អន្តរជាតិ
ចិន ប្រកាសគាំទ្ររដ្ឋាភិបាលមីយ៉ាន់ម៉ាក្នុងឆាកអន្តរជាតិលើវិបត្តិរ៉ូហ៊ីងយ៉ា
× រដ្ឋាភិបាលក្រុងប៉េកាំង បានអះអាងជាថ្មីពីគោលជំហរគាំទ្ររដ្ឋាភិបាលក្រុងណៃពិដោនៅលើឆាកអន្តរជាតិលើបញ្ហាវិបត្តិរ៉ូហ៊ីងយ៉ាខ្លួននៅក្នុងរដ្ឋ Rakhine នៃប្រទេសមីយ៉ាន់ម៉ា ។ សេចក្តីថ្លែងការណ៍របស់ ក្រុងប៉េកាំង ធ្វើឡើងស្របពេលដែល សហគមន៍អន្តរជាតិ បានបន្ទោស និងទាមទារឲ្យរដ្ឋាភិបាលមីយ៉ាន់ម៉ា បញ្ឈប់ហិង្សានៅទីនោះទៀតផង ។
លោកអគ្គរដ្ឋទូតចិនប្រចាំមីយ៉ាន់ម៉ា Hong Liang នៅថ្ងៃទី២៦ កញ្ញា កន្លងទៅ បានថ្លែងយ៉ាងដូច្នេះថា៖«យើង សង្ឃឹមថា សហគមន៍អន្តរជាតិ នឹងផ្តល់ឱកាសឲ្យកាន់តែទូលំទូលាយដើម្បីផ្តល់លទ្ធភាពឲ្យរដ្ឋាភិបាលមីយ៉ាន់ម៉ា អាចដោះស្រាយបញ្ហាប្រកបដោយប្រសិទ្ធភាព»។ នេះបើយោងតាមការចុះផ្សាយរបស់សារព័ត៌មានមីយ៉ាន់ម៉ា The Irrawaddy ។
លោកអគ្គរដ្ឋទូត ក៏បានសន្យានៅចំពោះមុខអនុប្រធានាធិបតីមីយ៉ាន់ម៉ាដែលថា ចិន នឹងបន្តផ្តល់ជំនួយមនុស្សសម្រាប់ប្រជាជននៅក្នុងរដ្ឋ Rakhine និងពិសេសនោះ ចិន ក៏គាំទ្រកិច្ចសហប្រតិបត្តិការរវាងមីយ៉ាន់ម៉ា និងបង់ក្លាដែសក្នុងការដោះស្រាយបញ្ហាព្រំដែន ហើយ ក៏សង្ឃឹមថា រដ្ឋាភិបាលមីយ៉ាន់ម៉ា នឹងនាំមកវិញនូវស្ថិរភាព សុខដុមរមណីកម្ម និងការអភិវឌ្ឍនៅក្នុងរដ្ឋ Rakhine ។ នេះបើតាមប្រភពដដែល ។
តាមពិតទៅនៅដើមខែកញ្ញាកន្លងទៅ រដ្ឋាភិបាលក្រុងប៉េកាំង ក៏បានចេញសេចក្តីថ្លែងការណ៍ស្រដៀងគ្នានេះម្តងរួចទៅហើយ ។ ក្រសួងការបរទេសចិននៅពេលនោះ បានបញ្ជាក់ថា៖« ចិន សង្ឃឹមថា សហគមន៍អន្តរជាតិ ក៏គាំទ្រកិច្ចប្រឹងប្រែងដែលបានធ្វើដោយមីយ៉ាន់ម៉ាកន្លងមកដើម្បីរក្សាការអភិវឌ្ឍ និងស្ថិរភាពជាតិ និងបង្កើតលក្ខខណ្ឌល្អប្រសើរសម្រាប់ការដោះស្រាយបញ្ហានៅក្នុងរដ្ឋ Rakhine។»
សូមជម្រាបផងដែរថា ក្រោយពីមានហិង្សាប្រដាប់អាវុធរវាងកងកម្លាំងរដ្ឋាភិបាលមីយ៉ាន់ម៉ា និងក្រុមឧទ្ទាមនៅក្នុងរដ្ឋ Rakhine មានជនជាតិភាគតិចរ៉ូហ៊ីងយ៉ា មិនតិចជាង៣០ម៉ឺននាក់ឡើយបានភៀសខ្លួនចេញពីប្រទេសទៅកាន់ប្រទេសជិតខាង ជាពិសេសបង់ក្លាដែស ។
ហេតុការណ៍ ដែលរដ្ឋាភិបាលមីយ៉ាន់ម៉ា អះអាងថាជារឿងស្មុគស្មាញ និងទាមទារពេលវេលាវែងដើម្បីដោះស្រាយនោះ បានរងនូវការថ្កោលទោសខ្លាំងពីសំណាក់សហគមន៍អន្តរជាតិ ។ គួរកត់សម្គាល់ វិបត្តិក្នុងរដ្ឋ Rakhine ក៏បានក្លាយជាប្រធានក្តៅមួយនៅក្នុងកិច្ចប្រជុំកំពូលប្រចាំឆ្នាំរបស់មហាសន្និបាតអង្គការសហប្រជាជាតិ ដែលទើបតែបញ្ចប់នៅថ្ងៃ២៥ កញ្ញាកន្លងទៅ ៕
Tag:
ចិន
មីយ៉ាន់ម៉ា
Rakhine
រ៉ូហ៊ីងយ៉ា
© រក្សាសិទ្ធិដោយ thmeythmey.com