កីឡាជាតិ
ជាតិ
អ្នកចាត់ការទូទៅក្រុម Pisnoka ស្នើឲ្យបញ្ឈប់ការរិះគន់គណៈកម្មការពាក់ព័ន្ធការកំណត់លទ្ធផល
× អ្នកចាត់ការទូទៅក្រុមបាល់ទាត់ Pisnoka FC បានស្នើឲ្យអ្នកដឹកនាំក្រុមបញ្ឈប់ការរិះគន់គណៈកម្មការរៀបចំការប្រកួតពានរង្វាន់សម្តេច ហេង សំរិន ប្រចាំឆ្នាំ២០១៧ ពាក់ព័ន្ធរឿងកំណត់លទ្ធផលទុកជាមុន។ ការស្នើនេះបន្ទាប់ពីមានអ្នកដឹកនាំក្រុមមួយចំនួនបានចោទប្រកាន់គណៈកម្មការរៀបចំការប្រកួតថា បានរៀបលទ្ធផលឲ្យក្រុម Pisnoka FC។
លោក ពេជ្រ ថាវី អ្នកចាត់ការទូទៅក្រុមបាល់ទាត់ Pisnoka FC បានអះអាងថា ជ័យជម្នះរបស់ក្រុមនីមួយៗបានកើតឡើងពីការខិតខំប្រឹងប្រែងប្រកួតនៅលើទីលានដោយសមត្ថភាពពិតៗ ពោលគឺគ្មានការកំណត់លទ្ធផលទុក ឬរៀបចំឲ្យក្រុមណាឈ្នះនោះឡើយ។ ការអះអាងបែបនេះ បន្ទាប់ពីមានអ្នកនាំក្រុមមួយចំនួនបានចោទប្រកាន់គណៈកម្មការរៀបចំការប្រកួតថាបានរៀបចំលទ្ធផលឲ្យ Pisnoka FC ដែលជាអ្នកឧបត្ថម្ភការប្រកួតឈ្នះក្នុងការប្រកួត។
ទន្ទឹមនឹងនេះ អ្នកចាត់ការទូទៅរូបនេះបានស្នើឲ្យអ្នកដឹកនាំក្រុមទាំងអស់បញ្ឈប់ការរិះគន់ដល់គណៈកម្មការដែលបានខិតខំប្រឹងប្រែងរៀបចំ និងបង្កើតឲ្យមានការប្រកួតដើម្បីផ្តល់ឱកាសដល់យុវជនបានបញ្ចេញសមត្ថភាពតទៅទៀត។ ហើយលោកបានផ្តាំដល់ក្រុមទាំង៤ដែលបានកៅអីឡើងទៅវគ្គពាក់កណ្តាលផ្តាច់ព្រ័ត្រកុំមានការបារម្ភចំពោះបញ្ហាដូចការចោទនេះឲ្យសោះ។
ការប្រកួតបាល់ទាត់ដណ្តើមពានរង្វាន់សម្តេច ហេង សំរិន ប្រចាំឆ្នាំ២០១៧ បានឈានដល់ការប្រកួតវគ្គពាក់កណ្តាលផ្តាច់ព្រ័ត្រនៅថ្ងៃសៅរ៍ ទី៣០ ខែកញ្ញា សប្តាហ៍នេះនៅកីឡដ្ឋានស្តាតចាស់។ ក្នុងនោះក្រុម Pisnoka FC ជួបសម្ព័ន្ធយុវជនមូស្លីមកម្ពុជានៅម៉ោង៤រសៀល ខណៈក្រុមអាណាចក្របៃតងតទល់ជាមួយក្រុម Old Town Garden នៅម៉ោង៦ល្ងាច។ ចំណែកការប្រកួតវគ្គផ្តាច់ព្រ័ត្រដណ្តើមជើងឯក និងចំណាត់ថ្នាក់លេខ៣ធ្វើឡើងនៅពហុកីឡដ្ឋានជាតិ។
គួរបញ្ជាក់ថា មុននឹងឡើងមកជួបគ្នានៅវគ្គនេះក្នុងនោះក្រុម Pisnoka FC បានយកឈ្នះក្រុម The Salt FC ក្នុងលទ្ធផល ២-០ រីឯអាណាចក្របៃតងយកឈ្នះក្រុម TN Kandal FC ៤-២ ខណៈសម្ព័ន្ធយុវជនមូស្លីមយកឈ្នះសមាគមរោងចក្រកាត់ដេរកម្ពុជា(GMAC) ៤-១ ហើយក្រុម Old Town Garden បានយកឈ្នះក្រុម Home Sport FC យ៉ាងប្រផិតប្រផើយ ១-០៕
Tag:
ពេជ្រ ថាវី
Pisnoka FC
Heng Samrin Cup 2017
© រក្សាសិទ្ធិដោយ thmeythmey.com