អន្តរជាតិ
នាយករដ្ឋមន្ត្រីថ្មីតៃវ៉ាន់ប្រកាសគាំទ្រឯករាជ្យភាពរបស់ខ្លួនដោយមិនញញើតចិន
× នាយករដ្ឋមន្ត្រីតៃវ៉ាន់ដែលទើបនឹងឡើងកាន់តំណែងលោក William Lai Ching-te ជានាយករដ្ឋមន្ត្រីដំបូងគេបង្អស់ដែលហ៊ានប្រកាសគាំទ្រឯករាជ្យភាពតៃវ៉ាន់យ៉ាងបើកជំហរដោយមិនញញើតនឹងការមិនពេញចិត្តរបស់ចិន។ នាយករដ្ឋមន្ត្រីរូបនេះបានអះអាងថា លោកជាអ្នកនយោបាយដែលតស៊ូមតិដើម្បីឯករាជ្យភាពរបស់តៃវ៉ាន់។
នៅថ្ងៃទី២៧ខែកញ្ញា នាយករដ្ឋមន្ត្រីតៃវ៉ាន់ថ្មីលោក William Lai Ching-te បានថ្លែងនៅក្នុងសភាពីជំហររបស់លោកជុំវិញការគាំទ្រឯករាជ្យភាពតៃវ៉ាន់ ក៏ដូចជាទស្សនរបស់លោកចំពោះចិនផងដែរ។ នាយករដ្ឋមន្ត្រីតៃវ៉ាន់រូបនេះបានប្រកាសជាសាធារណៈថា លោកគាំទ្រឯករាជ្យភាពតៃវ៉ាន់។
ទីភ្នាក់ងារសារព័ត៌មាន South China Morning Post បានស្រង់សម្ដីលោកWilliam Lai Ching-te ដូច្នេះថា៖ «ខ្ញុំជាអ្នកនយោបាយតស៊ូមតិដើម្បីឯករាជ្យភាពតៃវ៉ាន់»។ នាយករដ្ឋមន្ត្រីថ្មីរូបនេះបានប្រកាសត្រង់ៗបែបដោយមិនញញើតនឹងការមិនពេញចិត្តរបស់ចិនឡើយ ទោះជាចិនគំរាមប្រើកម្លាំងទ័ពដើម្បីដណ្ដើមតៃវ៉ាន់មកគ្រប់គ្រងក្ដី។
ដោយឡែក ចិនកន្លងមកបានបដិសេធការទាមទារឯករាជ្យភាពរបស់តៃវ៉ាន់។ អ្នកនាំពាក្យការិយាល័យទទួលកិច្ចការផ្ទៃក្នុងតៃវ៉ាន់លោក Ma Xiaoguang បាននិយាយថា ចិនប្រឆាំងយ៉ាងខ្លាំងនឹងការទាមទារឯករាជ្យរបស់តៃវ៉ាន់ទាំងតាមរយៈសកម្មភាព និងពាក្យសម្ដី។ លោកបន្តថា តៃវ៉ាន់ជាផ្នែកមួយរបស់ចិន ដូច្នេះហើយទំនាក់ទំនងរវាងភាគីទាំងសងខាងមិនមែនជាទំនាក់ទំនងរវាងប្រទេសនឹងប្រទេសនោះទេ។
នៅក្នុងសន្និសីតកាសែតក្រុងប៉េកាំង លោក Ma ក៏បានសង្កត់ធ្ងន់ដែរថា តៃវ៉ាន់ជាផ្នែកមួយដែលមិនអាចផ្ដាច់ខ្លួនពីចិនបានឡើយ។ ដូច្នេះហើយ តៃវ៉ាន់មិនអាចក្លាយជាប្រទេសបានឡើយ។ ចិនបានគំរាមតៃវ៉ាន់ម្ដងហើយម្ដងទៀតថា ចិននឹងវាយប្រហារតៃវ៉ាន់ប្រសិនជាតៃវ៉ាន់ហ៊ានប្រកាសឯករាជ្យភាពជាផ្លូវការ។
គួរបញ្ជាក់ដែរថា ចិនកន្លងមកបានចាត់ទុកតៃវ៉ាន់ជាខេត្តមួយដែលពិបាកគ្រប់គ្រងយ៉ាងខ្លាំង។ ហើយចិនគិតជាតៃវ៉ាន់នឹងត្រូវបង្រួបបង្រួមជាមួយខ្លួននៅថ្ងៃណាមួយ បើទោះបីជាត្រូវប្រើចំណាត់ការយោធាក៏ដោយ៕
Tag:
តៃវ៉ាន់
ចិន
William Lai Ching-te
© រក្សាសិទ្ធិដោយ thmeythmey.com