អន្តរជាតិ
សមាជិកសភាអ៊ូហ្កង់ដាប្រតាយប្រតប់គ្នារឿងកំណត់អាយុប្រធានាធិបតី រូបភាព៖ Reuters
× សមាជិកសភាអ៊ូហ្កង់ដា បានប្រតាយប្រតប់គ្នាកិច្ចប្រជុំសភាជុំវិញសេចក្ដីព្រាងច្បាប់លុបចោលការកំណត់អាយុប្រធានាធិបតី។ បក្សប្រឆាំងចាត់ទុកសេចក្ដីព្រាងច្បាប់នេះ ជាការត្រួសត្រាយផ្លូវឲ្យប្រធានាធិបតី Yoweri Museveni ដែលដឹកនាំប្រទេសរាប់ទសវត្សរ៍មកហើយនោះ អាចកាន់តំណែងបន្តទៀត។ ប៉ុន្តែបក្សប្រឆាំងទំនងជាមិនអាចទប់ស្កាត់ការអនុម័តច្បាប់នេះបានឡើយ ខណៈបក្សកាន់អំណាចបានហៅការកំណត់អាយុប្រធានាធិបតីជាការរើសអើង។
ការពិភាក្សាសេចក្ដីព្រាងច្បាប់ស្ដីពីការលុបចោលការកំណត់អាយុប្រធានាធិបតីអ៊ូហ្កង់ដា បានឈានដល់ថ្ងៃទី២ ខណៈដែលការប្រទូស្តរាយគ្នាបានកើតឡើងក្នុងចំណោមសមាជិកសភា។ សេចក្ដីព្រាងច្បាប់ដែលលើកឡើងដោយបក្សកាន់អំណាចរបស់ប្រធានាធិបតី Yoweri Museveni រងការរិះគន់យ៉ាងខ្លាំងពីបក្សប្រឆាំង មេដឹកនាំសាសនា សកម្មជនសិទ្ធិមនុស្ស និងចោទថា ជាការពង្រីកអាណត្តិលោក Museveni ។
តាមច្បាប់រដ្ឋធម្មនុញ្ញអ៊ូហ្កង់ដា បេក្ខជនប្រធានាធិបតីត្រូវមានក្រោម៧៥ឆ្នាំ។ បញ្ញត្តិនេះបានបង្កការរាំងស្ទះដល់ប្រធានាធិបតីបច្ចុប្បន្ន Museveni ដែលមានអាយុ៧៣ឆ្នាំហើយ ក្នុងការចូលរួមការបោះឆ្នោតឆ្នាំ២០២១ ។ លោកឡើងកាន់អំណាចដោយចលនាប្រដាប់អាវុធឆ្នាំ ១៩៨៦ ហើយបន្តមកលោកឈ្នះឆ្នោតរហូតប្រាំអាណត្តិបន្តបន្ទាប់គ្នាដោយមានបញ្ហាមិនប្រក្រតីនិងមានហិង្សាថែមទៀតនិងតែងអះអាងថា លោកជាមេដឹកនាំនៃរដ្ឋប្រជាធិបតេយ្យ សេរីពហុបក្ស និងជាមេដឹកនាំល្អប្រសើរ។
បើតាមសារព័ត៌មាន Al Jazeera ការជជែកដេញដោលនៅថ្ងៃទី២៧ ខែកញ្ញា ផ្ទុះជាអំពើហិង្សា ខណៈក្រុមសន្តិសុខព្យាយាមបណ្ដេញសមាជិកសភា២៨រូបចេញពីបន្ទប់ ព្រោះជាប់ពាក់ព័ន្ធក្នុងការអំពើហិង្សានៅថ្ងៃទី២៦ ខែកញ្ញា។ ទោះជាមានបញ្ហារអាក់រអួល និងការដើរចេញពីសំណាក់សមាជិកសភាបក្សប្រឆាំងក្ដី សេចក្ដីព្រាងច្បាប់នេះត្រូវបានអនុម័តដដែល។ លោក Winnie Kiiza មេដឹកនាំប្រឆាំងនិយាយថា បក្សប្រឆាំងមិនចូលរួមផែនការធ្វើប្រធានាធិបតីមួយជីវិតរបស់លោក Museveni ឡើយ។
យ៉ាងណាមិញ ក្រុមគាំទ្រសេចក្ដីព្រាងច្បាប់នេះបាននិយាយការពារជំហររបស់ខ្លួន និងចាត់ទុកការកំណត់អាយុនេះជាការរើសអើងមនុស្សវ័យចំណាស់ទៅទៀត។ សមាជិកសភាអ៊ូហ្កង់ដា Moses Balyeku និយាយថា អាយុមិនគួរក្លាយជាឧបសគ្គដែលរាំងស្ទះសិទ្ធិសេរីភាពប្រជាជនអ៊ូហ្កង់ដាណាម្នាក់ក្នុងការប្រជែងតំណែងប្រធានាធិបតីឡើយ។
ទាក់ទងរឿងឈ្នះឆ្នោតប្រាំដងជាប់គ្នានេះ ប្រធានាធិបតីអ៊ូហ្កង់ដា លោក Museveni ដែលនៅសល់ពេលតែបីឆ្នាំទៀតប៉ុណ្ណោះលោកត្រូវបញ្ចប់ជីវិតនយោបាយ ធ្លាប់និយាយថា «មេដឹកនាំផ្តាច់ការដែលត្រូវគេបោះឆ្នោតឲ្យប្រាំដង។ នោះប្រាកដជាមេដឹកនាំផ្តាច់ការអស្ចារ្យម្នាក់ហើយ ហើយក៏ពិសេសខ្លាំងដែរ។ ជាប់ឆ្នោតប្រាំអាណត្តិជាប់គ្នាដោយបានសំឡេងគាំទ្រភាគច្រើន ប្រាកដជាមេដឹកនាំផ្តាច់ការដ៏អស្ចារ្យម្នាក់មិនអាចប្រកែកបានឡើយ»៕
Tag:
អាហ្វ្រិក
អ៊ូហ្កង់ដា
Yoweri Museveni
© រក្សាសិទ្ធិដោយ thmeythmey.com