អាកាសយានដ្ឋានអន្តរជាតិសៀមរាបធ្វើលំហាត់សមយុទ្ធទ្រង់ទ្រាយធំប្រចាំឆ្នាំ

ជាតិ

អាកាសយានដ្ឋានអន្តរជាតិសៀមរាបធ្វើលំហាត់សមយុទ្ធទ្រង់ទ្រាយធំប្រចាំឆ្នាំ

29, Sep 2017 , 8:19 pm

រូបភាព

ដោយ: អុីសា រ៉ហានី (Isa Rohany)

សៀមរាប៖ អាកាសយានដ្ឋានអន្តរជាតិខេត្តសៀមរាបនៅព្រឹកថ្ងៃទី២៩ កញ្ញា ឆ្នាំ២០១៧ បានធ្វើលំហាត់សមយុទ្ធទ្រង់ទ្រាយធំប្រចាំឆ្នាំ២០១៧ ក្រោមប្រធានបទ «ការធ្លាក់យន្តហោះ»។ សមយុទ្ធនេះធ្វើឡើងក្នុងបំណងដើម្បីវាយតម្លៃនូវសមត្ថភាពប្រតិបត្តិការនៃផែនការគ្រោះអាសន្ន ប្រចាំអាកាសដ្ឋានអំពីរបៀបនៃអន្តរាគមន៍ឆ្លើយតបក្នុងពេលវេលាពិតប្រាកដមួយ។

សមយុទ្ធនៅព្រឹកថ្ងៃទី២៩ ស្ថិតនៅផ្នែកខាងជើងព្រលានយន្តហោះ ដោយមានការដុតកង់ឡាន រថយន្តពន្លត់អគ្គិភ័យ រថយន្តសង្គ្រោះបន្ទាន់ កងកម្លាំងចម្រុះ ជនរងគ្រោះ។ល។

គោលដៅសំខាន់នៃលំហាត់សមយុទ្ធនេះ រួមមានការអនុវត្តសម្របសម្រួលជាមួយស្ថាប័ន អង្គភាពសម្រាប់គ្រោះថ្នាក់យន្តហោះដែលកើត សាកល្បងនូវនីតិវិធីនៃការទំនាក់ទំនងផ្តល់ព័ត៌មានសម្រាប់គ្រោះថ្នាក់យន្តហោះធ្លាក់ក្រៅអាកាសយានដ្ឋាន។ បន្ថែមពីនេះ ក៏ដើម្បីវាយតម្លៃនូវដំណើរការនៃការផ្តល់ព័ត៌មាននៅកន្លែងកើតហេតុទៅកាន់ក្រុមអ្នកគ្រប់គ្រងគ្រោះអាសន្នប្រចាំអាកាសយានដ្ឋាន គណកម្មការគ្រោះអាសន្ននៅទីបញ្ជាការកណ្តាល និងមជ្ឈមណ្ឌលគ្រប់គ្រងគ្រោះអាសន្នរបស់ក្រុមហ៊ុនអាកាសចរណ៍។

ចំណុចចុងក្រោយ សមយុទ្ធនេះ គឺដើម្បីវាយតម្លៃលើការគ្រប់គ្រងផ្នែកសុខាភិបាលនៅកន្លែងកើតហេតុដូចជា ការសង្គ្រោះបឋមជនរងគ្រោះមុន ពេលបញ្ជូនទៅកាន់មន្ទីរពេទ្យ ការដឹកជញ្ជូនជនរងគ្រោះទៅកាន់មន្ទីរពេទ្យ និងឯកសាររបស់ជនរងគ្រោះដែលត្រូវកត់ត្រា៕