ទេសចរណ៍ជាឱសថព្យាបាលជំងឺ និងជាក្បាលម៉ាស៊ីនរុញកំណើនសេដ្ឋកិច្ច

ជាតិ

សេដ្ឋកិច្ច

ទេសចរណ៍ជាឱសថព្យាបាលជំងឺ និងជាក្បាលម៉ាស៊ីនរុញកំណើនសេដ្ឋកិច្ច

29, Sep 2017 , 4:43 pm

រូបភាព

ដោយ: លីម តុលា

ភ្នំពេញ៖ វិស័យទេសចរណ៍ត្រូវបានពិភពលោកទាំងមូលចាត់ទុកជាឆ្អឹងខ្នងដ៍សំខាន់ក្នុងការរុញច្រានកំណើនសេដ្ឋកិច្ចនៅក្នុងប្រទេសនីមួយៗក្នុងនោះ ក៏មានប្រទេសកម្ពុជាផងដែរ។ វិស័យទេសចរណ៍នៃប្រទេសកម្ពុជាបានចូលរួមចំណែកក្នុងការកាត់បន្ថយភាពក្រីក្រដ៏មានប្រសិទ្ធភាពតាមរយៈការរុញច្រានកំណើនសេដ្ឋកិច្ចជាងរៀងរាល់ឆ្នាំ។

នាពេលកន្លងមក នៅពេលដែលគេនិយាយពីវិស័យទេសចរណ៍ គេច្រើននិយាយតែពីចំនួនទេសចរបរទេស រីឯចំនួនទេសចរក្នុងស្រុកហាក់បីដូចជាត្រូវបានគេមើលរំលង។ ផ្ទុយទៅនឹងទស្សនខាងលើនេះ លោក ថោង ខុន រដ្ឋមន្ត្រីក្រសួងទេសចរណ៍បានសង្កត់ធ្ងន់ថា ទេសចរក្នុងស្រុក និងក្រៅស្រុកមានសារៈសំខាន់ដូចគ្នា។ លោករដ្ឋមន្ត្រីបានបន្ថែមទៀតថា៖«ទេសចរក្នុងស្រុកជួយម៉ាក្រូសេដ្ឋកិច្ចធំណាស់។ ក្នុងពេលមានវិបត្តិសេដ្ឋកិច្ចម្តងៗ ចំនួនភ្ញៀវទេសចរបរទេសធ្លាក់ចុះ ដូច្នេះ ទេសចរក្នុងស្រុកជួយជំរុញកំណើនសេដ្ឋកិច្ចនៃប្រទេសនីមួយៗ ក្នុងនោះក៏មានកម្ពុជាផងដែរ»។

ការលើកឡើងពីសារៈសំខាន់នៃវិស័យទេសចរណ៍ក្នុងស្រុករបស់លោក ថោង ខុន បានធ្វើឡើងកាលពីថ្ងៃព្រហស្បតិ៍ទី២៨ខែកញ្ញាកន្លងមកនៅទីស្តីការក្រសួងទេសចរណ៍ក្នុងជំនួបជាមួយក្រុមការងារនៃកម្មវិធី«Mercedes និងកំណប់អាថ៌កំបាំង»។ កម្មវិធីនេះ ត្រូវបានបង្កើតឡើងដោយក្រុមហ៊ុនរថយន្ត Mercedes-Benz ជាមួយ ក្រុមហ៊ុនសារព័ត៌មានអេឡិចត្រូនិកថ្មីៗ និងក្រុមហ៊ុន សារព័ត៌មាន Fresh News ក្នុងគោលដៅជំរុញ លើកកម្ពស់តំបន់ទេសចរណ៍សក្តានុពល និងផលិតផលអត្តសញ្ញាណនៃខេត្តនីមួយៗនៅក្នុងព្រះរាជាណាចក្រកម្ពុជា។

នៅក្នុងជំនួបនោះ លោករដ្ឋមន្ត្រី ថោង ខុន ប្រកាសជាសាធារណៈគាំទ្រគម្រោងដែលបង្កើតឡើងដោយ ក្រុមហ៊ុនរថយន្ត Mercedes-Benz ក្រុមហ៊ុនសារព័ត៌មានអេឡិចត្រូនិកថ្មីៗ និងក្រុមហ៊ុន សារព័ត៌មាន Fresh News ព្រោះកម្មវិធីនេះ ជួយគាស់រំលើង និងបង្ហាញតំបន់ទេសចរណ៍អាថ៌កំបាំងនៅតាមបណ្តាខេត្តនីមួយៗទៅកាន់ទេសចរក្នុងស្រុក និងបន្ទាប់មក ទៅកាន់ទេសចរបរទេស។

ក្រៅពីទេសចរណ៍វប្បធម៌ ប្រវត្តិសាស្ត្រ តំបន់ឆ្នេរ កម្ពុជាមានលក្តានុពលផ្នែកទេសចរណ៍ធម្មជាតិ។ នៅក្នុងទេសចរណ៍ធម្មជាតិនេះ លោក ថោង ខុន បានបែងចែកពីរ។ ទី១ ទេសចរណ៍ធម្មជាតិ (Eco tourism) និងទីពីរ ទេសចរណ៍ធម្មជាតិដែរ តែជាប្រភេទទេសចណ៍បែបផ្សងព្រេង។

លោក រដ្ឋមន្ត្រី ថោង ខុន បានបញ្ជាក់ថា៖«Eco tourism កម្ពុជា មិនចាញ់គេទេ។ កុំថា យើងលើសគេ តែយើងមិនចាញ់គេទេ។ ភាពស្អាត និងប៉ៃតងទាក់ទាញណាស់»។ លោក ខុន បង្ហាញឆន្ទៈខ្ពស់ថា៖«យើងចង់នាំអង្ករចេញ ហើយនាំទេសចរចូល»។

វិស័យទេសចរណ៍មិនមែនគ្រាន់តែជួយជំរុញកំណើនសេដ្ឋកិច្ចប៉ុណ្ណោះទេ តែទេសចរណ៍ គឺជាឱថសព្យាបាលជំងឺ។ លោក ឃុន ចាន់ថា នាយកផ្នែកលក់នៃក្រុមហ៊ុន Mercedes-Benz ដែលមានគំនិតបង្កើតកម្មវិធី Mercedes និងកំណប់អាថ៌កំបាំង បានប្រៀបធៀបធម្មជាតិពិតៗទៅនឹងឱសថ។ លោក ចាន់ថា លើកឡើងនៅចំពោះលោក ថោង ខុន ថា៖«ក្រៅពីលើកកម្ពស់ជីវភាពគ្រួសារ សេដ្ឋកិច្ចជាតិ ទេសចរណ៍ គឺជាឱសថព្យាបាលជំងឺស្ត្រេសមួយដែរ»។

បើយោងតាមលោក ថោង ខុន នៅឆ្នាំ២០៣០ខាងមុខ ពិភពលោកផ្តោតលើការអភិវិវឌ្ឍប្រកបដោយនិរន្តភាពដោយផ្អែកលើវិស័យទេសចរណ៍ជាចម្បង។ កាលពីឆ្នាំពី២០១៦កន្លងមក ប្រទេសកម្ពុជាទទួលបានភ្ញៀវទេសចរបរទេសចំនួនជាង៥លាននាក់ដោយទទួលបានប្រាក់ចំណូលជាង៣ពាន់លានដុល្លារអាមេរិក ហើយនេះ គេនៅមិនទាន់គិតពីទេសចរក្នុងស្រុកនៅឡើយទេ៕