អន្តរជាតិ
កម្ពុជាដាក់ដំណើរការប្រព័ន្ធត្រួតពិនិត្យច្រកទ្វារព្រំដែនអន្តរជាតិទាំង២៤
× កម្ពុជាដាក់ដំណើរការប្រព័ន្ធត្រួតពិនិត្យទំនើប(CBMS) សម្រាប់គ្រប់គ្រងច្រកទ្វារអន្តរជាតិ និងច្រកទ្វារព្រំដែនអន្តរជាតិទាំង២៤ ។ ប្រព័ន្ធគ្រប់គ្រងព្រំដែនកម្ពុជា (CBMS) នេះមានសមត្ថភាពត្រួតពិនិត្យឯកសារធ្វើដំណើរក្លែងបន្លំ និងក្លែងក្លាយ និងការគ្រប់គ្រងដំណើរចេញ-ចូលរបស់អ្នកដំណើរជាតិ-អន្តរជាតិ ។
អគ្គស្នងការដ្ឋាននគរបាលជាតិ បានឲ្យដឹងថា ប្រព័ន្ធគ្រប់គ្រងព្រំដែនកម្ពុជា (CBMS) បានប្រើប្រាស់នូវបណ្តាញ VPN ផ្តាច់មុខ ដែលបញ្ជៀសពីការចូលលួចទិន្នន័យពីខាងក្រៅ ហើយប្រព័ន្ធនេះដំណើរការដោយផ្ទៀងផ្ទាត់ទាំង២៤ប៉ុស្តិ៍ ទោះជាភ្ញៀវចេញ-ចូលតាមច្រកណាមួយក៏អាចទទួលបានព័ត៌មានទាំងអស់ នៅតាមប៉ុស្តិ៍ផ្សេងៗទៀត ។
« ប្រព័ន្ធCBMS នេះ អាចទាញយកអត្តសញ្ញាណ និងឯកសារពាក់ព័ន្ធរបស់អ្នកដំណើរតាមរយៈខ្ចៅដៃភ្លាមៗ ហើយCBMS នេះដែរ នឹងរក្សានូវទិន្នន័យរបស់អ្នកដំណើរមានដូចជា សាវតាជាតិ ខ្ចៅដៃទាំងដប់ រូបថត សលាកបត្រចេញ-ចូល ទិដ្ឋាការ ឯកសារពាក់ព័ន្ធក្នុងការធ្វើដំណើរ និងទិន្នន័យដំណើរចេញ-ចូល។ ប្រព័ន្ធCBMS បានសាកល្បងដំណើរការ និងដំណើរការទាំង២៤ប៉ុស្តិ៍ ក្នុងនោះដែរមានច្រកទ្វារអន្តរជាតិផ្លូវអាកាស ច្រកទ្វារព្រំដែនអន្តរជាតិផ្លូវគោក និងច្រកទ្វារអន្តរជាតិផ្លូវទឹក បានរួចរាល់ប្រមាណ ៩៥ភាគរយ»។នេះបើតាមអគ្គស្នងការនគរបាលជាតិ។
ប្រធានក្រុមហ៊ុន Dermalog លោក Gunther Mull បានលើកឡើងថា ការដាក់ប្រព័ន្ធគ្រប់គ្រងព្រំដែនថ្មី គឺជាជំហានដ៏សំខាន់មួយទៀតសម្រាប់ប្រទេសកម្ពុជា ដើម្បីប្រយុទ្ធប្រឆាំងនឹងអំពើភេរវកម្ម និងបទល្មើសឆ្លងកាត់ព្រំដែននាពេលអនាគត។បើតាមប្រធានក្រុមហ៊ុនរូបនេះ ប្រព័ន្ធ CBMS នេះ គឺជាប្រព័ន្ធគ្រប់គ្រងព្រំដែនទំនើប និងល្អបំផុតលើពិភពលោកក្នុងការត្រួតពិនិត្យ ការឆ្លងកាត់ព្រំដែនដោយមានសុវត្ថិភាពខ្ពស់ និងលឿនជាងមុន៕
Tag:
ស ខេង
សុខ ផល
CBMS
© រក្សាសិទ្ធិដោយ thmeythmey.com