ឈ្មោះនិងនិមិត្តសញ្ញាជាតិរបស់កូរ៉េខាងជើងផងដែរ។
អត្ថបទចុះផ្សាយលើកាសែតកូរ៉េខាងត្បូង Chosun Ilbo និង Dong-A Ilbo បានសរសេរបញ្ចេញយោបល់លើសៀវភៅជាភាសាកូរ៉េដែលបកប្រែពីសៀវភៅ«North Korea Confidential» របស់អ្នកកាសែតអង់គ្លេសពីរនាក់ដែលបានបោះពុធតាំងពីឆ្នាំ ២០១៥មក។
ក្នុងសៀវភៅជាភាសាកូរ៉េ គេឃើញមានការប្ដូរចំណងជើងសៀវភៅចាស់ទៅជា«Capitalist Republic of Korea»។ ចំណែកឯគម្របសៀវភៅ នៅត្រង់កណ្ដាលនិមិត្តសញ្ញាជាតិកូរ៉េខាងជើងត្រូវបានផ្លាស់ប្ដូរពីផ្កាយទៅជាប្រាក់ដុល្លារវិញ។
បើតាមទីភ្នាក់ងារព័ត៌មានAFP តុលាការកូរ៉េខាងជើងបានអះអាងថា អ្នកកាសែតកូរ៉េខាងត្បូងទាំងបួនរូបបានប្រមាថដល់ភាពថ្លៃថ្នូរ និងនិមិត្តសញ្ញាជាតិកូរ៉េខាងជើងយ៉ាងខ្លាំង ហើយនេះគឺជាបទល្មើសដែលមិនអាចលើកលែងបានឡើយ។ ដូច្នេះហើយ ឧក្រិដ្ឋជនទាំងនេះគ្មានសិទ្ធិស្នើសុំការសម្រាលទោសនោះទេ ហើយការប្រហារជីវិតនឹងធ្វើឡើងដោយពុំចាំបាច់ឆ្លងកាត់នីតិវិធីបន្ថែមដែរ។
គួរបញ្ជាក់ដែរថា អ្នកកាសែតកូរ៉េខាងត្បូងទាំងពីររូបនេះបានធ្វើការនៅទីភ្នាក់ងារកាសែតផ្សេងពីគ្នា។ចំណែក ឯចាហ្វាងរបស់អ្នកកាសែតពីរនាក់នេះក៏ត្រូវបានតុលាការកូរ៉េខាងជើងកាត់ទោសប្រហារជីវិតផងដែរ។ ប៉ុន្តែវាមិនមែនជារឿងចម្លែកទេ ដែលក្រុងព្យុងយ៉ាងប្រកាសកាត់ទោសប្រហារជីវិតជនជាតិកូរ៉េខាងត្បូងដោយឯកតោភាគីនោះ។ កាលពីខែ មិថុនា កូរ៉េខាងជើងក៏ប្រកាសកាត់ទោសប្រហារជីវិតលោកស្រីអតីតប្រធានាធិបតីកូរ៉េខាងត្បូងលោកស្រី ប៉ាក ហ្គឺនហេ (Park Geun-Hye) និង ប្រមុខស្ថាប័នចារកម្មកូរ៉េខាងត្បូងលោក Lee Byung-Ho ពាក់ព័ន្ធការរៀចំគម្រោងការធ្វើឃាតលោក គីម ជុងអ៊ុន ថែមទៀត។
សូមជម្រាបដែរថា សៀវភៅរឿងសម្ងាត់កូរ៉េខាងជើងនេះបានសរសេរពីទីផ្សារងងឹតរបស់កូរ៉េខាងជើងដែលមានការចែកចាយភាគយន្តកូរ៉េខាងត្បូង និងរបស់របរពេញនិយមជាច្រើនទៀតដែលចម្លងមកពីកូរ៉េខាងត្បូងដូចគ្នា៕
Tag:
កូរ៉េខាងជើង
កូរ៉េខាងត្បូង
Chosun Ilbo
Dong-A Ilbo
© រក្សាសិទ្ធិដោយ thmeythmey.com