អន្តរជាតិ
ចិនចង់ពង្រឹងកិច្ចសហប្រតិបត្តិការយោធាជាមួយសិង្ហបុរី តែសិង្ហបុរីត្រូវបោះបង់តៃវ៉ាន់សិន
× ក្រសួងការពារជាតិចិនអះអាងថា ខ្លូនចង់ពង្រឹងកិច្ចសហប្រតិបត្តិការយោធាតែម្តង ប៉ុន្តែចិនជំទាស់ដាច់ខាតរាល់ប្រទេសទាំងឡាយណាដែលមានទំនាក់ទំនងជាមួយកោះតៃវ៉ាន់។ គេរំពឹងថា សិង្ហបុរីប្រហែលជានឹងផ្តាច់ចំណងយោធាយូរអង្វែងជាមួយតៃវ៉ាន់ដើម្បីពង្រឹងទំនាក់ទំនងជាមួយចិននោះជាក់ជាមិនខាន។
ក្រោយមានដំណើរទស្សនកិច្ចរដ្ឋមន្ត្រីការពារជាតិសិង្ហបុរីទៅកាន់ប្រទេសចិន តំណាងក្រសួងការពារជាតិចិនអះអាងថា ខ្លួនចង់ពង្រឹងទំនាក់ទំនងយោធាជាមួយសិង្ហបុរីឲ្យកាន់តែស៊ីជម្រៅផងនៅពេលខាងមុខ។ ប៉ុន្តែចិននៅតែបញ្ជាក់ពីជំហររបស់ខ្លួនប្រឆាំងរាល់ប្រទេសទាំងឡាយដែលមានទំនាក់ទំនងយោធាជាមួយតៃវ៉ាន់ផង ក្នុងនោះមានសិង្ហបុរីដែរ។
រដ្ឋមន្ត្រីការពារជាតិសិង្ហបុរីលោក Ng Eng Hen បានអញ្ជើញទៅទស្សនកិច្ចនៅចិនកាលពីសប្តាហ៍មុន ហើយវាមានការវាយតម្លៃផងដែរថា សិង្ហបុរីអាចនឹងបញ្ចប់ទំនាក់ទំនងនិងកិច្ចសហប្រតិបតិ្តការយោធាមួយកោះតៃវ៉ាន់ផង។
ក្នុងសន្និសីទសារព័ត៌មានប្រចាំសប្តាហ៍ថ្ងៃព្រហស្បតិ៍ទី ២៨ កញ្ញា អ្នកនាំពាក្យក្រសួងការពារជាតិចិនលោក Wu Qian បានអះអាងថា ទំនាក់ទំនងយោធាចិនជាមួយសិង្ហបុរីល្អប្រសើរទៅមុខហើយនៅពេលបច្ចុប្បន្ន ហើយចិនចង់ពង្រឹងទំនាក់ទំនងនេះបន្ថែមទៀត។
លោក Wu Qian បានលើកឡើងដូច្នេះ៖«ចិនចង់ពង្រឹងទំនាក់ទំនងជាមួយសិង្ហបុរីដើម្បីបង្កើតលក្ខខណ្ឌសមស្របមួយដើម្បីអភិវឌ្ឍកិច្ចសហប្រតិបតិ្តការយោធាឲ្យកាន់តែស៊ីជម្រៅនៅពេលខាងមុខ»។
ប៉ុន្តែអ្នកនាំពាក្យរូបនេះបានសង្កត់ធ្ងន់ថា ចិននៅតែជំទាស់រាល់ប្រទេសដែលបន្តទំនាក់ទំនងយោធាជាមួយតៃវ៉ាន់ដូចគ្នា។ លោកបានបញ្ជាក់ថា៖« អ្វីដែលខ្ញុំចង់សង្កត់ធ្ងន់នោះគឺ តៃវ៉ាន់ជាផ្នែកមួយដែលមិនអាចបំបែកបានរបស់ចិន ហើយយើងជំទាស់ដាច់ខាតរាល់ប្រទេសដែលមានទំនាក់ទំនងជាផ្លូវការ ឬចំណងកិច្ចសហប្រតិបតិ្តការយោធាជាដើមជាមួយកោះនេះ»។
