រុស្ស៊ីគំរាមបិទ«ហ្វេសប៊ុក»ក្នុងប្រទេសត្រឹមឆ្នាំ ២០១៨ ខណៈការបោះឆ្នោតប្រធានាធិបតីជិតមកដល់

អន្តរជាតិ

រុស្ស៊ីគំរាមបិទ«ហ្វេសប៊ុក»ក្នុងប្រទេសត្រឹមឆ្នាំ ២០១៨ ខណៈការបោះឆ្នោតប្រធានាធិបតីជិតមកដល់

27, Sep 2017 , 7:39 pm

រូបភាព

ដោយ: ថ្មីៗ

ទីភ្នាក់ងាររដ្ឋទទួលបន្ទុកឃ្លាំមើល និងគ្រប់គ្រងប្រព័ន្ធទូរគមនាគមន៍របស់សហព័ន្ធរុស្ស៊ីបានព្រមានហាមបណ្តាញសង្គម ហ្វេសប៊ុក ដំណើរការនៅរុស្ស៊ីនៅត្រឹមឆ្នាំ ២០១៨ ក្នុងករណីដែលក្រុមហ៊ុននេះមិនគោរពច្បាប់របស់។ ច្បាប់រុស្ស៊ីទាមទារឲ្យហ្វេសប៊ុកបង្កើតប្រព័ន្ធរក្សាទិន្នន័យអ្នកប្រើប្រាស់នៅក្នុងទឹកដីរុស្ស៊ីផ្ទាល់។

ទីភ្នាក់ងាររដ្ឋ Roskomnadzor ដែលទទួលបន្ទុកផ្នែកប្រព័ន្ធផ្សព្វផ្សាយនិងទូរគមនាគមន៍បានដាស់តឿនឲ្យក្រុមហ៊ុនហ្វេសប៊ុកគោរពតាមច្បាប់របស់ខ្លួនដោយដំឡើងប្រព័ន្ធរក្សាទិន្នន័យអ្នកប្រើប្រាស់នៅក្នុងទឹកដីរុស្ស៊ី។ បើមិនដូច្នោះទេ រុស្ស៊ីនឹងហាមឃាត់ការដំណើការរបស់បណ្តាញសង្គមមួយនេះជាផ្លូវការនៅឆ្នាំ ២០១៨។

លោក Alexander Zharov ប្រធានទីភ្នាក់ងារ Roskomnadzor ត្រូវបានស្រង់សម្តីដោយទីភ្នាក់ងារព័ត៌មាន Interfax ដូច្នេះថា៖« ច្បាប់គឺមានអនុភាពគតិយុត្តិសម្រាប់មនុស្សទាំងអស់គ្នា។ យើងនឹងដាក់វិធានការដើម្បីធានាថា ហ្វេសប៊ុកគោរពច្បាប់។ វានឹងកើតឡើងនៅត្រឹមឆ្នាំ ២០១៨ ខាងមុខនេះ»។

មន្ត្រីជាន់ខ្ពស់រុស្ស៊ីរូបនេះបានសង្កត់ធ្ងន់ថា ក្នុងករណីដែលហ្វេសប៊ុកមិនគោរពច្បាប់ ហ្វេសប៊ុកនឹងអាចឈប់ដំណើរការទៅបាននៅរុស្ស៊ីទៀត មិនខុសពីបណ្តាញសង្គម LinkedIn ឡើយ។

«ក្នុងករណីដែលនេះ យើងត្រូវអនុវត្តច្បាប់ ឬក៏ក្រុមហ៊ុននេះត្រូវឈប់ដំណើរការនៅរុស្ស៊ី ដូចដែលរឿងដែលធ្លាប់កើតឡើងចំពោះក្រុមហ៊ុន LinkedIn ដែរ។ វាគ្មានការលើកលែង ឬករណីពិសេសឡើយនៅទីនេះ»។ នេះជាការអធិប្បាយរបស់ប្រធានទីភ្នាក់ងារ Roskomnadzor។

រុស្ស៊ីបានដាក់ចេញច្បាប់ដ៏ចម្រូងចម្រាសដែលតម្រូវឲ្យបណ្តាក្រុមហ៊ុនបណ្តាញសង្គមបរទេស និងក្រុមហ៊ុនស្វែងរកទិន្នន័យ បង្កើតប្រព័ន្ធរក្សាទិន្នន័យអ្នកប្រើប្រាស់នៅរុស្ស៊ីផ្ទាល់នៅឆ្នាំ ២០១៤។ ការបង្កើតបទបញ្ញត្តិនេះបង្កឲ្យមានការប្រតិកម្ម និងទិតៀនខ្លាំងផងដែរពីសំណាក់ក្រុមហ៊ុនឧស្សាហកម្មទូរគមនាគមន៍ ហើយគេមើលឃើញថា វាជាវិធីសាស្ត្ររបស់រដ្ឋាភិបាលរុស្ស៊ីក្នុងការបង្ខំឲ្យហ្វេសប៊ុក និង Twitter ផ្ទេរទិន្នន័យឬព័ត៌មានអ្នកប្រើប្រាស់មកឲ្យខ្លួន។

តាមពិតទៅ ការបង្ខំឲ្យហ្វេសប៊ុកគោរពច្បាប់ខ្លួននេះ កើតឡើងក្រោយពេលដែលហ្វេសប៊ុកទម្លាយថា គណនីក្លែងក្លាយពាក់ព័ន្ធនឹងរុស្ស៊ីជាច្រើនបានចំណាយលុយផ្សាយពាណិជ្ជកម្មលើហ្វេសប៊ុក ដែលអាចមានឥទ្ធិពលលើការបោះឆ្នោតប្រធានាធិបតីអាមេរិកកាលពីឆ្នាំមុន។ ហ្វេសប៊ុកក៏បានចែករម្លែករបាយការណ៍នេះជាមួយអាជ្ញាធរអាមេរិកផងដែរ។

មួយវិញទៀត វាពាក់ព័ន្ធនឹងការបោះឆ្នោតប្រធានាធិបតីនៅរុស្ស៊ីតែម្តងនាខែមីនាឆ្នាំក្រោយនេះ។ នៅរុស្ស៊ី មេដឹកនាំគណបក្សប្រឆាំងដែលជាគូប្រជែងរបស់លោក វ្ល៉ាឌីមៀ ពូទីន លោក Alexei Navalny បានប្រើប្រាស់ហ្វេស៊បុកដើម្បីទាក់ទាញប្រជាប្រិយភាពជាពិសេសថ្លែងសារនយោបាយនិង រៀបចំបាតុកម្មនានាប្រឆាំងរដ្ឋាភិបាលថែមទៀតផង៕