កីឡាអន្តរជាតិ
អន្តរជាតិ
×![]()
ដោយ: ទេព ពិទូរ្យ
រដ្ឋាភិបាលថៃនឹងចំណាយប្រាក់ ១២៤លានបាត ស្មើនឹង ៣.៧៤ លានដុល្លារអាមេរិក ដើម្បីផ្តល់ជារង្វាន់លើកទឹកចិត្តដល់ក្រុមអត្តពលិកដែលឈ្នះមេដាយពីការប្រកួតកីឡាស៊ីហ្គេមលើកទី ២៩ នៅម៉ាឡេស៊ី។
ក្រុមអត្តពលិករបស់ថៃ ទទួលបានចំណាត់ថ្នាក់លេខ២ ពីព្រឹត្តិការណ៍កីឡាស៊ីហ្គេមឆ្នាំ២០១៧ នាទីក្រុងកូឡាឡាំពួ ដោយទទួលបានមេដាយមាស ៧២ ប្រាក់ ៨៦ និងសំរឹទ្ធ ៨៨។
បើតាមកាសែតបាងកកប៉ុស្តិ៍ចុះផ្សាយនៅថ្ងៃទី១ ខែកញ្ញានេះ ក្រោមគម្រោងប្រាក់រង្វាន់សម្រាប់ការអភិវឌ្ឍកីឡាថ្នាក់ជាតិរបស់រដ្ឋាភិបាលថៃដើម្បីផ្តល់ជូនក្រុមអត្តពលិកដែលឈ្នះមេដាយពីកីឡាស៊ីហ្គេមលើកនេះ ម្ចាស់មេដាយមាសនឹងទទួលបានប្រាក់ ២០០.០០០បាត ប្រមាណ៦ពាន់ដុល្លារ មេដាយប្រាក់ ១០០.០០០បាត ស្មើនឹង ៣ពាន់ដុល្លារ និងមេដាយសំរឹទ្ធ ៥០.០០០បាត ប្រមាណ មួយពាន់ប្រាំរយដុល្លារ។ ប្រាក់រង្វាន់នេះនៅមិនទាន់គិតពីការទទួលបានពីការឧបត្តម្ភផ្ទាល់ខ្លួនរបស់ពួកគេនោះទេ។
ប៉ុន្តែសម្រាប់ក្រុមកីឡាបាល់ទាត់ជម្រើសជាតិថៃដែលឈ្នះមេដាយមាសវិញ្ញាសាបាល់ទាត់បុរសពីព្រឹត្តិការណ៍ការកីឡាប្រចាំតំបន់អាស៊ាននេះ ទទួលបានប្រាក់រង្វាន់ ១៦លានបាត ប្រហែលជិត ៥ម៉ឺនដុល្លារ ដែលទទួលបានប្រាក់ច្រើនជាងកីឡាករក្នុងវិញ្ញាសាផ្សេងៗ។
ចំណែកគ្រូបង្វឹក និងប្រតិភូដែលដឹកនាំអត្តពលិកឲ្យទទួលបានជោគជ័យក៏នឹងទទួលបានប្រាក់រង្វាន់រៀងៗខ្លួនផងដែរ។
សរុបទៅមូលនិធិអភិវឌ្ឍន៍កីឡាជាតិរបស់ថៃត្រូវណាយប្រាក់សរុបទាំងអស់រហូតដល់ ១២៤លានបាត ដែលស្មើនឹង ៣.៧៤ លានដុល្លារអាមេរិក។
នាយករដ្ឋមន្ត្រីថៃ ប្រាយុទ្ធ ចាន់អូចា នឹងធ្វើជាអធិបតីក្នុងពិធីស្វាគមន៍គណៈប្រតិភូកីឡាថៃនៅឯវិមានរដ្ឋាភិបាល៕
Tag:
Sea Games 2017
ម៉ាឡេស៊ី
ថៃ
© រក្សាសិទ្ធិដោយ thmeythmey.com