ថ្វីបើគ្មានចំណងការទូតផ្លូវការក៏ដោយ សិង្ហបុរីនិងតៃវ៉ាន់មានកិច្ចសហប្រតិបត្តិការយោធាជាមួយគ្នា ក្រោមគម្រោង «Starlight Plan» ដែលត្រូវបានបង្កើតឡើងដោយការចុះហត្ថលេខារវាងនាយករដ្ឋមន្ត្រីសិង្ហបុរី លី ក្វាន់យូ និងមេដឹកនាំតៃវ៉ាន់ Chiang Ching-kuo ឆ្នាំ ១៩៧៥មកម្ល៉េះ។ ស្ថិតក្រោមកិច្ចសហប្រតិបត្តិការនេះ សិង្ហបុរីបញ្ជូនកងទ័ពខ្លួនទៅហ្វឹកហ្វឺននៅតៃវ៉ាន់ស្ទើររៀងរាល់ឆ្នាំ។ ទង្វើនេះធ្វើឲ្យចិនឃ្នើសចិត្តដែរកន្លងមក។
ប៉ុន្តែ គួរឲ្យកត់សម្គាល់ទំនាក់ទំនងចិន និងសិង្ហបុរីកាន់តែល្អក់កករ បន្ទាប់ពីអាជ្ញាធរហុងកុងចាប់បាននាវាដឹករថយន្តយោធាចំនួនប្រាំបួនគ្រឿងរបស់សិង្ហបុរីដែលធ្វើដំណើរពីកោះតៃវ៉ាន់ទៅសិង្ហបុរីបន្ទាប់ពីមានការហ្វឹកហ្វឺនចប់សព្វគ្រប់នៅចុងឆ្នាំ ២០១៦នោះ។ បញ្ហានេះបានបង្កឲ្យមានភាពតានតឹងខ្លាំងរវាងភាគីទាំងពីរផងដែរ។
ជាក់ស្តែង មហាយក្សចិនមិនអញ្ជើញមេដឹកនាំសិង្ហបុរីទៅចូលរួមកិច្ចប្រជុំកំពូលខ្សែក្រវ៉ាត់មួយវិថីមួយនៅក្រុងប៉េកាំងកាលពីខែឧសភាឡើយ ដែលជាហេតុធ្វើឲ្យមានការសង្ស័យពាក់ព័ន្ធទំនាក់ទំនងរវាងប្រទេសទាំងពីរដែរ។
ប៉ុន្តែវត្តមាននាយករដ្ឋមន្ត្រីសិង្ហនៅក្នុងប្រទេសចិនកាលពីសប្តាហ៍មុន និងមានការប្តេជ្ញាចិត្តពង្រឹងទំនាក់ទំនងទ្វេភាគីផងនោះ ឆ្លុះបញ្ចាំងឲ្យឃើញពីការវិវត្តនៃចំណងមិត្តភាពរវាងគូភាគី ហើយវាអាចនឹងជាសញ្ញាបង្ហាញឲ្យឃើញពីការឈានដល់ទីបញ្ចប់នៃកិច្ចសហប្រតិបត្តិការយោធារវាងតៃវ៉ាន់ និងសិង្ហបុរីដែរ។ សិង្ហបុរីប្រហែលជាត្រូវសម្រេចចិត្តបោះបង់តៃវ៉ាន់ ដើម្បីជ្រើសរើសយកចិនវិញដើម្បីបានប្រយោជន៍យូរអង្វែង៕
Tag:
ចិន
តៃវ៉ាន់
Ng Eng Hen
Wu Qian
សិង្ហបុរី
© រក្សាសិទ្ធិដោយ thmeythmey.com