អន្តរជាតិ
Interpol ទទួលប៉ាឡេស្ទីនជាសមាជិកពេញសិទ្ធិ ទោះជាអ៊ីស្រាអែលប្រឹងជំទាស់ក្ដី
× ស្ថាប័នប៉ូលិសអន្តរជាតិ (Interpol) នៅថ្ងៃទី២៧ ខែកញ្ញា បានទទួលស្គាល់រដ្ឋប៉ាឡេស្ទីនជាសមាជិកពេញសិទ្ធិរបស់ខ្លួនក្នុងមហាសន្និបាតប្រចាំឆ្នាំក្នុងរដ្ឋធានីប៉េកាំង។ ប៉ាឡេស្ទីនចាត់ទុកការក្លាយជាសមាជិក Interpol ជាជោគជ័យធំធេងរបស់ខ្លួន ខណៈដែលអ៊ីស្រាអែលបង្ហាញការមិនពេញចិត្តយ៉ាងខ្លាំង ព្រោះមិនអាចរារាំងប៉ាឡេស្ទីនបាន។ នាយករដ្ឋមន្ត្រីអ៊ីស្រាអែលនិយាយថា ប៉ាឡេស្ទីនបានដើរផ្ទុយពីកិច្ចព្រមព្រៀងជាមួយខ្លួនហើយ។
ព្រមគ្នានឹងកោះ Solomon រដ្ឋប៉ាឡេស្ទីនបានក្លាយជាសមាជិកថ្មីរបស់អង្គការប៉ូលិសអន្តរជាតិ (Interpol) ទោះជាអ៊ីស្រាអែលព្យាយាមជំទាស់យ៉ាងណាក្ដី។ សមាជិក Interpol ច្រើនជាងពីរភាគបីក្នុងចំណោមសមាជិក១៩៣ប្រទេស បានបោះឆ្នោតគាំទ្របេក្ខភាពទាំងពីរ បន្ទាប់ពីអ៊ីស្រាអែល ដែលមិនត្រូវគ្នាជាមួយប៉ាឡេស្ទីន ប្រឹងបញ្ចុះបញ្ចូលឲ្យ Interpol ពន្យារពេលបោះឆ្នោតទៅកិច្ចប្រជុំឆ្នាំក្រោយវិញ។ អាចនិយាយថា នេះជាបរាជ័យសម្រាប់អ៊ីស្រាអែល តែជាជោគជ័យរបស់ប៉ាឡេស្ទីន។
នាយករដ្ឋមន្ត្រីអ៊ីស្រាអែល បេនចាមីន ណាតាន់យ៉ាហ៊ូ និយាយថា ការចូលជាសមាជិក Interpol របស់ប៉ាឡេស្ទីន គឺជាការបំពានកិច្ចព្រមព្រៀងអ៊ីស្រាអែល-ប៉ាឡេស្ទីន។ នេះបើតាមការផ្សាយរបស់ទីភ្នាក់ងារព័ត៌មាន Reuters ដែលផ្សាយទៀតថា អ៊ីស្រាអែលបានយកលេសប៉ាឡេស្ទីនមិនមែនជារដ្ឋឯករាជ្យដើម្បីជំទាស់បេក្ខភាពអ៊ីស្រាអែល។ យ៉ាងណាក្ដី ក្រសួងការបរទេសអ៊ីស្រាអែលនិយាយមុនកិច្ចប្រជុំថា ការព្យាយាមរបស់ខ្លួនបរាជ័យទៅហើយ។
ប៉ាឡេស្ទីន បានដាក់ចូលជាសមាជិក Interpol កាលពីឆ្នាំ២០១៦ ក្នុងមហាសន្និបាតនៅឥណ្ឌូណេស៊ី ហើយពេលនោះ អ៊ីស្រាអែលលើកឡើងថា ការដាក់ពាក្យសុំចូលនេះគឺជាយុទ្ធនាការការទូតរបស់ប៉ាឡេស្ទីនប្រឆាំងអ៊ីស្រាអែល។ សំណើចូលជាសមាជិកនេះ ធ្វើឡើងបន្ទាប់ពីអង្គការសហប្រជាជាតិបានដំឡើងឋានៈប៉ាឡេស្ទីនពី «រដ្ឋសង្កេតការណ៍» ទៅជា «រដ្ឋមិនមែនសមាជិក» ក្នុងឆ្នាំ២០១២ ដែលធ្វើឲ្យក្ដីស្រមៃក្លាយជារដ្ឋអធិបតេយ្យរបស់ប៉ាឡេស្ទីនមានពន្លឺកាន់តែខ្លាំង។
ទោះជាមិនទាន់ក្លាយជាសមាជិកអង្គការសហប្រជាជាតិពេញសិទ្ធិក្ដី ការដំឡើងឋានៈរបស់ប៉ាឡេស្ទីនធ្វើឲ្យរដ្ឋមួយនេះមានសិទ្ធស្របច្បាប់កាន់តែច្រើនក្នុងការចូលជាសមាជិកស្ថាប័នចំណុះអង្គការសហប្រជាជាតិ ក៏៏ដូចជាអង្គការអន្តរជាតិនានា ជាក់ស្ដែងគឺស្ថាប័នប៉ូលិសអន្តរជាតិ Interpol ពេលនេះតែម្ដង។ រដ្ឋមន្ត្រីការបរទេសប៉ាឡេស្ទីននិយាយថា ជោគជ័យពេលនេះ គឺបានមកពីការគោរពគោលការណ៍របស់ Interpol ៕
Tag:
ប៉ាឡេស្ទីន
អ៊ីស្រាអែល
ចិន
Interpol
© រក្សាសិទ្ធិដោយ thmeythmey.com